Kudidimizga Fundo Zikuru

MUYOWOYI waluso wakuwona vinandi kuruska kuwona waka sentensi, ndipo wakuwonaso kujumpa pa ndime iyo mukusangika sentensi iyo. Para wakuŵazga, wakumanya fundo zikuru zose izo zili mu nkani iyo wakuyowoya. Kumanya uku kukuwovwira kudidimizga mazgu agho ngakwenelera.

Usange kaŵazgiro aka kandalondezgeke, mbwenu fundo zikuru zimanyikwenge yayi mu nkani yinu. Palije ico cingapulikikwa. Para mwamara kuyowoya nkani yinu, ciŵenge cakusuzga kukumbukira izo zanguŵa fundo zikuru.

Kudidimizga makora fundo zikuru kungapangiska kuti nkani yakufumira mu Baibolo yipulikikwe makora. Kudidimizga makora fundo kwanteura uku nkhwakuzirwa para mukuŵazga ndime pa sambiro la Baibolo panji pa ungano wa mpingo. Ndiposo nkhwakuzirwa comene para mukuyowoya nkani yakucita kuŵazga, nga ndi umo nyengo zinyake kukuŵira pa maungano gha cigaŵa.

Umo Mungacitira. Nyengo zinyake mungapika nkani yakuŵazga cigaŵa cinyake mu Baibolo mu sukulu. Ncici ico cikwenera kudidimizgika? Usange apo mukuŵazga pali fundo yakuzirwa panji pakuyowoya za cakucitika cakuzirwa, cingaŵa ciweme kuti pakuŵazga mudidimizge vigaŵa ivi kuti fundo zimanyikwe.

Kwali cigaŵa ico muŵazgenge calembeka nga ndi sumu panji nkani, nkani yakulembeka mwakudumura panji mwakurongosora, imwe mukwenera kuyiŵazga makora kuti ŵategherezgi ŵinu ŵayipulikiske makora. (2 Tim. 3:16, 17) Kuti muyiŵazge makora, mukwenera kughanaghanira umo nkani yinu yalembekera na kughanaghaniraso ŵategherezgi.

Usange mwamuŵazga mwakukwezga pa sambiro la Baibolo panji pa ungano wa mpingo, kasi ni fundo zikuru zini izo mukwenera kukazididimizgira? Yawonani mazgoro gha mafumbo agho ghali mu cakupharazga ico mukuŵazga kuŵa fundo zikuru. Mwakusazgirapo, didimizganiso fundo izo zikukhozgera mutu ucoko uwo walembeka na malembo ghafipa mu nkani iyo mukuŵazga.

Nciweme yayi kuyowoya nkani pampingo mwakucita kuŵazga. Ndipouli, nyengo zinyake nkani zakucita kuŵazga zikuperekeka kuti ziyowoyeke pa ungano wa cigaŵa mwakuti fundo ziperekeke mu ntowa yakuyana waka pa maungano gha cigaŵa ghose. Anteura, kuti fundo zikuru zididimizgike mu nkani yakucita kuŵazga, muyowoyi wakwenera kuyimanya danka makora nkani iyo. Kasi fundo zikuru ni zini? Iye wakwenera kuzimanya. Fundo zikuru kuti ndi mazgu agho iye wakughanaghana kuti ngakukondweska yayi. Kweni ni mazgu agho ghakurongosora fundo izo nkani iyo yazikikikapo. Nyengo zinyake mazgu ghafupi waka agho ghali mu fundo yikuru mu nkani yakucita kuŵazga ndigho ghakurongozgera apo pali fundo yikuru ya nkani iyo. Kwa nyengo zinandi, mazgu ghakuti mudidimizge ghakulembeka pamanyuma pakuti maukaboni ghakukhozgera fundo yikuru yaperekeka. Para fundo zikuru izi zamanyikwa, muyowoyi wakwenera kugwara mizere kusi kwa fundo izi mu nkani yake yakucita kuŵazga. Kanandi fundo zikuru zikuŵa zicoko, mutepanji zinayi panji zinkondi. Pamanyuma pake iye wakwenera kuyezgelera kuŵazga mwa ntowa yakuti ŵategherezgi ŵakazimanye makora fundo izo. Nkani yose yagona pa fundo izi. Para nkani iyo yingayowoyeka makora, mbwenu ciŵenge cipusu kuti fundo zikuru za nkani iyo zikumbukirike. Muyowoyi waliyose wakwenera kuŵa na cilato canteura ici.

Pali ntowa zakupambana-pambana izo muyowoyi wangazigwiriskira ncito kuti wadidimizgire fundo mwakwenelera kuti ŵategherezgi ŵamanye fundo zikuru. Pano tiyowoyengepo zicoko waka. Iye wangathukutera comene para wafika pa fundo yikuru, wangayowoya mwapacokopacoko, wangayowoya mwakuzikitizga panji wangadidimizga fundo mwakurongora na mawoko.