IVYO ŴACHINYAMATA ŴAKUFUMBA
Kasi Nileke Waka Sukulu?
“Nkhuyitinkha sukulu!” Para namwe ndimo mukujipulikira, mbwenu mungayezgeka kuti muleke waka sukulu. Nkhani iyi yili na fundo zinyake izo zingamovwirani chomene.
Chifukwa icho ŵanyake ŵakulekera sukulu
Nkhwantha za masambiro zili kusanga kuti vifukwa vinyake ni ivi:
Kutondeka kuchita makora mu kilasi. ‘Nkhutondeka kuchita makora ndipo magiredi ghane ngawemi yayi.’
Mphwayi. ‘Nkhuwona kuti sukulu yilije phindu.’
Ukavu. ‘Nkhwenera kugwira ntchito kuti nisangire vyakukhumbikwa ŵamumbumba yakwithu.’
Ghanaghanirani vyakufumapo vyake
Baibolo likuti: “Wakuchenjera wakulanguruka pa mendero ghake ghose.” (Zintharika 14:15) Sambiro ndakuti wuli? Para mukukhumba kuleka sukulu mukwenera kumanya vyakufumapo vyake.
Jifumbani kuti:
‘Kasi para naleka sukulu, vikhwaskenge wuli mwaŵi wakuti nizakasange ntchito kunthazi?’
“Ghanaghanirani fundo yakuti kunthazi muzamukhumbikwira kusanga ntchito na kupenja vyakukhumbikwa vya mbumba yinu. Kasi mungazakayisanga wuli ntchito para sukulu mwayilekera panthowa apo mabwana ghanandi ghakukhumba ŵanthu awo sukulu ŵali kulutako nayo patali?”—Julia.
‘Para naleka sukulu, kasi nizamukwaniska kumarana na masuzgo munthazi?’
“Sukulu yikukusambizga umo ungazakakhalira munthazi. Kunthazi uku, ŵanthu awo wamukumana nawo, viyezgo ivyo ungazakakumana navyo, na ntchito iyo uzamugwiranga vingazakayana waka na ivyo ukukumana navyo ku sukulu.”—Daniel.
‘Kasi para naleka sukulu nizamuŵa nagho maluso ghakukhumbikwa paulara?’
“Pasono sukulu yingawoneka nga kuti yilije ntchito, kweni para uli na vyaka 23 ndipo ukukhumba kulemba bajeti, apo ndipo ukukumbuka kuti, ‘Mwaŵi nkhapulikiska apo nkhasambiranga masamu.’”—Anna.
Nthowa yiwemi
Pemphani wovwiri. Baibolo likuti: “Vinthu vikwenda makora para pali ŵakupeleka fundo ŵanandi.” (Zintharika 11:14) Para magiredi ghinu ghamba kukhira, pemphani wovwiri ku ŵapapi ŵinu, asambizgi ŵinu, awo ŵakusambizga ŵanthu umo ŵangachitira vinthu, panji kwa munthu mulara uyo mukumugomezga.
“Dumbiskanani na asambizgi ŵinu para vinyake vikumusuzgani. Nyengo zinyake mungawona nga kuti suzgo mbasambizgi ŵinu, kweni kanandi vikuŵa makora para mwapempha wovwiri.”—Edward.
Ghanaghanirani umaliro wake. Baibolo likuti: “Umaliro wa chinthu nguwemi kuluska wambiro wake.” (Mupharazgi 7:8) Para mwamalizga sukulu, mukuŵa kuti mwasambira makhaliro kweniso maluso agho ghangamovwirani pa umoyo winu.
“Para wamalizga sukulu ndipo ndiwe mulara ukulembaso ntchito ya ku sukulu yayi panji kuŵerenga kuti ulembe mayeso, kweni ivyo ukachitanga pakumarana na kufyenyeka na vyakuchita vya sukulu vikovwira kuti kunthazi uzakaleke kusuzgika chomene maghanoghano para wasangana na masuzgo.”—Vera.
Kulekera sukulu panthowa vikuyana waka na kukhira boti pambere lindayime; mungamba kudokera kuti mphanyi mwangukhala dankha mu boti!
Ghanaghanirani dankha ivyo mukukhumba kusankha. Baibolo likuti: “Wose awo ŵakuchimbilira pakuchita vinthu ŵakavukenge.” (Zintharika 21:5) Lekani kuchimbilira kuti kuleka sukulu ndiyo nthowa yekha yiwemi. Nyengo zinyake mungalutilira kusambira uku muli ku nyumba kwinu kwizira pa intaneti panji nthowa zinyake.
“Sukulu yikukusambizga kuti ulimbikirenge pakuchita vinthu, kumarana na masuzgo, kweniso kukolerana na ŵanyako. Uwemi wa sukulu ukumara yayi. Ntheura ntchiwemi chomene kumalizga sukulu.”—Benjamin.
Fundo yikuru: Malizgani sukulu ndipo musambirenge vinandi ivyo vizamumovwirani para mwafika paulara.