Sendelerani kwa Ciuta
Dada Muwemi Wakuluska Wose
MAZGU ghakuti ‘dada’ ni mazgu ghacoko kweni ghakukhwaska comene ŵanthu. Dada uyo wakutemwa nadi ŵana ŵake wakuŵawovwira kuti ŵakure makora. Baibolo liri na vifukwa viwemi vyakucemera Yehova Ciuta kuti “Ŵadada.” (Mateyu 6:9) Kasi Yehova ni Dada wamtundu wuli? Kuti tizgore fumbo ili, tiyeni tisande mazgu agho Yehova wakayowoya kwa Yesu pa nyengo iyo wakabapatizikanga. Umo dada wakuyowoyera ku ŵana ŵake, wakuvumbura vinandi vyakukhwaskana na umo iyo waliri.
Ca mu Okutobala, cilimika ca 29 C.E., Yesu wakaluta ku mronga wa Yordani kuti wakabapatizike. Baibolo likuyowoya ivyo vikacitika. Ilo likuti: “Ndipo Yesu wakati wabapatizika, ndipera ngawakuzuwuka mu maji: ndipo wonani, kucanya kukamujulikira, ndipo wakawona mzimu wa Ciuta wakikhanga nga ndi njiŵa, ndipo wakiza pa Iyo. Ndipo henani, lizgu likafuma kucanya, likati, Uyu ndi Mwana wane wakutemweka, Mweneuyo nkhuca nayo.”a (Mateyu 3:16, 17) Mazgu agho Yehova iyomwene wakayowoya, ghakulongora mtundu wa Dada uyu. Wonani vinthu vitatu ivyo Yehova wakayowoya kwa Mwana wake.
Cakwamba, mwa kuyowoya kuti “uyu ndi Mwana wane,” Yehova wakang’anamuranga kuti ‘ngwakukondwa kuŵa Dada wake.’ Dada wamahara wakuŵamanya ndiposo kuŵapwelelera ŵana ŵake. Ŵana ŵakukhumba kuti muŵasimikizgirenge kuti mbakuzirwa mu mbumba. Aghanaghanirani umo Yesu wakajipulikira apo Ŵadada ŵake ŵakamusimikizgira kuti ŵakumumanya makora, nangauli wakaŵa mulara.
Caciŵiri, mwa kumulongosora Mwana wake kuti “wakutemweka,” Yehova wakalongora pakweru kuti wakumutemwa Yesu. Tingati Adada ŵake ŵakamuphaliranga kuti, ‘Nkhukutemwa.’ Dada muwemi wakuŵaphalira ŵana ŵake kuti wakuŵatemwa. Mazgu ghanthena para ghayowoyeka kufumira pasi pa mtima ghakovwira kuti ŵana ŵakure makora. Cikaŵa cakukondweska comene kwa Yesu kupulika mazgu ghacitemwa kufuma kwa Ŵadada ŵake.
Cacitatu, Yehova wakalongora kuti wakuca na Mwana wake mwa kuyowoya mazgu ghakuti “Nkhuca nayo.” Vikaŵa nga ni para Yehova wakuyowoya kuti, ‘Nakondwa comene na ivyo wamwana wane wacita.’ Dada wacitemwa wakuyezgayezga kusanga mipata yakuti waphalire ŵana ŵake kuti wakukondwa na ivyo ŵakuyowoya panji kucita. Ŵana ŵakukhozgeka ndiposo kukhuŵilizgika para ŵamanya kuti ŵapapi ŵawo ŵakuca nawo. Mwaunenesko, Yesu wakakhozgeka kupulika kuti Ŵadada ŵake ŵakacanga nayo.
Nadi pano, Yehova ni Dada muwemi wakuluska wose. Kasi namwe mukukhumbisiska kuŵa na dada wantheura? Usange ni nthena, mungapembuzgika kumanya kuti mungaŵa paubwezi na Yehova. Usange na cipulikano mukusambira za iyo ndiposo mukuyezgayezga kucita khumbo lake, iyo wazamumuzgorani. Baibolo likuti: “Sendelerani kwa Ciuta, ndipo Iyo wati wasendelere kwa imwe.” (Yakobe 4:8) Kasi nchivici ico cingamupangiskani kujipulika kuti ndimwe ŵakuvikilirika comene kuluska kuŵa paubwezi na Yehova Ciuta, uyo ni Dada muwemi wakuluska wose?
[Mazgu ghamusi]
a Mwakuyana na umo Luka wali kulembera nkhani yakuyana na iyi, iyo yikusangikaso mu mabuku gha Mateyu, Marko na Yohane, Yehova wakagwiliskira nchito mazgu ghakuti “iwe.” Mazgu agha ghakuti, “Iwe ndiwe Mwana wane wakutemweka; wa mweneiwe nkhuca nawe.”—Luka 3:22.