Kuwerezga Kuti Mudidimizge Fundo

KUSAMBIZGA mwaluso kukusazgapo kuwerezga. Para fundo yakuzirwa yayowoyeka kwakujumpa kamoza, mbwenu ŵategherezgi ŵayikumbukirenge. Usange fundo iyo yingayowoyeka mwakupambanako, ŵategherezgi ŵangayipulikiska makora comene.

Usange ŵategherezgi ŵinu ŵakukumbukira yayi ivyo mukuyowoya, mbwenu mazgu ghinu ghaŵenge na nkongono yiliyose cara pa ivyo ŵakugomezga panji umo ŵakukhalira. Ŵarutilirenge kughanaghanira fundo izo imwe mukudidimizga mwapadera.

Yehova, Musambizgi withu Mukuru, wali kutipa ciyerezgero ciweme ca kuwerezga. Wakapereka Marango Khumi ku Ŵaisrayeli. Kwizira mwa mungelo, wakapangiska kuti mtundu uwu wupulike marango agha pa Phiri la Sinai. Pamanyuma pake wakalemba marango agha na kupereka kwa Moses. (Ex. 20:1-17; 31:18; Dute. 5:22) Wakati watumika na Yehova, Moses wakayowoyaso marango agha ku mtundu wa Israyeli pambere ŵandanjire mu Caru ca Layizgano, ndipo mwakovwirika na mzimu utuŵa, Moses wakalemba cakucitika ici pa Duteronome 5:6-21. Limoza mwa marango agho ghakapika kwa Ŵaisrayeli likaŵa la kutemwa na kuteŵetera Yehova na mtima wawo wose, umoyo wawo wose, na nkongono zawo zose. Ici naco cikayowoyeka mwakuwerezgawerezga. (Dute. 6:5; 10:12; 11:13; 30:6) Cifukwa wuli? Cifukwa nga ni umo Yesu wakayowoyera, ili likaŵa “Dango likuru na lakudanga.” (Mat. 22:34-38) Kwizira mwa ncimi Yeremiya, Yehova wakakumbuska Ŵayuda kwanyengo zakujumpa pa 20 za kukhumbikwa kwa kumupulikira mu vintu vyose ivyo wakaŵalangura. (Yer. 7:23; 11:4; 12:17; 19:15) Ndipo kwizira mwa Ezekiel, Ciuta wakayowoya kwanyengo zakujumpa pa 60 kuti ŵamitundu “tiŵamanye kuti ine ndine Yehova.”—Ezek. 6:10; 38:23.

Mu vyakulembera ivyo vikuyowoya za uteŵeti wa Yesu, tikuwonaso umo iye wakagwiriskira ncito mwaluso kuwerezga. Mwaciyerezgero, pali mauthenga ghaweme ghanayi—uliwose wa igho ukuyowoya vyakucitika vyakuyana kweni vyakulembeka mwakupambana-pambana. Mu vyakucitika vinandi, Yesu wakayowoyanga fundo zakuyana pakupereka urongozgi kweni muntowa zakupambana-pambana. (Mrk. 9:34-37; 10:35-45; Yoh. 13:2-17) Ndipo peneapo wakaŵa pa Lupiri lwa Olive kwati kwakhala mazuŵa ghacoko waka kuti wakomeke, Yesu wakayowoya mwakuwerezgawerezga kuti wadidimizge urongozgi wake wakuzirwa wakuti: “Muŵe maso: pakuti mulive kumanya zuŵa ilo Fumu yinu yikwizira.”—Mat. 24:42; 25:13.

Mu Uteŵeti wa M’munda. Para mukupharazgira ŵantu mukuŵa na cigomezgo cakuti ŵakumbukirenge ivyo mukuyowoya. Kuwerezga fundo mwaluso kungamovwirani kuti mucite ici.

Kuwerezga fundo panyengo iyo yikuyowoyeka kungawovwira kuti yikhalirire mu maghanoghano gha muntu. Mwanteura, pamanyuma pa kuŵazga lemba, mungadidimizga mwakuyowoya fundo yikuru ya lemba ilo na kufumba kuti, “Kasi mwawona mazgu agho ghagwiriskirika ncito mu lemba ili?”

