Tizamugaŵira Uthenga wa Ufumu Na. 38 mu Novembala!
1. Kasi ŵanthu ŵali na mafumbo wuli pa nkhani ya ŵakufwa? Ndipo ŵazamuzgoleka wuli mu Novembala?
1 Nyifwa ni mulwani wa waliyose. (1 Kor. 15:26) Ŵanandi ŵakufumba uko ŵakufwa ŵali kweniso usange tizamuŵawonaso. Lekani kwa mwezi wose, mipingo pa caru cose yizamugaŵira Uthenga wa Ufumu Na. 38, wa mutu wakuti “Kasi Ŵakufwa Ŵazamuwuka Nadi?” Upharazgi wapadera uwu uzamwamba pa Novembala 1. Para upharazgi uwu wamara, Uthenga wa Ufumu Na. 38 tizamugaŵira nga umo tikucitira na mathirakiti ghose.
2. Kasi thirakiti ili, lili kulembeka wuli?
2 Umo Liliri: Ndakuti tingalipeteka kuti pa peji lakwamba paŵe mutu na mazgu ghakuti “Kasi mungati . . . enya? yayi? kwali?” Para munthu wajura mukati, wazamuwona zgoro na vyandulo ivyo wangasanga cifukwa ca ivyo Baibolo likulayizga. Kweniso wazamuwona vifukwa vyakugomezgera Baibolo. Pa peji laumaliro pali fumbo lakuti waghanaghanirepo ilo lingamupangiska kuti waŵe na mtima wakukhumba kumanya vinandi.
3. Kasi tizamugaŵira wuli Uthenga wa Ufumu Na. 38?
3 Umo Tizamucitira Pakugaŵira: Tizamugaŵira uthenga uwu nga umo tikucitira para tikucemera ŵanthu ku Cikumbusko na ungano wa cigaŵa. Ŵalara ŵazamuyowoya umo mungacitira kuti mumalizge cigaŵa ca mpingo winu, kuyana na kalata ya Epulero 1, 2013 iyo ŵali kupokera. Mipingo iyo yili na cigaŵa cicoko yingawovwira mipingo yapafupi iyo yili na cigaŵa cikuru. Mukwenera kuzakatora Uthenga wa Ufumu Na. 38 uwo mungamalizga kugaŵa sabata yimoza. Para tamalizga kugaŵira nyumba na nyumba, tizamugaŵira ku malo uko kukusangika ŵanthu ŵanandi. Para mathirakiti ghose tamalizga pambere mwezi undamare, tizamugaŵira mabuku agho tikwenera kugaŵira mwezi uwo. Pa Cisulo cakwamba tizamugaŵira Uthenga wa Ufumu Na. 38, m’malo mwakwambiska masambiro gha Baibolo. Pa Cisulo na pa Sabata tizamugaŵiraso magazini apo mphakwenelera. Kasi mwanozgeka kuti muzakaciteko mwakukwana upharazgi wapadera uwu?