Sukulu ya Uteŵeti wa Chiuta ya 2015 Yikutovwira Kuti Tiŵe Ŵaluso Pakusambizga

¹ Wamasalimo Davide wakalemba kuti: ‘Mphanyi mazgu gha mu mulomo wane na ivyo nkhughanaghana mu mtima wane vyamukondweskani, A Yehova, Jalawe lane na Muwomboli wane.’ (Sal. 19:14) Nase tikukhumba kuti mazgu ghithu ghakondweskenge Yehova chifukwa tili na mwaŵi wapadera wakuyowoya unenesko mu mpingo kweniso mu upharazgi. Sukulu ya Uteŵeti wa Chiuta ni nthowa yimoza iyo Yehova wakutisambizgira umo tingapharazgira. Sukulu iyi, yikuchitika sabata yiliyose mu mipingo yakujumpha 111,000 pa charu chose chapasi. Yawovwira ŵabali na ŵadumbu pa charu chose kuti ŵasambizgenge makani ghawemi mwakukopa, mwaluso, kweniso mwachikanga.—Mil. 19:8; Kol. 4:6.

² Mu ndondomeko ya sukulu ya uteŵeti wa Chiuta ya 2015 muli nkhani zakufuma mu kabuku kakuti “Kodi M’Baibulo Muli Nkhani Zotani?” Kweniso ŵasintha nyengo ya fundo zikuru na nkhani Na. 1. Vinthu ivyo vyasintha pamoza na ulongozgi wa umo sukulu yikwenera kuchitikira, vyalembeka mu ndime zakulondezgapo izi.

³ Fundo Zikuru: Mubali wazamuyowoyapo fundo zake kwa maminiti ghaŵiri. Ndipo wakwenera kunozgekera mwakukwana kuti wazakayowoye fundo izo zingawovwira mpingo, ndiposo ivyo tikusambirapo mazuŵa ghano. Kufuma apo, maminiti 6 nga ŵategherezgi kuti ŵayowoyepo fundo zawo mwakudumura mu masekondi 30 panji kuchepera apa. Ŵategherezgi ŵakwenera kunozgekera kuti fundo yipulikikwe makora. Para ŵanozgekera makora vizamovwira ŵanji kuti nawo ŵazakayowoyepo fundo zawo.

⁴ Nkhani Na. 1: Nkhani yakuŵazga Baibolo yiŵenge ya maminiti ghatatu panji kuchepera apa. Awo ŵazamupika nkhani iyi ŵakwenera kuzakanozgekera mwakukwana kuti ŵazakaŵazge mwakupulikikwa makora, kweniso kuzunura makora mazgu umo ghali kulembekera. Ŵateŵeti wose ŵa Yehova ŵakwenera kuyezgayezga kuti ŵaŵazgenge makora, chifukwa ntchigaŵa chikuru cha kusopa kwithu. Ntchakukondweska chomene kuti ŵana ŵithu ŵanandi ŵakumanya kuŵazga. Tikumuwongani mwaŵapapi chifukwa mukovwira ŵana ŵinu kuti ŵaŵazgenge makora.

⁵ Nkhani Na. 2: Nkhani iyi yizamuŵa ya maminiti 5 ndipo yizamupelekeka kwa mudumbu. Msambiri wakwenera kuyowoya mutu uwo wapika. Para nkhani yafuma mu kabuku kakuti Kodi M’Baibulo Muli Nkhani Zotani?, msambiri wayezgelere upharazgi uwo ungaŵa wakovwira mu chigaŵa chawo. Kweniso waŵazge malemba agho ghakukolerana na mutu wa nkhani. Mulaŵiliri wa sukulu ndiyo wazamusankha movwiri.

⁶ Nkhani Na. 3: Nkhani iyi yizamuŵa ya maminiti 5 ndipo yizamupelekeka kwa mubali panji mudumbu. Usange yapika kwa mudumbu, yiyowoyeke nga ni Nkhani Na. 2. Para mubali ndiyo wazamuyowoya nkhani iyi, wayowoye nga ni nkhani. Msambiri wakwenera kuyowoya nkhani iyo wapika, kusankha malemba ghakwenelera, kweniso kuyowoya ivyo tikusambirapo.

⁷ Ulongozgi Uphya wa Nkhani Na. 3: Para nkhani yafuma mu kabuku kakuti Kodi M’Baibulo Muli Nkhani Zotani?, chiŵe chiyezgelero cha kulongora mbumba yikusopa panji yili mu upharazgi. Kanandi mulaŵiliri wa sukulu ndiyo wazamusora movwiri na mtundu wa chidumbirano. Movwiri wakwenera kuŵa yumoza wa mu mbumba ya uyo wachitenge chiyezgelero. Para vyasuzga mungasankha mubali waliyose mu mpingo. Mu chiyezgelero mungazakaŵazgapo malemba agho ghali na fundo izo zikukolerana na nkhani yinu. Kanandi ŵalara ndiwo ŵakwenera kuyowoya nkhani iyi. Ŵalara ŵangasankha ŵekha movwiri na chidumbirano. Mpingo uzamukhozgeka kuwona ŵalara ŵakusambizga mwaluso.

⁸ Ulongozgi: Mulaŵiliri wa sukulu wazamuyowoya kwa maminiti ghaŵiri pa ivyo msambiri wachita makora kweniso vifukwa ivyo wakumuwongera kufuma mu buku la Sukulu ya Uteŵeti. Mulaŵiliri wa sukulu wazamuyowoya yayi ulongozgi uwo msambiri walondezgenge pambere wandayowoye nkhani. Pa umaliro wa nkhani yiliyose, mulaŵiliri wa sukulu wakwenera kuwonga msambiri, kuyowoya ulongozgi uwo wangulondezga na kuyowoya ivyo wachita makora. kweniso walongosore uwemi wakulondezga ulongozgi.

⁹ Fomu ya ulongozgi kwa msambiri waliyose yili mu buku la Sukulu ya Uteŵeti, pa peji 79 m’paka 81. Pamanyuma pakuti msambiri wayowoya nkhani yake, mulaŵiliri wa sukulu wazamukumana nayo kumphepete na kumufumba usange wakachita ntchito iyo yili kuumaliro kwa mutu uwo ŵakapangana. Paumaliro wa maungano panji nyengo yinyake wangamuwonga msambiri kweniso kupeleka masachizgo ghanyake agho ghangawovwira msambiri. Msambiri wakwenera kuwonga ulongozgi uwo wakupokera chifukwa ungamovwira kuti wakure mwauzimu.—1 Tim. 4:15.

¹⁰ Para msambiri warya nyengo, imwe panji movwiri winu wakwenera kulongora chimanyikwiro, nga kugogoda panji kulizga ka belu. Msambiri wakwenera kumalizga sentesi yake na kuwukapo pa pulatifomu.—Wonani buku la Sukulu ya Uteŵeti, peji 282, ndime 4.

¹¹ Wose awo ŵakufiska ivyo vikukhumbikwa ŵangalembeska mu Sukulu ya Uteŵeti. (Wonani mu buku la Sukulu ya Uteŵeti peji 282 ndime 6.) Ivyo tikusambira mu sukulu ya uteŵeti vikutovwira kuti tipharazgenge na kusambizga makani ghawemi mwakusimikizga, mwa ntchindi, kweniso mwa chitemwa. Yehova wakukondwa na kulumbika para tikusanga chandulo na sukulu ya uteŵeti.—Sal. 148:12, 13; Yes. 50:4.