Ŵakalemba vya Yesu

Kasi waŵawona ŵanalume awo ŵali pa cithuzithuzi ici?— Pali Mateyu, Mariko, Luka, Yohane, Petrosi, Yakobe, Yuda na Paulosi. Ŵanalume aŵa ŵakaŵako panyengo iyo Yesu wakaŵa pa caru capasi. Ŵakalemba vya Yesu. Tiye tisambire vinandi vya iwo.

Pa ŵanalume aŵa, ŵatatu ŵakaŵa ŵapositole awo ŵakapharazganga na Yesu. Kasi ŵanalume ŵatatu aŵa ukuŵamanya?— Ŵakaŵa Mateyu, Yohane na Petrosi. Mateyu na Yohane ŵakamumanyanga makora Yesu, ndipo wose ŵaŵiri ŵakalemba vya Yesu. Mpositole Yohane wakalembaso buku la Uvumbuzi na makalata ghatatu. Makalata agha ni Yohane Wakwamba, Yohane Waciŵiri na Yohane Wacitatu. Mpositole Petrosi wakalemba makalata ghaŵiri agho ghali mu Baibolo. Ghakucemeka Petrosi Wakwamba na Petrosi Waciŵiri. Mu kalata yaciŵiri, Petrosi wakalemba ivyo Yehova wakayowoya vya Yesu kufuma kucanya kuti: ‘Uyu ni mwana wane wakutemweka, uyo namwene nkhukondwa nayo.’

Pa cithuzithuzi apa paliso ŵanalume ŵanyake awo ŵakalemba vya Yesu. Yumoza wawo ni Mariko. Wakwenera kuti wakaŵapo apo Yesu wakakolekanga, ndipo wakawona vyose ivyo vikacitikanga. Munyakeso ni Luka. Wakaŵa dokotala ndipo wakwenera kuti wakazgoka Mkhristu Yesu wati wafwa.

Ŵanalume ŵanyake ŵaŵiri awo ukuŵawona pa cithuzithuzi apa ŵakaŵa ŵanung’una ŵa Yesu. Nawo ŵakalembako Baibolo. Kasi mazina ghawo ukughamanya?— Ni Yakobe na Yuda. Pakwamba, ŵakagomezganga mwa Yesu yayi. Ŵakaghanaghananga kuti ngwakufuntha. Kweni pamanyuma ŵakamba kugomezga mwa Yesu ndipo ŵakazgoka Ŵakhristu.

Munthu waumaliro pa ŵanalume awo ŵali pa cithuzithuzi apa ni Paulosi. Nayo wakalembako Baibolo. Pambere wandaŵe Mkhristu, wakacemekanga Saulosi. Wakatinkhanga Ŵakhristu ndipo wakaŵacitiranga nkhaza. Kasi ukumanya ico cikapangiska kuti Paulosi waŵe Mkhristu?— Zuŵa linyake Paulosi wakendanga mu nthowa, ndipo mwamabuci wakapulika munthu munyake wakuyowoya kufuma kucanya. Munthu uyu wakaŵa Yesu! Wakafumba Paulosi kuti: ‘Cifukwa wuli ukucitira nkhaza ŵanthu awo ŵakunigomezga?’ Ivi vyati vyacitika, Paulosi wakazgoka Mkhristu. Iyo wakalemba mabuku 14 mu Baibolo, kwamba pa Ŵaroma mpaka Ŵahebere.

Tikuŵazga Baibolo zuŵa lililose, asi nthe?— Para tikuŵazga Baibolo tikumanya vinandi vya Yesu. Kasi ungatemwa kumanya vinandi vya Yesu?—