Kuthukutera

KUTHUKUTERA kukupangiska kuti nkani yiŵe yakukondweska. Nangauli kuyowoya nkani yakupereka cimanyisko nkhwakuzirwa, kweni ndipouli, nkani iyo yikuyowoyeka mwakuthukutera ndiyo yikukondweska ŵategherezgi. Mwambura kupwerererako za kaŵiro kinu, namwe mungayamba kuyowoya nkani mwakuthukutera.

Yowoyani na Mtima Wose. Apo wakayowoyanga na mwanakazi Musamariya, Yesu wakayowoya kuti awo ŵakusopa Yehova ŵakwenera kumusopa “mu mzimu na mu unenesko.” (Yoh. 4:24) Kasopero ka ŵantu ŵanteura awo kakwenera kukhuŵirizgika na mitima yakuwongera ndiposo na kukolerana na unenesko uwo ukusangika mu Mazgu gha Ciuta. Para muntu wali na mtima wakuwongera wanteura uwo, kayowoyero kake kakuvumbura ukhaliro uwu. Iye wakuŵa wakunweka kuti waphalire ŵanji ntowa zacitemwa za Yehova. Kawonekero ka cisko cake na mazgu ghake virongorenge umo iye wakujipulikira mwakukolerana na ivyo wakuyowoya.

Ncifukwa wuli nyengo zinyake muyowoyi uyo wakutemwa Yehova wakuyowoya mwambura kuthukutera? Nivinandi ivyo vikunjizgikamo pakuyowoya nkani kuruska kunozgekera waka ivyo vyamuyowoyeka. Muyowoyi wakwenera kuyimanya makora nkani yake, enya, maghanoghano ghake ghakwenera kunjizgikamo. Tiyerezgere kuti wamuyowoya nkani yakukhwaskana na sembe ya ciwombolero ya Yesu Kristu. Para muyowoyi wakuyowoya nkani yake, maghanoghano ghake ghakwenera kunjizgikamo, mwakuŵa na cimanyisko pera yayi, kweni waghanaghanire vyandulo ivyo iye pamoza na ŵategherezgi ŵake ŵazamuvisanga cifukwa ca sembe ya Yesu. Iye wakwenera kuwongera kwa Yehova Ciuta na kwa Yesu Kristu cifukwa ca cawanangwa ca mtengo wapacanya ici. Iye wakwenera kughanaghanira za cilindizga ciweme comene ico ŵantu ŵali naco—kuŵa na cimwemwe camutatakuya na umoyo uweme mu paradiso wakunozgekaso wa caru capasi! Anteura, iye wakwenera kuyowoya cimanyisko cose ici na mtima wake wose.

Pakuyowoya za mulembi Ezra, uyo wakaŵa musambizgi mu Israyeli, Baibolo likuyowoya kuti ‘wakaŵikapo mtima wake kupenjiska dango la Yehova na kulicita, na kusambizga vilayizgo vyake na maweruzgo ghake mu Israyeli.’ (Ezra 7:10) Usange ise nase tingacita nteura—kunozgekera cimanyisko ico tamuyowoya na kuŵikapo mtima, mbwenu tamuyowoya mwakufumira pasi pa mtima. Kuyowoya unenesko mwakufumira pasi pamtima kwanteura uko kungawovwira comene ŵategherezgi ŵithu kuti ŵayambe kutemwa unenesko.

Ghanaghanirani Ŵategherezgi Ŵinu. Mwakusazgirapo, kuti muyowoye mwakuthukutera, mukwenera kupanikizga kuti ŵategherezgi ŵinu ŵakukhumbikwira nadi kupulika ivyo mwamuyowoya. Ici cikung’anamura kuti, para mukunozgekera nkani yinu, munganozgekeranga waka cimanyisko ico mwamuyowoya yayi, kweniso rombani urongozgi kwa Yehova kuti mukayowoye nkani yinu mu ntowa yakuti ŵategherezgi ŵakasange nayo candulo. (Sal. 32:8; Mat. 7:7, 8) Sandani na kumanya cifukwa ico ŵategherezgi ŵinu ŵakwenera kupulika cimanyisko ico mwamuyowoya, umo ŵamusangira naco candulo, ndiposo ntowa iyo mungakayowoyera kuti ŵakamanye kuzirwa kwake.

Nozgekerani makora nkani yinu ndipo wonani fundo zakukondweska. Kuti nkani yiŵe yakukondweska, kuti cikuthemba pakuŵa yipya yayi, kweni ntowa iyo mwamuyowoyera ndiyo yingapangiska kuti yikaŵe yakukondweska. Usange mwamuyowoya nkani iyo yamovwira ŵategherezgi ŵinu kuti ŵakhozge ubwezi wawo na Yehova, kuti ŵawongere ivyo Iye wakuŵapa, umo ŵangatondera masuzgo agho ŵakukumana nayo panyengo yasono, panji umo ŵangaŵira ŵapharazgi ŵaluso mu uteŵeti wa m’munda, mbwenu muli na vifukwa viweme vyakuyowoya nkani yinu mwakuthukutera.

