Kagwiriskiro Ncito ka Mayikirofoni

ŴABALI na ŵadumbu ŵithu Ŵacikristu ŵakumalira nyengo yinandi pa kunozgekera maungano gha Cikristu. Kuti ŵasange candulo, ivyo vikuyowoyeka vikwenera kuti viŵe vyakupulikikwa makora.

Mu mazuŵa ya Ŵaisrayeli, kukaŵavya mayikirofoni. Apo Moses wakayowoya ku mtundu wa Israyeli pa Vidikha vya Moabu pambere ŵandanjire mu Caru ca Layizgano, kasi wumba wose uwu wa ŵantu mamiliyoni ghanandi, wukapulika wuli ivyo iye wakayowoyanga? Moses wakagwiriskira ncito ntowa ya kuŵika ŵanarume mumpepete mwa msasa mwakuti para wayowoya, iwo ŵaphalirenge wumba mwakucemerezga. (Dute. 1:1; 31:1) Pakati pajumpa nyengo yicoko waka kufuma apo Ŵaisrayeli ŵakamba kupoka mizi ya kumanjiliro ya dazi kwa Yorodani, Yoswa wakawunganya Ŵaisrayeli pa phiri la Gerizim na pa phiri la Ebal, ncakumanyikwirathu kuti pa cidikha ici pakaŵaso Ŵalevi. Pamalo agha wumba wose wukapulikizga vitumbiko na ntembo vyeneivyo Ciuta wakaŵika pantazi pawo. (Josh. 8:33-35) Ncamacitiko kuti panyengo iyi ŵantu ŵakagwiriskikaso ncito kuti ŵawerezgengepo mazgu gha Yoswa, kweniso cifukwa cakuti pakaŵa pa cidikha, ici naco cikovwira comene kuti mazgu ghapulikikwe patali.

Pakati pajumpa virimika 1,500 peneapo “mzinda ukuru comene” wa ŵantu wukawungana pa Nyanja ya Galileya kuti wupulikizge kwa Yesu, iye wakakwera ngaraŵa, ndipo wakakhara mumpepete mwa nyanja, na kwamba kuyowoya ku wumba. (Mrk. 4:1, 2) Kasi ncifukwa wuli Yesu wakakhara mu ngaraŵa apo wakayowoyanga ku ŵantu? Ncakuwonekerathu kuti ncifukwa cakuti muntu para wakuyowoya uku wali pa nyanja iyo nja bata, mazgu ghakupulikikwa patali comene.

Mupaka kukwambilira kwa virimika vya mu handiredi la 20, nkongono ya mazgu na kapulikikiro kakhe vikaghanaghanirikanga mwakuti ŵapulikizgi wose ŵapulike makora ivyo vikayowoyekanga. Ndipouli, kwambira m’ma 1920, ŵateŵeti ŵa Yehova ŵakamba kugwiriskira ncito vyakukuzgira mazgu pa maungano ghawo.

Vyakukuzgira Mazgu. Cirwero ici cingakuzga mazgu gha muyowoyi kuti ghaŵe ghakucemerezga comene na kuŵa ghakupulikikwa nga ni umo ghaliri. Muyowoyi kuti wakukhumbikwira kukoromoka cara. Ŵapulikizgi ŵakwenera cara kusuzgikira kuti ŵapulike ivyo vikuyowoyeka. Mumalo mwake, iwo ŵakwenera kuŵika maghanoghano ku uthenga uwo ukuyowoyeka.

Manozgero ghali kupangika mwakuti pa maungano gha cigaŵa na gha dera gha Ŵakaboni ŵa Yehova paŵenge vyakukuzgira mazgu viweme. Kusazgirapo apa, pa Nyumba za Ufumu zinandi vyakukuzgira mazgu vikugwiriskirika ncito kuti vikuzge mazgu gha awo ŵakuyowoya nkani za cisanisani, awo ŵakucitiska maungano, panji awo ŵakuŵazga pa pulatifomu. Ndipo mipingo yinyake yiliso na mayikirofoni agho wumba ukugwiriskira ncito pakuzgora mafumbo. Usange mpingo winu uli na virwero ivi, sambirani umo mungavigwiriskira ncito makora.

