Ku Ŵaŵazgi Ŵithu

NDISE ŵakukondwa kumumanyiskani kuti kalembero ka Gongwe la Mulinda kasintha kwambira magazini yino. Pambere tindalongosore ivyo vyasintha, tilongosorenge ivyo vindasinthe.

Zina la magazini yino lakuti, Gongwe la Mulinda Likupharazga Ufumu wa Yehova, lisinthenge yayi. Antheura Gongwe la Mulinda lilutilirenge kucindika muwuso wa Yehova pakuŵa Ciuta waunenesko. Awo ŵakuŵazga ŵalutilirenge kupembuzgika na makani ghawemi gha Ufumu wa Yehova. Nkhani izo zili pa peji 5 mpaka 9 mu magazini yino zikulongosora ng’anamuro la Ufumu ndiposo apo wizirenge. Gongwe la Mulinda lilutilirenge kovwira ŵaŵazgi kuti ŵaŵe na cipulikano mwa Yesu Khristu ndiposo kukhozgera unenesko wa mu Baibolo. Nga ni umo vyaŵira kwa vilimika vinandi, Gongwe la Mulinda lilutilirenge kulongosora ng’anamuro la ivyo vikucitika mu caru mwakuyana na maucimi gha mu Baibolo.

Kasi nchivici ciŵenge cacilendo? Tilongosorenge vigaŵa vinyake ivyo viŵenge mu Gongwe la Mulinda ilo mu Citumbuka lifumenge para pajumpha myezi yitatu.a

Mu magazini iyi muzamuŵa vigaŵa vyakupambanapambana ivyo vizamuciskanga ŵanthu kuti ŵaghanaghanirengepo comene pa ivyo ŵazamuŵazganga. Nkhani yakuti “Kasi Mukumanya?” yizamulongosoranga nkhani zinyake za mu Baibolo. Nkhani yakuti “Sendelerani kwa Ciuta” yizamulongosoranga umo Malemba ghanyake gha mu Baibolo ghangatovwilira kuti timumanye makora Yehova. Nkhani yakuti “Ivyo Ŵaŵazgi Ŵithu Ŵakufumba” yizamuzgoranga kufuma mu Baibolo mafumbo agho ŵanthu ŵanandi ŵakutemwa kufumba. Mwaciyelezgero, ŵanthu ŵanandi ŵakufumba kuti, “Kasi Ufumu wa Ciuta wuli mu mtima winu?” Muzamusanga zgoro pa peji 13.

Mu magazini iyi muzamuŵaso vigaŵa vinyake ivyo vizamovwiranga mbumba. Cigaŵa cakuti “Ivyo Vingapangiska Mbumba Kuŵa Yacimwemwe,” cizamulongosoranga masuzgo agho ghakukhwaska mbumba, na kulongora umo Baibolo lingawovwilira kumazga masuzgo agha. Mu magazini iyi muzamuŵaso nkhani yakuti, “Sambizgani Ŵana Ŵinu,” iyo ŵapapi ŵakwenera kuzakaŵazgira ŵana ŵawo. Nkhani yakuyanako na iyi yizamuŵa “Cigaŵa ca Ŵanyamata na Ŵasungwana,” ico cizamuciskanga ŵanyamata na ŵasungwana kuti ŵalimbikirenge kusambira Baibolo.

Mu magazini iyi muzamuŵaso nkhani zinyake. Nkhani yakuti “Londezgani Cipulikano Cawo” yizamuticiska kuti tilondezge ciyelezgero ca munthu uyo wazunurika mu Baibolo. Mwaciyelezgero, pa peji 18 mpaka 21 mu magazini yino, pali nkhani ya mprofeti Eliya. Para mwaŵazga, wonani umo mungalondezgera cipulikano cake. Nkhani yakuti “Kalata Yakufuma Ku . . . ” yizamulongosoranga nkhani za ŵamishonale na ŵanthu ŵanji mu vyaru vyakupambanapambana. Nkhani yakuti “Ivyo Tikusambirako kwa Yesu” yizamulongosora mwaupusu ivyo Baibolo likusambizga vyakukhwaskana na Yesu.

Tikusimikizga kuti Gongwe la Mulinda lilutilirenge kukondweska ŵaŵazgi wose awo ŵakucindika Baibolo, ndiposo awo ŵakukhumba kumanya ivyo Baibolo likusambizga nadi. Tikugomezga kuti magazini iyi yimovwiraninge kuti mulimanye makora Baibolo.

NDISE ŴAPHARAZGI ŴA MAGAZINI YINO

[Mazgu ghamusi]