Nthowa Ziphya Zakupharazgira Uko Kukusangika Ŵanthu Ŵanandi
1. Kasi Ŵakhristu ŵakwambilira ŵakapharazga nkhu?
1 Ŵakhristu ŵakwambilira ŵakapharazganga kunyumba na nyumba pera yayi. Ŵakapharazgangaso uko kukasangikanga ŵanthu ŵanandi. (Mil. 20:20) Mwaciyelezgero, ŵakalutanga ku tempele, uko ŵakamanyanga kuti ŵamusangako ŵanthu ŵanandi. (Mil. 5:42) Apo wakaŵa ku Ateni, Paulosi wakapharazganga zuŵa lililose ku ŵanthu awo ŵakasangikanga ku msika. (Mil. 17:17) Lero napo, kupharazga kunyumba na nyumba ndiyo nthowa yakwamba iyo tikupharazgira makani ghawemi. Ndipouli, tikupharazgaso uko ŵakwimika magalimoto, ku misika, na ku malo ghanyake uko kukusangika ŵanthu ŵanandi. Nangauli mupharazgi waliyose wakwenera kupharazga uko kukusangika ŵanthu ŵanandi, kweni ŵapharazgi ŵanyake ŵaŵenge na mwaŵi wakugwiliskira nchito nthowa ziphya zakupharazgira ku malo agha.
2.Kasi ni upharazgi wuli uwo ukamba mu Novembala 2011?
2 Upharazgi Wapadera wa mu Misumba Yikuruyikuru: Nga umo buku Lapachaka la 2013 likuyowoyera pa peji 16 na 17, upharazgi wa mu misumba yikuruyikuru ukamba ku New York City mu Novembala 2011. Ŵakayara mabuku na magazini gha viyowoyero vyakupambanapambana pa mathebulu na pa cinthu cinyake cakucita kukunkhuzga na kuŵika pa malo agho pakujumpha ŵanthu ŵanandi. Zuŵa lililose pakajumphanga ŵanthu ŵanandi, kusazgapo awo ŵakukhala ku malo agho mphakusuzga kuti Ŵakaboni ŵakafikeko na awo ŵakusangika yayi pa nyumba. Ŵanthu ŵanandi ŵakanweka na mabuku ghithu. Mu mwezi umoza pera ŵakagaŵira Magazini 3,797 na mabuku 7,986. Ŵanandi awo ŵakajumphanga ŵakapemphanga sambiro la Baibolo. Pakuti cilato ca mulimo uwu cikaŵa ca kwambiska masambiro gha Baibolo, awo ŵakalekanga maadiresi yawo, ŵakaghatumanga ku mipingo ya uko ŵakukhala kuti ŵakambe kusambira nawo Baibolo.
3. Kasi upharazgi uwu wambenge kucitika mpaka nkhu?
3 Cifukwa cakuti upharazgi uwu ukwenda makora, ucitikengeso mu misumba yinyake yikuruyikuru pa caru cose. Ofesi ya munthavi ndiyo yiwonenge misumba iyo mungacitika upharazgi uwu. Upharazgi uwu ukwenera kucitika mu misumba iyo muli malo ghakukwelera basi panji sitima, maofesi ghanandi, na ŵanthu ŵanandi ŵakwenda pasi. Ofesi ya munthavi yizamudumbiskana na mipingo iyo yizamucitako upharazgi uwu kuti yiŵaphalire umo ŵangacitira. Kanandi ŵapayiniya ŵanyengozose na ŵapadera ndiwo ŵakucita upharazgi uwu, kweni nyengo zinyake ŵapayiniya ŵakanyengo nawo ŵangacitako.