Wuli usange nkani yinu njakuti mukaŵazge pawumba? Kuti mukaŵazge mwakuthukutera, pali vinandi ivyo vikunjizgikamo kuruska kuzunura waka mazgu mwakurondora na kuyaŵazga mwandondomeko yake. Ŵazgani nkani yose. Usange mwamuŵazga cigaŵa cinyake ca Baibolo, citani kafukufuku pa mavesi agho. Panikizgani kuti mwayamanya makora mavesi agho. Wonani umo nkani iyo yiliri ya candulo kwa imwe na kwa ŵategherezgi ŵinu, ndipo ŵazgani mu ntowa yakuti ŵategherezgi ŵasange candulo.

Kasi mukunozgekera uteŵeti wa m’munda? Ŵazganiso nkani iyo mwamudumbirana na ŵantu na malemba agho mwamughagwiriskira ncito. Ghanaghaniraniso ivyo ŵantu ŵakumanya mwakukolerana na upharazgi winu. Kasi ni nkani wuli izo zacitika sono-sono apa? Kasi ni vyakumara-mahara wuli ivyo ŵantu ŵakukumana navyo? Para mwanozgeka makora kuti muŵarongore ŵantu kuti Mazgu gha Ciuta ghali na ntowa zakumazgira vyakumara-mahara ivyo iwo ŵakukumana navyo, ndipo mukunweka kuŵaphalira cimanyisko canteura ici, kuthukutera pakuyowoya kukwiza kwekha.

Yowoyani Nkani Mwakuthukutera Ndiposo Mwakukhuka. Kuthukutera kanandi kukwendezgana na kuyowoya mwakukhuka. Kawonekero ka cisko cinu kakwenera kurongora kuti mwathukutera ndiposo mwakhuka. Mazgu ghinu ghakwenera kurongora kuti mukugomezga nadi ivyo mukuyowoya, kweni lekani kuyowoya mwakujitemwa.

Kuyowoya mwamahara nkhwakukhumbikwa. Ŵanji ŵangatemwa kusekeska ŵanji pakuyowoya. Ŵantu ŵanteura aŵa ŵakwenera kovwirika kuti ŵasinte cifukwa para muntu wakuyowoya mwakujirongora panji mwakusekeska, ŵategherezgi ŵake ŵakwamba kughanaghanira za iye mu malo mwakughanaghanira uthenga uwo wakuyowoya. Kulwande linyake, awo mbasoni ŵakwenera kukhuŵirizgika kuti ŵayowoyenge mwakufwatuka.

Kuthukutera kukwambukira ŵanji. Usange mukulaŵiska ŵategherezgi ndiposo mukuyowoya nkani yinu mwakuthukutera, ŵategherezgi ŵinu ŵakondweskekenge cifukwa ca kuthukutera kwinu. Apolo wakayowoyanga mwakukhuka, ndipo cifukwa ca ici wakamanyikwa kuŵa muyowoyi waluso. Usange muli na mzimu wa Ciuta, kuyowoya kwinu mwakukhuka kupangiskenge ŵategherezgi ŵinu kuti ŵagwiriskire ncito ivyo mukuŵaphalira.—Mil. 18:24, 25; Rom. 12:11.

Kuthukutera Kwakuyana na Nkani. Pwerererani mu kayowoyero kinu kuti muleke kuthukutera mwakujumpizga pakuyowoya nkani yinu yose, cifukwa kacitiro kanteura aka kangavuska ŵategherezgi ŵinu. Para iwo ŵangavuka, mbwenu ivyo mukuyowoya ŵangavigwiriskira ncito yayi. Pa cifukwa ici, para mukunozgekera nkani yinu, woneseskani kuti muli na ntowa zakupambana-pambana zakayowoyero. Tceŵani kayowoyero ako kangapangiska ŵategherezgi kuti ŵaleke kukondweskeka nako. Para mwanozgekera makora nkani yinu, muŵenge ŵakukondweskeska nayo comene. Kweni ndipera, fundo zinyake zikukhumbikwira kuziyowoya mwakuthukutera comene kuruska zinyake, ndipo fundo zanteura izo zikwenera kuyowoyeka makoraghene mu nkani yinu yose.

Fundo zikuru zikwenera kuyowoyeka mwakuthukutera comene. Nkani yinu yikwenera kurongora izo ni fundo zikuru, cifukwa yagona pa fundo zikuru zeneizo. Fundo zikuru izi ndizo zovwirenge ŵategherezgi kuti ŵagwiriskire ncito ivyo ŵapulika. Para mwakhorweska ŵategherezgi ŵinu na fundo zakupulikikwa makora, mukwenera kuŵaciska, ndiposo kuŵarongosolera vyandulo vyakugwiriskira ncito fundo izo zayowoyeka. Kuthukutera kwinu pakuyowoya kumovwiraninge kuti mufike mitima ya ŵategherezgi ŵinu. Kukhuka kwinu pakuyowoya kuleke kuŵa kwakucicizga ŵategherezgi kuti ŵagwiriskire ncito ivyo mukuyowoya. Kweni yowoyani makoraghene kuti ŵawone ŵekha kuzirwa kwa ivyo mwayowoya ndiposo kukhumbikwa kwa kuvigwiriskira ncito.