Kusunga Nyengo, na Kuyigaŵa Mwakwenelera

NANGAULI cididimizgo cikuru cikwenera kuŵa pa kasambizgiro kinu, kweni kusunga nyengo nakoso kukukhumbikwira pwererero. Maungano ghithu ghakwamba na kumara panyengo yakuŵikika. Kuti ici cicitike, pakukhumbikwira kuti waliyose uyo wali mu programu ya ungano wasunge nyengo.

Umo ŵantu ŵakawoneranga umoyo munyengo za Baibolo kukupambana na umo ŵakuwuwonera mazuŵa ghano mu vyaru vinandi. Nyengo yikasacizgikanga mu mazgu gha nga ni “pa ora la citatu” panji ‘ora la khumi.’ (Mat. 20:3-6; Yoh. 1:39) Ŵantu ŵakapwerererangako comene cara za kuŵika nyengo yakucitira vintu vyawo vya zuŵa na zuŵa. Umu ndimoso viliri mu vigaŵa vinyake vya caru mazuŵa ghano.

Nangauli mitheto panji kucita ico muntu wakutemwa kungapangiska ŵantu kuti ŵaleke kupwerererako za kusunga nyengo, kweni tingandula usange tingasambira kuŵika pwererero lakwenelera pankani iyi. Kusunga nyengo nkhwakukhumbikwa comene para ŵantu ŵanandi ŵali na cigaŵa mu programu ya ungano. Mazgu ghakuti “vintu vyose vicitike makora, na mu ndonda,” ghangagwiriskirikaso ncito pakusunga nyengo para tapika nkani pa maungano ghithu.—1 Kor. 14:40.

Umo tingasungira Nyengo. Cintu cakukhumbikwa comene kuti tisunge nyengo nkunozgekera. Nyengo zinandi, ŵayowoyi awo ŵakurya nyengo ni ŵeneawo ŵakaleka kunozgekera mwakukwana. Iwo ŵangacita nteura cifukwa ca kujithemba. Panji ŵangamba kunozgekera para kwakhala nyengo yicoko waka kuti ŵakayowoye nkani yawo. Cintu cikuru ico cingamovwirani kusunga nyengo ndico kuzirwiska nkani iyo mwapika ndiposo kunozgekera makora na mtima wose.

Kasi nkani yinu njakucita kuŵazga? Cakwamba, wonani Masambiro 4-7, agho ghakurongosora za kuyowoya kwambura kugota-gota, kupumulira, kudidimizga fundo mwakwenelera na kudidimizga fundo zikuru. Pamanyuma pake, gwiriskirani ncito urongozgi uwu penepapo mukuŵazga mwakukwezga nkani iyo mwapika. Iŵani na nyengo kuti muwonengepo. Kasi mukukhumbikwira kuŵazga mwaluŵiro-luŵiro mwakuti mumarizge panyengo yake? Ŵazgani mwaluŵiro-luŵiro mu vigaŵa ivyo vili na kuzirwa kucoko, kweni pumulirani na kuŵazga mwakuzikitizga kuti mudidimizge fundo yakuzirwa. Yezgelerani kwanyengo zinandi. Penepapo mukunyolorera kaŵazgiro kinu, kuŵenge kupusu kusunga nyengo.

Kasi mwamugwiriskira ncito autilayini ya kulemba mwekha? Ncakwenelera yayi kulemba vintu vinandi pa autilayini yinu nga ni para kuti ni nkani yakucita kuŵazga, cifukwa mungakarya nyengo. Penepapo mukagwilirangapo ncito Sambiro 25, mukasambira ntowa yiweme. Kumbukirani fundo zinkonde izi: (1) Sankani fundo mwakwenelera, kweni zinandi comene cara. (2) Kumbukirani fundo zikuru, kweni mungasunganga pamtima sentensi yose cara. (3) Lembani pa autilayini nyengo iyo mukukhumba kugwiriskira ncito pa cigaŵa ciricose ca nkani yinu. (4) Penepapo mukunozgekera, wonani fundo izo zingakalekeka usange mukuwona kuti nyengo njicoko. (5) Yezgelerani nkani yinu.

Kuyezgelera nkwakukhumbikwa. Penepapo mukuyezgelera, wonani nyengo iyo mukumalira pa cigaŵa ciricose ca nkani yinu. Yezgelerani mwakuwerezga-werezga mupaka nkani yose yiyowoyeke munyengo yakugaŵirika. Lekani kuŵikamo fundo zinandi mu nkani yinu. Peneapo mukuyezgelera, nyengo yikwenera kukhalako cifukwa kuyowoya nkani pawumba kungatora nyengo yitaliko kuruska para mukuyezgelera pamwekha.

Kugaŵa Vigaŵa. Kusunga nyengo nkwakukolerana comene na kugaŵa vigaŵa vya nkani mwakwenelera. Mukwenera kugwiriskira ncito nyengo yinandi pakuyowoya vigaŵa ivyo vikuŵa na fundo zikuru za nkani. Mazgu ghakwamba ghakwenera kuŵa ghatali comene cara kweni ghakwenera kuŵa waka na fundo zitatu izo zarongosoreka mu Sambiro 38. Vigaŵa ivyo vikuŵa na fundo zikuru za nkani vikwenera cara kuŵa vitali comene kuti muŵe na nyengo yakuyowoyera mazgu ghaumaliro gha nkani, nga ni umo Sambiro 39 likuyowoyera.

Kuyezgayezga kwinu kuti musunge nyengo kupangiskenge kuti nkani zinu ziŵe ziweme ndiposo kurongorenge kuti mukucindika ŵanji awo ŵali na nkani pamoza na mpingo wose.