Ivyo Ŵaŵazgi Ŵithu Ŵakufumba

Kasi Ufumu wa Ciuta Wuli mu Mtima Winu?

Ŵanthu ŵanandi lero ŵakugomezga kuti zgoro la fumbo ili ndakuti enya. Mwaciyelezgero, buku la The Catholic Encyclopedia likuti: “Ufumu wa Ciuta ukung’anamura kuti . . . Ciuta wakuwusa mitima yithu.” Ŵalongozgi ŵanandi ŵa visopa ŵakusambizga cisambizgo ici. Kweni fumbo ndakuti, kasi Baibolo likusambizga nadi kuti Ufumu wa Ciuta wuli mu mitima ya ŵanthu?

Ŵanji ŵakughanaghana kuti Yesu ndiyo wakambiska ghanoghano lakuti Ufumu wa Ciuta wuli mu mitima ya ŵanthu. Kweni Yesu wakayowoya kuti: “Ufumu wa Ciuta uli pakati pinu.” (Luka 17:21, NW) Vesi ili mu Mabaibolo ghanyake liri kung’anamurika kuti: “Ufumu wa Ciuta uli mukati mwinu.” Kasi kang’anamuliro kanthena aka nkhakuneneska mwakuyana na umo Yesu wakayowoyera? Kasi Yesu wakang’anamuranga kuti Ufumu wa Ciuta ukusangika mu mitima ya ŵanthu?

Cakwamba, tiyeni tighanaghanire umo mtima wa munthu wuliri. Para mazgu ghakuti mtima ghazunulika mu Baibolo, ghakwimira nkharo ya munthu, kusazgapo maghanoghano ghake na umo wakujipulikira. Fundo yakuti cinthu cakuzirwa comene, nga ni Ufumu wa Ciuta, ukukhala mu mtima wa munthu, ndipo ukuzgora ŵanthu kuŵa ŵakuzirwa comene, yingawoneka fundo yakukondweska. Kweni kasi pali ukaboni wakuti umu ndimo viliri nadi?

Baibolo likutiphalira kuti: “Mtima ngwakupusika kwakuluska vyose, nguheni wambura kulorako.” (Yeremiya 17:9) Mwakukhozgera fundo iyi, Yesu wakati: “Mu mitima ya ŵanthu, mukufuma maghanoghano ghaheni, mauzaghali, maunkhungu, maucikozi, mauleŵi, vyakudokera, vyakwananga.” (Marko 7:20-22) Sono ghanaghanirani kuti: Asi fundo iyi yikulongora pakweru kuti uheni wose uwo tikuwuwona lero wuli kwambira mu mitima ya ŵanthu? Antheura, ni mwawuli umo Ufumu wa Ciuta, uwo ngwakufikapo, ungakhalira mu mtima wa munthu? Mwanadi, nga ni umo vikuyu vingapasira nthula yayi, mwakuyana waka, mu mitima ya ŵanthu mungakhala Ufumu wa Ciuta yayi.—Mateyu 7:16.

Caciŵiri, ghanaghanirani ŵanthu awo Yesu wakayowoyanga nawo, nga ni umo palembekera pa Luka 17:21. Vesi la pamanyuma mu cipaturo cenecici likuti: ‘Wakati wafumbika na Ŵafarisi za nyengo iyo ukwiza Ufumu wa Ciuta, wakaŵazgora.’ (Luka 17:20) Ŵafarisi ŵakaŵa ŵalwani ŵa Yesu. Yesu wakayowoya kuti Ŵafarisi, ŵeneawo ŵakaŵa ŵapusikizgi, ŵazamunjira mu Ufumu wa Ciuta cara. (Mateyu 23:13) Antheura, usange Ŵafarisi ŵakenera kunjira cara mu Ufumu wa Ciuta, kasi nthena Ufumu ukaŵa mu mitima yawo? Nchambura macitiko! Ipo kasi Yesu wakang’anamurangaci?

Pakung’anamura mazgu gha Yesu agha, Mabaibolo ghanyake agho ghali kung’anamurikako makora, kang’anamuliro ka mazgu agha kakuyana na Baibolo la New World Translation. Mabaibolo ghanyake ghakuti Ufumu “uli pakati pinu.” Ni mwawuli umo Ufumu wa Ciuta ukaŵira pakati pa ŵanthu ŵa mu nyengo yira, kusazgapo Ŵafarisi? Kuluwa yayi kuti Yesu wakimikika na Yehova Ciuta kuti waŵe Fumu ya Ufumu uwu. Pakuŵa Fumu Yakusolekerathu, Yesu pa nyengo yira wakaŵa pakati pa ŵanthu awo wakayowoyanga nawo. Iyo wakasambizganga ŵanthu Ufumu wa Ciuta, ndiposo wakacitanga vyakuzizwiska vinandi. Vyose ivi vikalongora ivyo Ufumu wa Ciuta uzamucita kunthazi. Antheura, mbunenesko kuti Ufumu ukaŵa pakati pawo.

Kuyowoya unenesko, palije ukaboni wa mu Malemba wakuti Ufumu wa Ciuta uli mu mitima ya ŵanthu. Kweni Ufumu uwu ni boma lanadi, ndipo uzamusintha ukhaliro pano pa caru capasi kuti uzakaŵe uwemi, kufiska ivyo vikayowoyeka na ŵaprofeti kale.—Yesaya 9:6, 7; Daniel 2:44.