Upharazgi wa mu Msewu Uwo Ngwacandulo
1. Kasi tingamuyezga wuli Yesu?
1 Apo Yesu wakateŵeteranga pa caru capasi, wakaleka yayi kuyowoya na ŵanthu awo wakakumananga nawo mu nthowa panji kunyake. (Luka 9:57-61; Yoh. 4:7) Wakakhumbanga kuphalira ŵanandi uthenga wakuzirwa. Mazuŵa ghano, upharazgi wa mu msewu ukovwira comene kuti ŵanthu ŵamanye vinjeru vya Ciuta. (Zinth. 1:20) Tingandula comene para tamba ndise kucitapo kanthu, kweniso para tacita mwamahara.
2. Kasi tikucita wuli para tikupharazga mu msewu?
2 Citanipo Kanthu: Nchiwemi kuluta apo pali ŵanthu kuluska kwimilira waka panji kukhala pasi kulindilira kuti awo ŵakujumpha ŵamulondani. Mwemweterani, ŵalaŵiskani kumaso, ndipo fwatukani nawo. Usange muli ŵaŵiri, kanandi cikuŵa ciwemi kuti waliyose wapharazgirenge munthu payekha. Kweniso mukwenera kuyezgayezga kuti muwelereko ku ŵakunweka. Usange nchakwenelera, para mwamara kudumbirana na munthu, mungamufumba umo mungacitira kuti muzakakumaneso. Ŵanyake ŵakupharazga mu msewu wenewuwo mwakuwerezgawerezga. Ntheura ŵakukumana na ŵanthu awo ŵakaŵapharazgirapo kale, na kuŵawovwira.
3. Tingacita wuli mwamahara para tikupharazga mu msewu?
3 Citani Mwamahara: Ghanaghanirani malo agho mungimapo na ŵanthu awo mungayowoya nawo. Ni dango yayi kuyowoya na munthu waliyose uyo wakujumpha. Ŵani maso. Usange munthu wakucimbilira, cingaŵa makora kumuleka wajumphe. Para mukupharazga pa malo gha bizinesi mukwenera kucenjera kuti muleke kukhuŵazga mweneco. Kanandi cikuŵa makora kupharazgira ŵanthu para ŵamara kugura kuluska para ŵakwiza kuzakagura. Tileke kuciluska ŵanthu pakwamba kuyowoya nawo. Kweniso mahara ghakukhumbikwa pakugaŵira magazini. Para munthu ngwakunweka viŵi yayi, tingamugaŵira waka thirakiti.
4. Cifukwa wuli upharazgi wa mu msewu ngwacandulo na wakukondweska?
4 Upharazgi wa mu msewu ukovwira kuti tiseŵe mbuto za unenesko mu nyengo yicoko waka. (Muph. 11:6) Ŵanthu ŵanyake awo tikusangana nawo mu upharazgi uwu ni awo tikutondeka kuŵasanga para tikupharazga nyumba na nyumba. Ipo mphanyi nase tapharazgako mu msewu. Iyi ni nthowa yakukondweska yakupharazgira, kweniso njacandulo.