4. Kasi mulimo wakupharazga mu misumba yikuruyikuru ukucitika wuli?
4 Umo Upharazgi Uwu Ukucitikira: Awo ŵakucita upharazgi uwu ŵakulindilira munthu kuti wize apo ŵaŵika thebulu panji cinthu cinyake cakucita kukunkhuzga. Para munthu wiza, ŵakumuphalira kuti wangatora buku panji magazini yiliyose iyo watemwa. Ŵapayiniya ŵakuzgora mafumbo agho ŵanthu ŵakufumba kufuma mu Baibolo. Usange munthu watora buku, ŵakumuphalira yayi kuti wangapeleka cawanangwa. Kweni usange munthu wakufumba uko kukufuma ndalama izo tikwendeskera mulimo withu, ŵangamulongosolera kuti para munthu wakukhumba kupeleka vyawanangwa wangatumizga ku adiresi iyo yili pa buku panji magazini iyo watora. Para ŵawona kuti nchakwenelera, ŵakumufumba kuti: “Kasi mungatemwa kuti munthu wize ku nyumba kwinu?” panji “Padera pa mabuku agha, kasi mukumanya kuti tikusambira na munthu Baibolo kwawanangwa?”
5. Kasi mbumba yinyake yasanga vitumbiko wuli cifukwa ca kucitako upharazgi uwu?
5 Mulimo uwu wuli na vitumbiko vinandi. Mbumba yinyake yikati: “Nchakukondweska kuwona ŵanthu ŵanandi ŵakujumpha zuŵa lililose, ndipo kwatovwira kuti timanye mulimo ukuru uwo ukucitika pa caru cose wakupharazgira ŵanthu. Kuwona ŵanthu wose aŵa na kughanaghanira umo Yehova wakupwelelera waliyose, kwatikhozga kuti tilutilire kuŵika mulimo wakupharazga pakwamba mu umoyo withu. Tikughanaghanira umo Yehova wakusandira mitima ya awo ŵakujumpha na kupenja awo mbakwenelera. Tikujipulika kuti tili pafupi na ŵangelo awo tikucitira lumoza mulimo uwu.”
6. (a) Kasi ni upharazgi wuli unyake uwo mipingo yinandi yikunozga, ndipo ukupambana wuli na uwo ukucitika mu misumba yikuruyikuru? (b) Kasi mipingo yingakolerana wuli pakupharazga uko kukusangika ŵanthu ŵanandi?
6 Kupharazga Uko Kukusangika Ŵanthu Ŵanandi mu Cigaŵa ca Mpingo Withu: Padera pa upharazgi wapadera uwo ukucitika mu misumba yikuruyikuru, paliso upharazgi unyake uwo ŵalara ŵakunozga mu cigaŵa ca mpingo wawo. Ŵapharazgi ŵakutora thebulu panji cinthu cinyake cakucita kukunkhuzga na kuŵika pa malo apo pakujumpha ŵanthu ŵanandi mu cigaŵa ca mpingo wawo. Upharazgi uwu ukupambana na uwo ukucitika mu misumba yikuruyikuru. Tikuyowoya nthena cifukwa uwo ukucitika mu misumba yikuruyikuru ukucitika na ŵapharazgi ŵakufuma mu mipingo yakupambanapambana, ndipo ofesi ya munthu ndiyo yikuzomerezga.—Wonani bokosi lakuti “Koleranani.”
7.Usange nchakwenelera, kasi ŵalara ŵanganozga wuli upharazgi uwu mu cigaŵa ca mpingo wawo?
7 Ŵalara ŵazamuwona usange mu cigaŵa ca mpingo wawo muli malo agho kukusangika ŵanthu ŵanandi na kusanda usange cingaŵa cakwenelera kucita upharazgi uwu. Malo agho ŵapharazgi ŵangayara mabuku pa mathebulu ni mu masiteji gha basi, pa jiti, pawalo pa masitoro, mu misewu iyo mukwenda ŵanthu ŵanandi, mu makoleji, pa ciŵanja ca ndege na uko ŵanthu ŵakutemwa kukumana usange ŵali na vyakucitika. Vikuŵa makora usange ŵapharazgi ŵakuleka kusintha malo, mazuŵa, na nyengo. Kuŵika thebulu la mabuku apo pali masitoro ghanandi nkhwacandulo comene kuluska kuŵika apo pali sitoro yikuru yimoza. Apo pali sitoro yimoza ŵanthu ŵakupukwa waka ivyo ŵakukhumba mu sitoro. Malo ghanyake nga mu mphepete mwa misewu iyo mukwenda ŵanthu ŵanandi mungakhumbikwira waka kuŵa na cinthu cinyake cakucita kukunkhuzga. Ŵalara ŵangakopera pa Webusayiti yithu maposita gha magazini gha Gongwe la Mulinda na Galamukani!, na buku la Baibolo Likusambizgaci. Maposita agha ghali kunozgeka kuti ghawovwire pa upharazgi uwu pera. Awo ŵacitengeko upharazgi uwu, ŵacitenge mwakuyana waka na upharazgi wa mu misumba yikuruyikuru ndipo ŵakwenera kulondezga ivyo mulaŵiliri wa uteŵeti waŵaphalirenge. Usange ŵatora adiresi ya munthu wakunweka uyo wakukhala mu cigaŵa cawo yayi, ŵakwenera kusayina mwaluŵiro fomu ya Weleraniko kwa Munthu Uyu (S-43) na kukapeleka kwa mulembi.
