Sendelerani kwa Ciuta
Wakupulikiska Masuzgo Ghithu
“LUSUNGU ni para ine nkhumufipirani mtima para muli na masuzgo.” Umu ndimo mishonale munyake wa Ŵakaboni ŵa Yehova wakalongosolera mukhaliro wakuzirwa uwu. Yehova Ciuta ndiyo nchiyelezgero ciwemi comene ca lusungu. Vikumukhwaska comene usange ŵanthu ŵake ŵakusuzgika. Kasi tingasimikizga wuli kuti vikumukhwaska nadi Ciuta? Lusungu lwa Yehova lukalongoreka mu mazgu ndiposo ivyo Yesu wakacita apo wakaŵa pa caru capasi. (Yohane 5:19) Mwaciyelezgero, aghanaghanirani za cakucitika ico calongosoreka pa lemba la Yohane 11:33-35.
Apo mubwezi wake, Lazaro, wakafwa, Yesu wakaluta kukwake kwa Lazaro. Nchakuwonekerathu kuti ŵadumbu ŵa Lazaro, Mariya na Marita, ŵakaŵa na citima cikuru comene. Yesu wakatemwanga comene ŵanthu aŵa. (Yohane 11:5) Kasi wakacita wuli? Nkhani yose yikuti: “Ntheura Yesu, pakuti wamuwone [Mariya] wakulira, na Ŵayuda wuwo awo ŵakaŵa nayo ŵakulira, wakatampha mu mzimu na kukweŵeka, wakati, mwamuŵikankhu? Ŵakanena nayo, Fumu zani muwone. Yesu wakalira.” (Yohane 11:33-35) Cifukwa wuli wakalira? Mbunenesko kuti mubwezi wake wakafwa, kweni Yesu wakakhala pacoko kumuwuska ku ŵakufwa. (Yohane 11:41-44) Kasi cikaŵapo cinthu cinyake ico cikamucitiska citima comene?
Wonaniso mazgu gha mu Baibolo agho ghalembeka pacanya apa. Wonani kuti Yesu wakati wawona Mariya na awo ŵakaŵa nayo ŵakulira, “wakatampha” na “kukweŵeka.” Mazgu gha ciyowoyero ca Cigiriki agho ghali pa lemba ili ghakung’anamura citima cikuru.a Yesu wakakhwaskika comene na ivyo wakawona. Masozi agho ghakafumanga ghakalongora kuti wakaŵa na citima cikuru comene. Mtima wa Yesu ukakhwaskika na citima ico ŵanji ŵakaŵa naco. Kasi muli kulirapo cifukwa cakuti munthu uyo mukumutemwa wakaliranga?—Ŵaroma 12:15.
Lusungu lwa Yesu lukutovwira kusambira mikhaliro ndiposo nthowa za Ŵadada ŵake, a Yehova. Kumbukani kuti Yesu wakalongora makora comene mikhaliro ya Ŵadada ŵake mwakuti wakati: “Uyo wawona Ine, wawona na Ŵadada wuwo.” (Yohane 14:9) Ntheura, para tikuŵazga kuti “Yesu wakalira,” tingasimikizga kuti Yehova wakukhwaskika comene na masuzgo gha ŵasopi ŵake. Ŵalembi ŵa Baibolo ŵanyake nawo ŵakukhozgera fundo iyi. (Yesaya 63:9; Zekariya 2:8) Yehova ni Ciuta walusungu nadi!
Ŵanthu ŵakufwatuka na munthu walusungu. Para takhuŵazgika panji kusuzgika maghanoghano, tikuluta kwa munyithu uyo wangapulikiska masuzgo ghithu na kuticitira lusungu. Ipo tikwenera kukakika yayi kusendelera kwa Yehova, Ciuta walusungu uyo wakupulikiska ndiposo kukhwaskika na masuzgo ghithu.—Salmo 56:8.
[Mazgu ghamusi]
a Lizgu la Cigiriki ilo lili kung’anamurika kuti “wakalira” likung’anamura “kulira mwambura kufumya mazgu.” Mwakupambanako, lizgu ilo lili kugwiliskirika nchito kulongosora kulira kwa Mariya pamoza na ŵanji likung’anamura “kulira mwa kufumya mazgu.”