Urongozgi Wakukhumbikwa. Kuti tigwiriskire ncito mayikirofoni mwakwenerera, kumbukirani ivi: (1) Mayikirofoni yikwenera kuŵa pa utali wa masentimita 10 mupaka 15 kufuma ku mlomo winu. Usange mayikirofoni yili kufupi comene na mlomo, mazgu ghakupulikikwa makora yayi. Usange yiliso kutali comene, mazgu ghakupulikikwa yayi. (2) Mayikirofoni yikwenera kuŵa pantazi pinu, pampepete cara. Usange mwazgokera kumazere panji kumaryero, yowoyani kwekha usange mlomo winu warazga pa mayikirofoni. (3) Yowoyani mwakukhizga mazgu na mwakupulikwika makora, mwakupambanako na umo mukuyowoyera para mukudumbiskana na muntu. Palije cifukwa ca kucemerezgera. Mayikirofoni ndiyo yikuzgenge mazgu ghinu mwakuti waliyose wapulike. (4) Para mukukhumba kukhosomora, panji kupenka, woneseskani kuti mwazgokera kumpepete kwa mayikirofoni.

Para Mukuyowoya Nkani. Usange mwafika ku pulatifomu, mbali wazamukhizga panji kukwezga mayikirofoni mwakuti yiyane na msinku winu. Panyengo iyo wakucitira ici, imirirani mwakunyoroka ndipo razgirani ku ŵategherezgi. Ŵikani autilayini yinu pa thebulo lakuyowoyerapo, ndipo woneseskani kuti mayikirofoni yikuleka kumusikizgani kuti mulaŵiske ŵategherezgi.

Para mwambapo kuyowoya nkani, pulikizgani umo mazgu ghinu ghakufumira mu vyakukuzgira mazgu. Kasi mazgu ghinu ngakucemerezga comene, panji vinyake ivyo mukuyowoya vikupulikikwa makora yayi mu vyakukuzgira mazgu? Usange vili nteura, mukwenera kuwelera kumanyuma pacoko. Para mukulaŵiska pa autilayini yinu, kumbukirani kuti mukwenera kuyowoya na kuŵazga kwekha usange mutu winu warazga pa mayikirofoni panji wuli pacanya pa iyo, musi mwa iyo cara.

Para Mukuŵazga ku Pulatifomu. Nciweme comene kukolera m’mawoko Baibolo linu panji buku lililose mwakuti cisko cinu cilazgire ku ŵapulikizgi. Pakuti mayikirofoni yizamuŵa kuntazi kwinu, cintu ico mukuŵazga cikwenera kuŵa kumpepete pacoko waka. Ici cikung’anamura kuti mutu winu wukwenera kuzgokera pacoko waka kumpepete kwa mayikirofoni. Ndipo para mukuŵazga, mazgu ghinu ghazamunjira mwakudunjika mu mayikirofoni.

Ŵabali ŵanandi awo ŵakuŵazga pa sambiro la Gongwe la Mulinda ŵakwimirira na kugwiriskira ncito mayikirofoni yakwimika. Ici cikovwira kuti ŵathutenge makora na kuŵazga mwakusutuka. Kumbukirani kuti kuŵazga ndime ncigaŵa cakukhumbikwa comene pa maungano. Ŵapulikizgi ŵakusanga candulo usange ŵakupulika makora ivyo vikuŵazgika.

Panyengo ya Kuzgorapo pa Ungano. Usange mpingo winu wuli na mayikirofoni yakuti ŵategherezgi ŵagwiriskirenge ncito pakuzgora mafumbo, kumbukirani kuti nkwakukhumbikwa kuyowoya mwakupulikikwa makora na kupima nkongono ya mazgu. Para mukuzgorapo, woneseskani kuti buku panji Baibolo linu viŵenge mu mawoko ghinu. Ici cikovwira kuti mulaŵiskengepo makora para mukuyowoya pa mayikirofoni.

