Chitani Vinandi pa Nyengo Iyo Muli mu Uteŵeti
Mu chaka cha uteŵeti cha 2014 tikapharazga kwa maora 1,945,487,604. Uwu mbukaboni wakuti tikutangwanika na uteŵeti. (Sal. 110:3; 1 Kor. 15:58) Pakuti “nyengo yakukhalako yafupiskika,” tiyeni tipharazgire ŵanthu ŵanandi.—1 Kor. 7:29.
Kuti tichite vinandi mu uteŵeti, tikwenera kusintha nthowa zakupharazgira. Mwachiyelezgero, usange kanandi mukwenda nyengo yitali kwambura kupharazgira munthu, mungasintha nthowa yakupharazgira kuti mupharazgire ŵanthu ŵanandi. Vinthu vikupambana malo na malo. Ndipouli, masachizgo ghakulondezgapo agha ghangamovwirani kuti muchitenge vinandi na nyengo yinu mwakuti muleke “kutimba mu mphepo.”—1 Kor. 9:26.
Kupharazga ku Nyumba na Nyumba: Kanandi ŵapharazgi ŵakwamba kupharazga ku nyumba na nyumba. Ndipouli, pakuti ŵanthu ŵanandi ŵakugwira ntchito muhanya, chingaŵa chiwemi kupharazga ku nyumba na nyumba kumise apo ŵanthu ŵanandi ŵakuŵa pa nyumba. Muhanya tingapharazga mu misewu panji ku malo gha ntchito na gha bizinesi.
Kupharazga Uko Kuli Ŵanthu Ŵanandi: Mathebulu na mashelufu gha matayala vikwenera kuŵikika pa malo agho pakwenda ŵanthu ŵanandi mu chigaŵa cha mpingo winu. (Wonani Uteŵeti Withu wa Ufumu wa Julayi 2013, peji 5.) Usange pa malo agho mukuchitira upharazgi uwu sono pakwenda ŵanthu ŵanandi yayi, Komiti ya Uteŵeti ya Mpingo yingasankha malo ghanyake.
Maulendo Ghakuwelerako na Masambiro gha Baibolo: Mungasintha ndondomeko yinu kuti mulutenge ku maulendo ghakuwelerako na ku masambiro gha Baibolo pa nyengo iyo nthowa zinyake zakupharazgira zikuleka kwenda makora. Mwachiyelezgero, usange upharazgi wa ku nyumba na nyumba ukwenda makora pa Chisulo mulenji, mungaluta ku masambiro gha Baibolo kumise. Kweniso chingaŵa chiwemi kuti awo maulendo ghawo ghakuwelerako ghali kumoza, ŵendere lumoza kuti ŵachite vinandi mu uteŵeti.
Nangauli tikupenda nyengo iyo tikupharazgira, kweni tikukondwa chomene para tikuchita vinandi mu uteŵeti. Usange mwawona kuti nthowa yinyake yakupharazgira yikwenda makora yayi pa nyengo yinyake, yezgani nthowa yinyake. Lombani Yehova, uyo ni ‘Mwenecho wa vuna,’ kuti wamulongozgani mwakuti muchitenge vinandi mu uteŵeti.—Mat. 9:38.