Weleranimo Fundo Zikuru

Kasi vili kumusuzganipo kukumbukira ivyo mwaŵazga waka? Vyanthena ivi vikuchitikira waliyose wa ise nyengo na nyengo. Kasi ntchivichi chingamovwirani? Weleranimoso fundo zikuru.

Para mukusambira, muyimengeyimenge kuti musange fundo izo ni zakuzirwa chomene. Wonani umo mpositole Paulosi wakawovwilira awo ŵakaŵazganga kalata yake umo ŵangachitira nthena, apo wakalemba kuti: “Sono fundo yikuru pa ivyo tikuyowoya njakuti.” (Heb. 8:1) Na mazgu agha wakawovwira ŵategherezgi ŵake kuti ŵapulikiske ivyo wakang’anamuranga kweniso umo fundo yiliyose yikukolerana na fundo yake yikuru.

Mungapaturapo nyengo, panji maminiti 10 gha kuumaliro kwa sambiro linu, na chilato chakuti mughanaghanirepo pa fundo zikuru izo mwasambira. Para mukukumbukira yayi fundo zikuru, wonaniso mitu yichokoyichoko panji masentesi agho ghakuyowoya fundo zikuru—kanandi ghakuŵa pakwambilira pa ndime—kuti vimovwirani kukumbukira. Para mwasambira fundo yiphya, yezgani kuyilongosora mu mazgu ghinu na ghinu. Para mukuweleramo fundo zikuru, vimovwiraninge kuti muzikumbukire waka yayi, kweni vimovwiraningiso kuti muzipulikiske makora na kuwona umo mungazigwiliskira ntchito pa umoyo winu.