SAMBIRO 14

Kupangiska Fundo Zikuru Kumanyikwa

Ŵahebere 8:1

FUNDO YIKURU: Wovwirani ŵategherezgi ŵinu kulondezga nkhani yinu, ndipo longorani makora umo fundo yiliyose yikukolerana na mutu kweniso chilato cha nkhani yinu.

UMO MUNGACHITIRA:

Ŵani na chilato. Manyiranithu chilato cha nkhani yinu usange nkhumanyiska waka ŵategherezgi, kuŵakhorweska, panji kuŵachiska, ndipo pamasinda yiyowoyani kuyana na chilato chake. Woneseskani kuti fundo zinu zikuru zikumovwirani kuti mufiske chilato chinu.

Jifumbani kuti: ‘Kasi ni mafumbo wuli agho ŵategherezgi ŵangaŵa nagho pa nkhani iyi, ndipo ni fundo wuli izo ŵakuzimanya kale? Kasi mafumbo agha ŵangaghafumba wuli?’ Paumaliro, ŵikani fundo zinu kuti zikawovwire ŵategherezgi ŵinu kuyilondezga makora nkhani yinu, kuyipulikiska na kuchitapo kanthu.
Didimizgani iyo ni fundo yikuru. Zunurani fundo yinu yikuru apo mukudumba nkhani. Kuti muchite ivi, mukwenera kuwerezga fundo zikuru za mutu wa nkhani.
Longosorani fundo zinu zikuru mwakupulikikwa makora kweniso munthowa yipusu. Sankhani fundo izo zikukolerana na fundo yikuru ya nkhani yinu kweniso izo mungasambizga makora pa nyengo iyo mwapika. Chepeskaniko fundo zinu zikuru, zizunurani mwakupulikikwa makora, pumulirani pa fundo yiliyose, ndipo lutani pa yinyake mwakupulikikwa makora.

Mungazunura fundo zikuru mu mazgu ghinu ghakwamba kuti muwovwire ŵategherezgi kulondezga nkhani yinu, panji mungaziwerezga kuumaliro wa nkhani yinu kuti movwire ŵategherezgi kuzikumbukira.