CHARU CHAZURA NA MASUZGO

3 | Vikilirani Ubwezi Winu

CHIFUKWA WULI NTCHAKUZIRWA?

Apo ŵanthu ŵakwenjerwa chifukwa chakuti masuzgo ghazura mu charu, ŵanandi ŵakuzerezga ŵabwezi ŵawo.

Ŵanthu ŵanyake ŵakuleka kuchezga na ŵabwezi ŵawo.
Ŵakutorana ŵakulutilira kuleka kuchitirana vinthu mwalusungu.
Ŵapapi ŵakuŵikako mahara viŵi yayi ku masuzgo gha ŵana ŵawo.

Ivyo Mukwenera Kumanya

Ŵabwezi mbakukhumbikwa chifukwa ŵangatovwira kuti tiŵe na umoyo uwemi, kweniso tighanaghanenge makora, chomenechomene panyengo ya masuzgo.
Kusuzgika maghanoghano uko kungaŵapo chifukwa cha masuzgo, kungapangiskaso masuzgo ghanyake mu banja.
Vinthu ivyo ŵana ŵinu ŵangapulika panji kuwona pa nyuzi, vingaŵatimbanizga chomene maghanoghano kuluska umo imwe mukughanaghanira.

Ivyo Mungachita Pasono

Ivyo Baibolo Likusambizga: “Mubwezi wanadi wakutemwa nyengo zose, ndipo ni mubali uyo wali kubabikira kovwira mu suzgo.”—Zintharika 17:17.

Ghanaghanirani za munthu uyo wakumovwirani na kumupani ulongozgi wakovwira. Kumanya fundo yakuti pali munthu munyake uyo wakumughanaghanirani vingamupani nkhongono kuti muzizipizge para mwasangana na suzgo.

UMO MUNGACHITIRA—Fundo Zakovwira

Mu nyengo ya masuzgo, mungavikilira ubwezi winu mwakulondezga fundo zakovwira izi

KHOZGANI NTHENGWA YINU

Khozgani nthengwa yinu

Ivyo Baibolo Likuyowoya: “Ŵaŵiri ŵakuluska yumoza . . . Usange yumoza wawa, munyake wamuwuskenge.” (Mupharazgi 4:9, 10) Ŵakutorana ŵakwenera kuchita vinthu nga umo wakwendeska ndege na movwiri wake ŵakuchitira. Ŵaleke kuŵa nga ni awo ŵakwendeska ndege za nkhondo awo waliyose wakulimbana kuti wawiske ndege ya munyake.

Ŵikanipo mtima kuti ivyo mukwenjerwa navyo vileke kumalira kwa munyinu. Yezgani kuŵa ŵakuzikira.
Mudumbiskanenge na munyinu pa suzgo ilo mwasangana nalo. Kumbukani kuti chilato chinu nkhumazga suzgo ilo lilipo, kulimbana na uyo wapangiska yayi.
Musangenge nyengo yakuchitira vinthu pamoza ivyo mose mukukondwa navyo.
Yowoyani za vinthu vyakukondweska ivyo mukachitirapo lumoza kumasinda, mungawona vithuzi vya ukwati winu panji vinthu vinyake vyakukondweska.

“Ŵakutorana ŵangakolerana pa chilichose yayi. Kweni ichi chikung’anamura kuti ŵangatondeka kuchitira vinthu pamoza yayi. Ŵakutorana ŵangasankha vyakuchita pamoza, na kuchita vinthu mwakukolerana kuti ivyo ŵasankha vichitike.”—David.

KHOZGANI UBWEZI WINU

Khozgani ubwezi winu na ŵanyinu

M’malo mwa kupokera waka wovwiri kufuma ku ŵabwezi ŵinu, namwe ghanaghanirani umo mungaŵawovwilira. Para mukukhozga ŵanji, ndikuti mukujikhozgaso mwaŵene.
Muyowoyeskanenge na ŵabwezi ŵinu ŵanyake zuŵa lililose kuti muwone umo vinthu viliri kwa iwo.
Mungaŵafumba ŵabwezi ŵinu umo ŵakuzizipizgira masuzgo ghakuyanako na ghinu.

“Para wamunthu wakumana na masuzgo, ŵabwezi ŵangakovwira. Nyengo zinyake ŵangakukumbuska waka vinthu ivyo ukuvimanya nakale. Ŵabwezi ŵakukughanaghanira, ndipo nawo ŵakumanya kuti ukuŵaghanaghanira.”—Nicole.

MUWOVWIRENGE ŴANA ŴINU

Wovwirani ŵana ŵinu

Ivyo Baibolo Likuyowoya: ‘Mupulikenge luŵiro, muzikirenge pakuyowoya.’ (Yakobe 1:19) Pakwamba ŵana ŵinu ŵangachita wofi kuti ŵayowoye ivyo vikuŵasuzga, kweni para mukuŵategherezga mwakuzikira, mungaŵawovwira kuti ŵayowoye mwakufwatuka.

Ŵawovwirani ŵana ŵinu kuti ŵafwatukenge kuyowoya masuzgo ghawo kwambura wofi. Ŵana ŵanyake ŵakufwatuka kuyowoya chinthu para ŵakwenda, kwali ni mu galimoto panji pasi, kuluska para ŵakhala waka pasi na ŵapapi ŵawo kuwonana maso na maso.
Woneseskani kuti ŵana ŵinu ŵaleke kuwonelera chomene nkhani izo zingaŵatimbanizga maghanoghano.
Ŵaphalirani ŵana ŵinu ivyo mukuchita kuti mose muŵe ŵakuvikilirika mu banja linu.
Nozgekerani umo mungachitira para kungachitika vinthu vyamabuchi, ndipo ŵasambizgani ŵana ŵinu umo nawo ŵangachitira.

“Muyowoyenge nawo ŵana ŵinu, ndipo nawo ŵapani m’pata kuti ŵayowoyengepo umo ŵakujipulikira. Nyengo zinyake ŵangatondeka kumuphalirani vinthu vinyake ivyo ŵakopa, ivyo ŵakufipa navyo mtima, panji ivyo vikuŵakwiyiska. Ŵaphalirani kuti namwe nyengo zinyake mukusuzgikanga navyo vinthu vyanthena, ndipo ŵaphaliraniso umo mukuchitira kuti mumazge vinthu ivyo vikumusuzgani.”—Bethany.