Ivyo Vingatovwira Kuti Tiŵe Ŵaluso Mu Uteŵeti​—Kupharazga Kwizira pa Kamera Panji Intakomu

CHIFUKWA WULI NTCHAKUZIRWA: Mazuŵa ghano tekinoloje yaluta panthazi, kweniso ŵanthu ŵanandi ŵakukhala mwawofi. Ivi vyapangiska kuti pa nyumba zawo ŵaŵikengepo makamera panji intakomu, na chilato chakuti para kwiza munthu wachilendo, ŵamuwonenge na kudumbiskana nayo kwambura kujurako ku mulyango. Nyengo zinyake tingafwatuka yayi kupharazgira munthu uyo wakutiwona kweni ise tikumuwona yayi. Fundo zakulondezgapo izi, zitovwirenge umo tingapharazgira makora pa kamera panji pa intakomu.

UMO TINGACHITIRA:

• Kujikayikira yayi. Ŵanthu ŵanandi awo ŵali na kamera panji intakomu pa nyumba zawo, ŵakuŵa ŵakunweka kuyowoya nase

• Kumbukani kuti makamera ghanyake ghakwamba kujambura ivyo mukuchita panji kuyowoya pambere mundafike pafupi chomene na nyumba. Ndipo mweneko nyumba wangamba kupulika ivyo mukuyowoya panji kumuwonani pambere mundagogode

• Para mweneko nyumba wazgora, yowoyani uku mukulaŵiska kamera panji intakomu nga ni para mukuyowoya nayo maso na maso. Mumwemweterenge na kuchita majesicha mwakawiro. Yowoyani nga umo mwate muyowoyerenge mweneko nyumba wafumenge pawaro. Lekani kusendelera kufupi chomene na kamera. Para mweneko nyumba wakuzgora yayi, kuleka uthenga uliwose yayi

• Nanga ni para mwamara kudumbiskana, kumbukani kuti mweneko nyumba wangaŵa kuti wachali kumuwonani kweniso kumupulikani para mukuyowoya. Ntheura mukwenera kuŵa maso na ivyo muyowoyenge