Gwiliskirani Ntchito Webusayiti ya jw.org Pakupharazga—“Ŵani Ŵabwezi ŵa Yehova.”

Pa Webusayiti ya jw.org pali chigaŵa chakuti “Ivyo Baibolo Likusambizga.” Pa malo agha pali chigaŵa cha ŵana chakuti “Ŵani Ŵabwezi ŵa Yehova.” Pali sumu, mavidiyo na vyakuti ŵana ŵachite. Kasi muli kugwiliskirapo ntchito chigaŵa ichi pakupharazga? Para mukusambira na mupapi uyo wali na ŵana ŵachoko, mungamulongora chigaŵa ichi. Ivi vingamovwira kuti wasangeso vinthu vinyake ivyo vili pa Webusayiti yithu.

Mwanakazi munyake wakamba kuŵazga thirakiti la Uthenga wa Ufumu Na. 38 ŵati ŵamupa waka. Wakaŵa na ŵana ŵachoko awo ŵakakondwa nalo thirakiti ili. Mubali wakalongosora pachoko waka ivyo vili mukati na kumulongora adiresi iyo yili kuumaliro kwa thirakiti ili. Pakuti wakakhumbanga kumanya vinandi, mubali wakamujulira yimoza mwa mavidiyo gha Kalebi pa foni yake.

Mudumbu wakajura Webusayiti yithu na kulongora munyake wakuntchito ivyo vingawovwira mbumba. Mama uyu wakajura Webusayiti ya jw.org pamoza na ŵana ŵake. Pamanyuma mama uyu, wakaphalira mudumbu kuti ŵana ŵake ŵakimbanga sumu yakuti “Pharazga Mazgu” yimoza mwa sumu izo zili pa chigaŵa chakuti “Ŵani Ŵabwezi ŵa Yehova.”

Mphanyi tose tachimanya makora chigaŵa ichi na kukopera mavidiyo, sumu, panji vinthu vinyake pa foni panji pa kompyuta yithu. Ntheura tiŵenge na mwaŵi wakulongora ŵanji para tikupharazga. Webusayiti yithu yikutovwira nadi kuteŵetera nga mbazga ŵa Fumu.—Mil. 20:19.