Umo Mungachitira Pakupharazga na Thebulu Panji Shelufu ya Matayala

Upharazgi wa kuŵika mabuku pa thebulu panji pa shelufu ya matayala ukovwira chomene ŵanthu kuti ŵamanye unenesko. (Yoh. 6:44) Ntheura, ŵalara ŵakuchiskika kunozga ndondomeko yakuti mpingo upharazgenge uko kukusangika ŵanthu ŵanandi mu chigaŵa chawo. Ntchakukhumbikwa viŵi yayi kupempha dankha ku ŵalara ŵaboma chifukwa mabuku ghithu tikukhala nagho pa malo ghamoza yayi. Kasi mbanjani awo ŵangachitako upharazgi uwu? Mbapharazgi awo ŵakuchita vinthu mwamahara, ŵakuvwara mwantchindi, kweniso mbaluso pakuyowoya na ŵanthu. Musi umu muli ivyo tikwenera kuchita na ivyo tikwenera yayi kuchita.

Ivyo Tikwenera Kuchita:

Tiŵenge ŵaubwezi, tipokelerenge ŵanthu na kuŵawovwira. Ŵapharazgi ŵanyake ŵakumwemwetera na kutawuzga ŵanthu mwaubwezi. Para pakujumpha munthu uyo wakulaŵisiska pa mabuku ghithu, tingamuphalira kuti, “Mungatorapo lililose ilo mwakhumba.”
Tiyimenge pa malo ghakwenelera. Ku malo ghanyake, ŵapharazgi vikuŵayendera makora para ŵayima pataliko na apo ŵaŵika mabuku. Ŵapharazgi ŵanyake ŵawona kuti para ŵimilira pafupi, ŵanthu awo ŵakujumpha ŵakuchita soni kwiza apo pali mabuku. Ntheura ŵakwimilira pataliko. Para munthu wiza apo taŵika mabuku, tikwenera kudumbiskana nayo. Tingamufumba kuti, “Kasi muli kujifumbapo fumbo ili?”
Tigwiliskirenge ntchito Baibolo palipose apo mphakwenelera.
Tiŵaphalirenge awo ŵatora mabuku agho tikusambizgira ŵanthu Baibolo, nga ni Baibolo Likusambizgaci? kuti tikusambira Baibolo na ŵanthu na kuŵalongosolera umo tikuchitira. Tingaŵapempha kuti tiŵalongore vidiyo yakuti Chifukwa Wuli Mukwenera Kusambira Baibolo?
Para munthu ngwakunweka, tingamufumba uko wakukhala panji kupempha nambara ya foni yake. Para wakukhala mu chigaŵa chithu yayi, tilembe fomu ya Weleraniko kwa Munthu Uyu (S-43) na kupeleka kwa mulembi mwaluŵiro.