Kupatawula Mutu wa Nkani

ŴAYOWOYI ŵaluso ŵakumanya kukhumbikwa kwakuŵa na mutu wa nkani. Para ŵakunozgekera nkani, mutu wa nkani ukuŵawovwira kuti ŵaŵike pwererero likuru ku ivyo nkani yawo yikuyowoya na kughanaghanirapo comene pa iyo. Uweme wake ngwakuti m’malo mwa kuyowoya waka fundo zinandi, iwo ŵakupatawula nkani yawo mu ntowa iyo yingaŵa ya candulo comene ku ŵategherezgi ŵawo. Usange fundo zose zikuru zikukolerana na mutu wa nkani ndiposo usange zikovwira kuti mutu upulikikwe makora, ŵategherezgi ŵakovwirika kukumbukira fundo izo na kumanya kuzirwa kwake.

Nangauli kukuyowoyeka kuti mutu wa nkani ndiwo ni cinyina ca nkani yinu, muzamuwona kuti nkani zinu zizamuŵa ziweme comene usange vyose ivyo mukuyowoya vikuŵa vyakukolerana na mutu uwo mukuwupatawula. Ufumu wa Ciuta, Baibolo, na ciwuka ni mitu yikuru. Kufuma ku mitu iyi tingalemba mitu ya nkani na kuyipatawula. Pano pali viyerezgero vya mitu yanteura iyo: “Ufumu wa Ciuta Ni Boma Leneko,” “Ufumu wa Ciuta Wuzamuzgora Caru Kuŵa Paradiso,” “Baibolo Ndakufunyilirika na Ciuta,” “Baibolo Ni Buku la Urongozgi Uweme Mazuŵa Ghano,” “Ciwuka Cikupereka Cilindizga kwa Awo Ŵakutengera,” na “Kugomezga Ciwuka Kukutovwira Kuti Tirutilire Kuŵa Ŵakukhora Usange Takumana na Ntambuzgo.” Wuliwose mwa mitu iyi ukukhumba kuti upatawulike na fundo zakupambana-pambana.

Mwakukolerana na mutu wukuru wa mu Baibolo, upharazgi wa Yesu Kristu panyengo iyo wakaŵa pacaru capasi ukazikika pa mutu wakuti: “Ufumu wa kucanya waneng’enera.” (Mat. 4:17) Kasi mutu uwu ukapatawulika wuli? Ufumu ukuzunurika kwa nyengo zakujumpa 110 mu mabuku ghanayi gha Makani Ghaweme. Kweni Yesu wakacita vinandi kuruska kugwiriskira waka ncito mwakuwerezga-werezga lizgu lakuti “ufumu.” Kwizira mu ivyo wakasambizganga na vyakuziziswa ivyo wakacitanga, Yesu wakarongora pakweru kuti iye mwene wakaŵa Mwana wa Ciuta, Mesiya, mweneuyo Yehova wazamumupa Ufumu. Yesu wakarongoraso kuti kwizira mwa iye, ntowa yakuti ŵanji ŵatoremo cigaŵa mu Ufumu uwu yili kujulika. Iye wakayowoyaso mikhaliro iyo yikwenera kurongoreka na awo ŵazamupika mwaŵi uwu. Kwizira mu visambizgo vyake na milimo yikuru iyo wakacitanga, Yesu wakarongora pakweru ivyo Ufumu wa Ciuta ukung’anamura mu umoyo wa ŵantu. Iye wakayowoyaso pakweru kuti kufumiska viŵanda mu ŵantu mwakugwiriskira ncito mzimu wa Ciuta kukaŵa cirongolero cakuti ‘Ufumu wa Ciuta uli kwiza kale pa awo ŵakupulika mazgu ghake.’ (Luka 11:20) Yesu wakayowoyanga za Ufumu uwu apo wakatuma ŵasambiri ŵake kukapharazga.—Mat. 10:7; 24:14.