Mu mipingo yinyake, ŵabali ŵakuŵikika kuti ŵaperekenge mayikirofoni kwa muntu uyo wakukhumba kuzgorapo. Usange umu ndimo viliriso pa mpingo winu, para mukukhumba kuzgora, yimikani mucanya woko linu mwakuti mbali uyo wali na mayikirofoni wawone apo mwakhara na kwiza luŵiro. Usange mayikirofoni nja mumawoko, nozgekerani kuyipokelera para yikwiza. Lekani kwamba kuzgora mupaka muwoneseske danka kuti mayikirofoni yili pamalo ghaweme. Usange mwamara kuzgora, perekani mayikirofoni mwakupwererera.

Usange Muli pa Ciyezgelero. Kugwiriskira ncito mayikirofoni para mukucita ciyezgelero kukukhumbikwira kunozgekerathu mwapadera. Usange mayikirofoni yili pa cakwimikapo cake, mawoko ghinu ghose ghazamuŵa ghakusutuka kuti mugwiriskire ncito makora Baibolo na autilayini yinu. Kugwiriskira ncito mayikirofoni yakukolera mumawoko kungovwira kuti muŵe ŵakufwatuka kusunkunya thupi, kweni mukukhumbikwira kuti munyinu uyo mwakhala nayo pafupi wakolere. Usange mwacita ici, mawoko ghinu ghazamuŵa ghakufwatuka kugwiriskira ncito Baibolo. Imwe na muntu uyo mukumupharazgira mukwenera kuyezgelera kucita ici mwakuti waliyose wamanyenge kagwiriskiro ncito ka mayikirofoni. Kumbukaniso kuti, usange muli pa pulatifomu, mukwenera cara kurazga muwongo ku ŵategherezgi, comene-comene para mukuyowoya.

Pa viyezgelero vya mu Ungano wa Uteŵeti, ŵakunjizgikamo ŵangaŵa ŵanandi, ndipo ŵangakhumbikwira kwendendeka pa pulatifomu. Mwanteura, pangakhumbikwira mayikirofoni ghanandi. Manozgero agha ghakwenera kucitika pambere vyose vindambe panji panyengo iyo awo ŵakunjizgikamo ŵakuya pa pulatifomu. Kuwoneseska kuti mayikirofoni ghali pamalo ghakwenerera ndiposo panyengo yakwenerera kukukhumbikwira kunozgekera pambere vyose vindambe. Kuyezgelera viyezgelero pambere vindacitike pa pulatifomu kukupereka mwaŵi wa kusambizga awo ŵakunjizgikamo kuti ŵamanye kagwiriskiro ncito kaweme ka mayikirofoni. Usange kuyezgelera viyezgelero kukucitikira pa pulatifomu cara, nciweme kuti kumalo ghalighose uko mukucitira mukolere kantu kanyake kakuyana na mayikirofoni mwakuti muzgoŵere kagwiriskiro ncito ka mayikirofoni. Pamanyuma pa viyezgelero, ŵakutoramo cigaŵa ŵakwenera kuŵika mayikirofoni pamalo ghake mwakupwererera, ŵaŵe maso mwakuti ŵaleke kukanda mayikirofoni yinyake para ŵakufuma pa pulatifomu.

Kuŵika pwererero ku kagwiriskiro ncito kithu ka mayikirofoni kukukolerana na cakulata ca maungano ghithu, ico ni kusanga candulo pa cidumbirano cithu ca Mazgu gha Ciuta. (Heb. 10:24, 25) Mwakumanya kagwiriskiro ncito kaweme ka mayikirofoni, nase tingawovwira kupangiska maungano kuŵa ghakukondweska.