Nthowa Yiphya Yakupharazgira Uko Kukusangika Ŵanthu Ŵanandi
1. Kasi mipingo iyo yili na malo agho kukusangika ŵanthu ŵanandi, yikuchiskika vichi?
1 Mipingo iyo yili na malo agho kukusangika ŵanthu ŵanandi yikuchiskika kuti yiyarenge mabuku pa thebulu panji pa shelufu ya matayala para yikupharazga ku malo agha. Para mukugwiliskira ntchito shelufu, pangaŵa mupharazgi yumoza uyo wakwenera kukhala pafupi. Kweni para mukugwiliskira ntchito thebulu pakwenera kuŵa ŵapharazgi ŵaŵiri. Awo ŵakuchita upharazgi uwu, ŵakwenera kuŵa ŵaubwezi. Usange munthu wiza apo pali mabuku, mupharazgi yumoza wangamba kudumbiskana nayo. Wangamufumba kuti, “Kasi Baibolo likuti wuli pa nkhani iyi?” Mupharazgi munyake wangapharazga pataliko na thebulu panji shelufu. Ndipouli, wakwenera kuwona ivyo vikuchitika apo pali mabuku.
2. Yowoyani icho chikachitika chifukwa cha kupharazga uko kukusangika ŵanthu ŵanandi.
2 Ŵanthu ŵanandi ŵamba kusambira Baibolo chifukwa cha upharazgi uwu. Mwana wa sukulu pa koleji yinyake wakakhumbanga kulemba vinthu vinyake vyakukhwaskana na Ŵakaboni ŵa Yehova, kweni wakatondeka kuti wasange Nyumba ya Ufumu pafupi. Sabata yakulondezgapo wakawona thebulu ilo ŵakayarapo mabuku pafupi na sukulu yake. Wakamba kusambira Baibolo. Sono wali kubatizika, ndipo nayo wakuchitako upharazgi uwu.
3. Kasi ŵapharazgi ŵanyake ŵakuti wuli na upharazgi uwu?
3 Mudumbu munyake uyo wakuchita upharazgi uwu wakati: “Ŵanthu ŵanyake ŵakwiza apo tayara mabuku na kutorapo magazini ghaphya. Ŵanyake ŵakuŵa kuti ŵandapulikepo za ŵakaboni ŵa Yehova. Nkhuwona kuti upharazgi uwu wovwirenge kuti tipharazgire ŵanthu ŵanandi.” Mudumbu munyakeso wakati: “Nthowa iyi njiwemi chomene chifukwa ŵanthu ŵakwiza ŵekha, nanga ni awo ŵakukhumba viŵi yayi.”
4. Chifukwa wuli ntchiwemi kuleka kusintha malo na nyengo yakuyalira mabuku?
4 Vikuŵa makora usange ŵapharazgi ŵakuleka kusintha malo, mazuŵa, na nyengo iyo ŵakuyalira mabuku. Para mwachita nthena, ŵanthu ŵakuzgoŵera, ndipo ŵakuŵa ŵakufwatuka kufumba mafumbo na kutora mabuku. Kasi mpingo winu uli na malo uko kukusangika ŵanthu ŵanandi? Usange ghaliko, mungagwiliskira ntchito nthowa yiphya iyi kuti ‘mupharazge kutali Ufumu wa Chiuta.’—Luka 9: 60.