Mazgu ghaumaliro pa cidumbirano naghoso ghakwenera kuyowoyeka mwakukora mtima. Mwaciyerezgero, mungayowoya kuti: “Fundo yikuru iyo nkugomezga kuti mukumbukirenge kufuma mu cidumbirano cithu ici ni . . . ” Yowoyani fundo iyo mu ntowa yipusu. Fundo iyi yingaŵa yakuŵa nga ni iyi: Cilato ca Ciuta ncakuti caru capasi ciŵe paradiso. Cilato ici cifiskikenge nadi.” Panji yanteura iyi: “Baibolo likurongora pakweru kuti tikukhala mu mazuŵa gha ku umaliro gha caru ici. Usange tikukhumba kuzakapona umaliro wake, tikwenera kusambira ivyo Ciuta wakukhumba kwa ise.” Panji yingaŵa nteura: “Nga ni umo tawonera, Baibolo likupereka urongozgi wa umo tingacitira na vyakumara-mahara vya mu mbumba.” Nyengo zinyake mungawerezgaposo waka vesi la mu Baibolo kuti yiŵe fundo yakuti yikumbukirike. Inya nadi, kuti muzakacite makora mukwenera kunozgekera mwakutendekera.

Pa ulendo wakuwelerako na para mukucitiska masambiro gha Baibolo, kuwerezga kungasazgapo kuweleramo mafumbo.

Usange muntu wakutondeka kupulikiska panji kugwiriskira ncito urongozgi wa mu Baibolo, mukwenera kudumbiskana naye nkani iyo kwakujumpa kamoza. Yezgayezgani kuyiyowoya mu ntowa zakupambana-pambana. Vidumbirano vikukhumbikwira kuŵa vya nyengo yitali cara kweni vikwenera kukhuŵirizga musambiri kughanaghanira pa ivyo mwadumbiskana. Kumbukirani kuti Yesu wakagwiriskira ncito kuwerezga kuti wawovwire ŵasambiri ŵake kuti ŵamazge khumbo la kuŵa pa nambara wanu.—Mat. 18:1-6; 20:20-28; Luka 22:24-27.

Para Mukuyowoya Nkani. Usange mukuyowoya nkani pa pulatifomu, cilato cinu kuti nkupereka waka cimanyisko ku ŵategherezgi cara. Imwe mukukhumba kuti ŵapulikiske, ŵakumbukire na kugwiriskira ncito ivyo mukuyowoya. Kuti mucite ici, mukwenera kuwerezga mwaluso.

Ndipouli, usange mukuwerezga fundo zikuru pafupi-pafupi, mbwenu ŵategherezgi ŵinu ŵalekenge kupulikizga. Sankani mwakupwererera fundo izo zikwenera kudidimizgika mwapadera. Izi ni fundo zikuru zeneizo nkani yinu yazikikapo, kweni mungasazgaposo fundo zinyake izo zingaŵa zacandulo kwa ŵategherezgi ŵinu.

Kuti muwerezge fundo, cakwamba mukwenera kuzizunura mu mazgu ghinu ghakwamba. Mungacita ici mwa kuyowoya mwakudumura ivyo muyowoyenge, kufumba mafumbo, panji viyerezgero vyakudumura vya vyakumara-mahara ivyo vingakhumbikwira kumazgika. Mungazunura unandi wa fundo zikuru izo muyowoyenge ndipo zizunurani na manambara. Pamanyuma pake rongosorani fundo yiliyose mukati mu nkani yinu. Kudidimizga kungacitika mukati mu nkani yinu mwa kuzunura fundo yikuru yiliyose pambere mundarute pa yinyake. Panji mungapereka ciyerezgero ico cikuyowoya za umo tingagwiriskilira ncito fundo yikuru. Mungadidimizgaso fundo zikuru mwa kuziwerezga ku umaliro kwa nkani, kuzirongosora mwa kuziyaniska na zinyake na kuzgora mafumbo agho ghangufumbika, panji kuyowoya mwakudumura umo tingamazgira vyakumara-mahara.

Kusazgirapo pa ivyo viri pacanya apa, muyowoyi waluso wakusanda mwakupwererera muntu waliyose uyo wali mu ŵategherezgi ŵake. Usange ŵanyake ŵa iwo ŵakutondeka kupulikiska fundo yinyake, muyowoyi wakumanya za ici. Usange fundo njakuzirwa, wakuyiwerezgaso. Ndipouli, usange wakuwerezga mazgu ghakuyana waka mbwenu wafiskenge cara cilato cake. Pali vintu vinandi ivyo vikukhumbikwa pakusambizga kuruska apa. Wakwenera kusintasinta. Wakwenera kusazgirako vyakunoweskera ku nkani yake. Kumanya ivyo ŵategherezgi ŵinu ŵakukhumbikwira mu ntowa iyi kungamovwirani kuti muŵe musambizgi waluso.