“Muŵe pa Mtende na Ŵanthu Wose”
1. Kasi ni ulongozgi wuli wa mu Baibolo uwo tingalondezga usange ŵanthu ŵatikwiyira mu upharazgi?
1 Ŵanthu ŵa Yehova ŵakutemwa mtende ndipo uteŵeti withu nawo ngwamtende. (Yes. 52:7) Kweni nyengo zinyake ŵanthu ŵakutikwiyira para tafika pa nyumba zawo. Usange vyaŵa nthena, kasi nchivici ico cingatovwira kuti tiŵe ŵamtende?—Rom. 12:18.
2. Cifukwa wuli tikwenera kuŵapulikiska awo tikuŵapharazgira para ŵatikwiyira?
2 Ŵapulikiskani: Ŵanyake ŵakukwiya cifukwa ca kukana unenesko, kweni ŵanji ŵakukwiya pa vifukwa vinyake. Nyengo zinyake cingaŵa cifukwa cakuti tiza pa nyengo yiheni. Panji cingaŵa cifukwa ca masuzgo agho ŵakukumana nagho. Para ŵatikwiyira cifukwa ca kutinkha unenesko, tikwenera kumanya kuti ŵakucita nthena cifukwa cakuti ŵali kupusikika. (2 Kor. 4:4) Usange tingaŵapulikiska, tiŵakwiyirenge yayi.—Zinth. 19:11.
3. Kasi tingacindika wuli awo tikuŵapharazgira?
3 Ŵacindikani: Ŵanandi awo tikuŵapharazgira ŵali na vigomezgo ivyo vili kukhomelera. (2 Kor. 10:4) Ŵali na wanangwa kutegherezga uthenga withu panji yayi. Nchiwemi yayi kuyuyura vigomezgo vyawo na kuwona nga ise ndise tikumanya vinandi kuluska iwo. Para ŵaticimbizga, nchiwemi kuwukapo mwanchindi.
4. Kasi tingayowoya wuli mwaubwezi?
4 Yowoyani Mwaubwezi: Usange ŵakutinena, tikwenera kuŵazgora mwakuzika kweniso mwaubwezi. (Kol. 4:6; 1 Pet. 2:23) M’malo mwakugazgana nawo, tikwenera kudumbiskana nkhani iyo tingakolerana. Nyengo zinyake tingaŵafumba cifukwa ico ŵakukanira. Panji tingaleka waka kudumbiskana kuti tileke kugazgana nawo.—Zinth. 9:7; 17:14.
5. Kasi pakuŵa uwemi wuli para tikuŵa ŵamtende mu uteŵeti?
5 Usange tili ŵamtende, uyo tikumupharazgira waluwenge yayi umo tazgolera, ndipo wangazakategherezga para munthu munyake wangazakamupharazgiraso. (Rom. 12:20, 21) Nangauli wangalutilira kususka, kweni zuŵa linyake wangazakaŵa mubali panji mudumbu. (Gal. 1:13, 14) Kwali wanwekenge na unenesko kwali yayi, tikucindika Yehova na kutozga cisambizgo cithu usange tikulutilira kujikora na kuŵa ŵamtende.—2 Kor. 6:3.