Kasi Mungapharazga Namise?
1. Kuyana na ivyo munthu munyake wakayowoya, kasi Paulosi wakapharazganga nyengo wuli kunyumba na nyumba?
1 Mu buku lakuti Daily Life in Bible Times, munthu munyake wakati Paulosi wakapharazganga kunyumba na nyumba “kwamba 4 koloko namise mpaka usiku.” Tikumanya yayi usange ndimo ndondomeko ya Paulosi yikaŵira, kweni ico tikumanya nchakuti wakaŵa wakukhumbisiska ‘kucita vinthu vyose cifukwa ca makani ghawemi.’ (1 Kor. 9:19-23) Ici cikung’anamura kuti wakasinthanga ndondomeko yake mwakuti wapharazgenge kunyumba na nyumba pa nyengo iyo ŵanthu ŵanandi ŵakusangika.
2. Cifukwa wuli namise ni nyengo yiwemi kupharazga?
2 Mu vyaru vinandi, ŵapharazgi ŵakutemwa kupharazga kunyumba na nyumba na mulenji. Kweni kasi mulenji ni nyengo yiwemi uko imwe mukukhala? Pakuyowoya za cigaŵa ico wakupharazgako, mupayiniya munyake wakati: “Nkhusanga munthu yayi panyumba namuhanya. Kweni ŵanthu ŵanandi ŵakusangika namise.” Para tikupharazga namise, tingasanga ŵanalume awo ŵakusangika viŵi yayi panyumba namuhanya. Kanandi ŵanthu ŵakutemwa kudumbiskana nawo namise. Usange upharazgi uwu ungaŵa wakovwira mu cigaŵa cinu, ŵalara ŵanganozga ndondomeko ya maungano ghakunozgekera uteŵeti wa namise.
3. Kasi tingacita wuli mwamahara usange tikupharazga namise?
3 Citani Mwamahara: Usange tikupharazga namise, tikwenera kucita vinthu mwamahara. Para munthu mwamusanga panyengo yiheni, cingaŵa ciwemi kwizaso dazi linyake. Ndiposo, nchamahara kwenda ŵaŵiriŵaŵiri panji mu magulu, ndipo para ŵanyithu ŵakupharazga tikwenera kuŵalindilira. Kupharazga namise comene yayi cifukwa ŵanthu ŵangaŵa kuti ŵakunozgekera kuphika. (2 Kor. 6:3) Usange uko mukukhala nkhwakofya para kwafipa, muwerengeko luŵiro pambere kundafipe.—Zinth. 22:3.
4. Kasi kupharazga namise kuli na vitumbiko wuli?
4 Vitumbiko: Uteŵeti ukunozga comene para tikusanga ŵanthu kuluska para tikuleka kuŵasanga. Nakuti para tikusanga ŵanthu ŵanandi, tikuŵa na mpata unandi wakovwira ŵanji kuti “ŵafike pa kumanya makora unenesko na kuponoskeka.” (1 Tim. 2:3, 4) Kasi mungasintha ndondomeko yinu kuti mupharazgenge namise?