Nozgekerani Kusazgirako Uteŵeti
1. Kasi nyengo ya Cikumbusko yikutipa mwaŵi wuli, ndipo tikwenera kucitaci?
1 Nyengo ya Cikumbusko yikutipa mwaŵi wakuti ‘timuwonge comene Yehova.’ (Sal. 109:30) Kasi musazgirengeko nyengo yakupharazgira mu mwezi wa Malici kulongora kuti mukumuwonga Yehova pakutipa sembe? Iyi ni nyengo yakuti tambe kughanaghanirapo nkhani iyi.—Zinth. 21:5.
2. Kasi imwe na ŵanyinu mukacita wuli mukati mwapulika vya upayiniya wa maora 30 cilimika camara?
2 Upayiniya Wakanyengo: Cilimika camara, ŵabali na ŵadumbu ŵakakhuka comene ŵakati ŵapulika kuti ŵangacita upayiniya wakanyengo wa maora ghacoko waka mu Epulero. Mbali munyake wakati: “Nicali pa sukulu, ndipo ningafiska yayi upayiniya wanyengozose. Kweni mu Epulero nicitenge upayiniya wa maora 30, ndipo khumbo lane ndakuti mpaka nizakakwaniske maora 50.” Mudumbu yunji uyo wali panchito yakulembeka wakati: “Maora 30 pera ghanganitonda yayi!” Mudumbu munyake, uyo kale wakaŵa mupayiniya wanyengozose, pasono wali na vilimika vyakujumpha 80. Wakati wapulika cipharazgo cakuti wangacita upayiniya wa maora 30, wakayowoya kuti: “Ndivyo nkhakhumbanga! Yehova nayo wakumanya kuti palije ico cikunikondweska pa umoyo wane nga nkhucita upayiniya.” Awo ŵakawona kuti ŵangakwaniska yayi upayiniya wakanyengo ŵakasazgirako waka nyengo mu uteŵeti.
3. Ni vici ivyo vingatikhukiska kucita upayiniya wakanyengo mu Malici, Epulero na Meyi?
3 Malici uzamuŵa mwezi uwemi comene wakucitira upayiniya wakanyengo, cifukwa tingazakacita wa maora 30 panji wa maora 50. Kweniso kwamba pa Cisulo, Malici 17, tizamwamba kucema ŵanthu kuti ŵazakaŵe nase pa Cikumbusko, pa Epulero 5. Ŵanandi ŵazamukondwa comene na mulimo uwu, mwakuti ŵazamukhuka kulutizga upayiniya wakanyengo wa maora 50 mu Epulero na Meyi.
4. Tingacita wuli kuti tisazgireko uteŵeti, ndipo tisangenge candulo wuli?
4 Apo muzamukumanaso kuti musopere pamoza na mbumba yinu, mungacita makora kudumbirana ivyo mungacita kuti musazgireko uteŵeti mu nyengo ya Cikumbusko. (Zinth. 15:22) Mulombani Yehova kuti watumbike ivyo mucitenge. (1 Yoh. 3:22) Apo mukusazgirako uteŵeti mu nyengo yapadera iyi, mumulumbenge comene Yehova, kweniso namwe muŵenge ŵakukondwa comene!