8.Kasi ni mwaŵi wuli uwo ulipo usange pa mpingo winu palije ndondomeko yakupharazga uko kukusangika ŵanthu ŵanandi?
8 Pamwekha Mungapharazga Uko Kukusangika Ŵanthu Ŵanandi: Mipingo yinyake yilije cigaŵa ico ŵangacitirako upharazgi uwu. Ndipouli, mupharazgi waliyose payekha wangaghanaghanira umo wangacitira kuti wapharazgenge uko kukusangika ŵanthu ŵanandi. Kasi mu cigaŵa cinu muli msika, malo gha salawura, panji masitoro? Kasi kuli malo uko ŵanthu ŵakutemwa kucezga? Kasi kuli malo uko ŵanthu ŵakukumana para kuli vyakucitika vinyake? Usange ni nthena, namwe mungacitako upharazgi uwu.
9. Cifukwa wuli tikwenera kuŵikapo mtima kupharazga kulikose uko ŵanthu ŵakusangika?
9 Yehova wakukhumba kuti “ŵanthu ŵa mitundu yose ŵafike pa kumanya makora unenesko na kuponoskeka.” (1 Tim. 2:4) Lekani tikuyezgayezga kufikira ŵanthu ŵanandi na makani ghawemi gha Ufumu pambere umaliro undize. (Mat. 24:14) Ku madera ghanandi nchakusuzga kusanga ŵanthu pa nyumba. Kweni tingadumbiskana nawo para ŵali ku malo agha. Nthowa yekha iyo ŵanji ŵangapulikira makani ghawemi, nkhupharazga uko kukusangika ŵanthu ŵanandi. Ipo tiyeni tifiske uteŵeti withu mwakupharazgira ŵanthu kulikose uko ŵangasangika.—2 Tim. 4:5.
[Bokosi pa peji 5]
Koleranani
Nyengo zinyake vikucitika kuti ŵapharazgi ŵakufuma ku mipingo iyo yikupakana mphaka ŵapharazge mu msewu umoza panji pa depoti yimoza. Ŵapharazgi ŵakufuma ku mipingo yakupambana ŵakugaŵira magazini ku malo ghamoza. Ivi vikupangiska kuti ŵeneco ŵa malo agha ŵambe kunyanyara, nanga vingaŵa kuti ŵakupharazga pa nyengo zakupambana. Ipo cingaŵa ciwemi kuti tipharazgenge mu cigaŵa cithu para tikupharazga ku malo uko kukusangika ŵanthu ŵanandi.
Usange ŵapharazgi ŵakukhumba kukapharazga uko kukusangika ŵanthu ŵanandi mu cigaŵa ca mpingo wapafupi, ŵakwenera kudumbiskana dankha na mulaŵiliri wa uteŵeti. Iyo wakumanenge na mulaŵiliri wa uteŵeti wa mpingo uwo kuti waŵazomerezge. Usange mipingo ya viyowoyero vyakupambana yikupharazga mu cigaŵa cimoza, ŵalaŵiliri ŵa uteŵeti ŵakwenera kudumbiskana mwakuti ŵaleke kukwiyiska ŵanthu. Na Kukolerana, vinthu vyose vingacitika “mwakwenelera ndiposo mu ndondomeko.”—1 Kor. 14:40.