Kusanka Mutu Wakwenelera. Kuti mukukhumbikwira kupatawula mutu wa nkani yinu mwakuyana ndendende na umo Baibolo likucitira cara, kweni kuŵa na mutu wakwenelera nkhwakukhumbikwa comene.

Usange ndimwe musankhenge mutu wa nkani, cakwamba manyani cilato ca nkani yinu. Ndipo para mukusanka fundo zikuru-zikuru zakuti ziŵe mu autilayini yinu, woneseskani kuti fundo izo zikukhozgera nadi mutu uwo mwasanka.

Usange mwapika mutu wa nkani, sandani mwakupwererera ivyo mutu uwo ukumuphalirani na kuwona umo mukwenera kulembera nkani yinu. Kuŵikapo mtima pa nkani yinu kungakhumbikwa mwakuti mumanye kuzirwa kwa mutu uwo. Usange musankhenge mwekha buku lakuti mutoremo fundo zakukhozgera mutu uwo mwapika, mukwenera kusanka fundo mwakupwererera mwakuti zileke kutimbanizga mutu uwo. Kulwande linyake, usange mwaphalirika buku lakuti mutoremo nkani yinu, mukweneraso kusanka fundo izo zikukolerana na mutu wa nkani. Mukweneraso kughanaghanira cifukwa ico nkani iyo yiliri yakukhumbikwira ku ŵategherezgi ŵinu na umo mukwenera kuyiyowoyera. Ici cizamumovwirani kuti mumanye fundo zakukhumbikwira kudidimizga panyengo iyo mukuyowoya nkani yinu.

Umo Mungadidimizgira Mutu wa Nkani. Kuti mudidimizge mutu wa nkani mwakwenerera, mukwenera kunozgerathu vyose panyengo iyo mukusanka fundo za mu nkani yinu. Usange fundo zose izo mwasanka zikukolerana na mutu wa nkani ndipo usange mwarondezga urongozgi wa umo mungalembera autilayini yiweme, ncakuwonekerathu kuti muzamudidimizga mutu wa nkani yinu.

Kuyowoya mutu wa nkani mwakuwerezga-werezga kungovwira kuti uleke kuluwika. Mu sumu zinandi izo ŵantu ŵakwimba, mutu wa sumu ni mazgu panji ving’wenyeng’wenye ivyo vikwimbika mwakuwerezga-werezga mwakuti zina panji mutu wa sumu iyo umanyikwe. Nyengo zose kapulikikwiro kake kakuŵa kamoza pera cara. Nyengo zinyake lizgu limoza panji mazgu ghaŵiri ndiyo ghakuzunurika, nyengo zinyake mutu uwo ukuzunurika mu mazgu ghanyake kweni ng’anamuro lake likuŵa limoza nipera, muntu uyo wata sumu iyo wakwimba mwaluso comene kuti mutu wa sumu iyo umanyikwe. Umu ndimoso vikwenera kuŵira na mutu wa nkani. Kuyowoya mwakuwerezga-werezga fundo zakukhozgera mutu wa nkani yinu kukuyana waka na kwimba mwakuwerezga-werezga kolasi la sumu. Mazgu ghakukolerana na mutu wa nkani ghakovwira kuti mutu wa nkani udidimizgike. Kucita mwanteura kuzamupangiska kuti ŵategherezgi ŵinu ŵaleke kuluwa mutu uwo.

Urongozgi uwu ukugwira ncito para muli na nkani yakuyowoya pa pulatifomu pera cara, kweniso para muli mu uteŵeti wa m’munda. Upharazgi wakudumura ukuŵa wambura kuluwika usange mutu wa nkani wadidimizgika. Urongozgi uwo ukuperekeka pa sambiro la Baibolo uzamuŵa wambura kuluwika usange mutu wadidimizgika. Kuyezgayezga kwinu pa kusanka na kupatawula mitu yakwenerera ya nkani kuzamurutiska pantazi luso lwinu nga ni muyowoyi na musambizgi wa Mazgu gha Ciuta.