Pharazgani Mwacikanga ku Malo Ghakucitirako Malonda
1. Usange tikopa kupharazga ku malo ghakucitirako malonda, cifukwa wuli tikwenera kufipa mtima yayi?
1 Kasi mukopa kupharazga ku malo ghakucitirako malonda? Usange ni nthena, kufipa mtima yayi. Paulosi wakaŵa munthu wambura wofi, kweni nyengo zinyake nayo wakeneranga ‘kucita cikanga’ kuti wapharazge. (1 Tes. 2:2) Musi umu muli vinyake ivyo tikopa, na masacizgo agho ghangatovwira.
2. Cifukwa wuli tikwenera kufipa mtima yayi kuti tingakwiyiska ŵanchito?
2 Kasi Ŵanchito Ŵamukwiya Cifukwa ca Kuŵatimbanizga? Mu mabizinesi ghanandi, ŵanchito ŵakukhazga kale kuti kwizenge ŵanthu, ntheura ŵangamukwiyirani yayi. Iwo ŵamupokeleraninge makora, cifukwa ŵawonenge nga mwizira malonda. Para mwavwara mwanchindi, ndipo mukufwatuka nawo, nawo ŵamucindikaninge.
3. Kasi tingacita wuli kuti tileke kukwiyiska ŵanthu awo ŵakukhumba kovwirika?
3 Kasi Namupharazga Pamaso pa Ŵanthu Ŵanandi Awo Ŵakukhumba Kovwirika? Para mungakwaniska, mupharazgenge nyengo iyo kulije ŵanthu ŵanandi, panji para ŵajura waka. Lindilirani kuti mupharazgire bwana para wali yekha. Yowoyani mwakudumura.
4. Kasi tingayowoya vici para tikupharazga ku malo ghakucitirako malonda?
4 Kasi Namuyowoya Vici? Usange pali ŵanchito ŵanandi, yowoyani dankha na bwana. Mungayowoya kuti: “Nchakusuzga kusanga ŵanthu ŵapanchito ku nyumba zawo, ntheura tamulondani kwenekuno. Nkhumanya kuti mwatangwanika, ntheura niyowoyenge mwakudumura comene.” Cingaŵa ciwemi comene kuleka kuyowoyapo za vyakupeleka, mwakuti ŵaleke kuwona nga mukusaska malonda. Kweni usange ŵamufumbani uko kukufuma ndalama zakwendeskera nchito yithu, mungaŵalongosolera. Kwakuyana na nchito iyo yikucitika pa malo agho, mungapempha bwana kuti muyowoye na ŵanchito mwakudumura. Yowoyani ivyo mwanguyowoya kwa bwana. Usange wanchito watangwanika, yowoyani mazgu ghacoko waka na kumupa thirakiti. Usange bwana wakana kuti muyowoye na ŵanchito, mungamupempha kuti muleke mabuku pa malo agho ŵanchito ŵangaghasanga.
5. Kasi uwemi wa kupharazga ku malo ghakucitirako malonda ngwakuti wuli?
5 Yesu na Paulosi ŵakapharazganga mwacikanga uko ŵanthu ŵakacitiranga nchito zawo, ndipo namwe mungacita mwakuyana waka. (Mat. 4:18-21; 9:9; Mil. 17:17) Lombani Yehova kuti wamupani cikanga. (Mil. 4:29) Ni viŵi yayi kuti ŵanthu ŵaleke kusangika uko ŵakugwilira nchito. Ntheura mungacita makora kuyezga nthowa iyi yakupharazgira.