Kupeleka Kufumira Pasi pa Mtima
PA NKHANI ya kupeleka vyawanangwa, mpositole Paulosi wakalemba kuti: “Waliyose wacite umo wadumulira mu mtima wake.” Wakalembaso kuti: “Mwakukwenyelera cara panji mwakucicizgika, cifukwa Ciuta wakutemwa uyo wakupeleka mwakukondwa.” (2 Kor. 9:7) Yehova wakucicizga munthu yayi kuti wapelekenge vinthu kukhozgera kusopa kwaunenesko. Wakukhumba kuti ŵateŵeti ŵake ŵalongorenge ŵekha kuti mbakujipeleka, mwa kupeleka vinthu kufumira pasi pa mtima. Kufuma papo kale, ŵanthu ŵake ŵakujipeleka na mtima wose. Wonani viyelezgero vitatu.
Yehova wati wafumiska Ŵaisrayeli ku Eguputo, wakaŵaphalira kuti ŵazenge cihema. Pakakhumbikwiranga vinthu vyakuzengera, ndipo Ŵaisrayeli ŵakapempheka kuti ŵawovwirepo. Ntheura, “yose uyo wakawuskika na mtima wake” wakiza na golide, siliva, vitoweskero ndiposo vinthu vinyake. Ŵanthu ŵakapeleka mwawanangwa, mwakuti ŵakapharazga, kupempha ŵanthu kuti ŵaleke kwiza na vinthu vinyake.—Ex. 35:5, 21; 36:6, 7.
Peneapo tempele likaŵa pafupi kuzengeka, ŵanthu ŵa Ciuta ŵakaŵaso na mwaŵi wa kovwira, kulongora kuti ŵakukhozgera kusopa kwaunenesko. Themba Davide likapeleka vinthu vinandi comene kuti viwovwire pa mulimo uwu ndipo likapempha ŵanji kuti nawo ŵawovwirepo. Ŵanthu ŵakawovwirapo na mtima wose. Cikaŵa cakukondweska comene, cifukwa golide na siliva ivyo ŵanthu ŵakapeleka vikaŵa vinandi comene, vyeneivyo pasono vingagulika na ndalama zakujumpha madola 100 biliyoni gha ku America. Ŵanthu ŵakakondwa comene cifukwa ŵakapeleka vinthu vyawo kwa Yehova mwawanangwa.—1 Mid. 29:3-9; 2 Mid. 5:1.
Ŵalondezgi ŵa Yesu Khristu ŵakwambilira nawo ŵakapelekanga vinthu mwakukondwa. Pa zuŵa la Pentekoste 33 C.E., ŵanthu pafupifupi 3,000 ŵakabapatizika, ndipo ŵanandi mwa ŵanthu aŵa ŵakaŵa ŵa mu Yerusalemu yayi. Kuti ŵawovwire ŵanthu awo ŵakaŵa ŵakusoŵerwa, ŵeneawo ŵakeneranga kukhalira mu msumba uwu mwakuti ŵasambire vinandi vyakukhwaskana na cipulikano cawo ciphya, ŵabali ŵakapeleka vyawanangwa. Ŵakaguliska vinthu vyawo na kupeleka ndalama ku ŵapositole kuti ziwovwire ŵanthu aŵa. Yehova wakwenera kuti wakakondwa comene kuwona umo ŵabali aŵa ŵakalongolera cipulikano cawo ndiposo citemwa.—Mil. 2:41-47.
Mazuŵa ghano, Ŵakhristu ŵakukhozgera kusopa kwaunenesko mwa kupeleka vinthu mwawanangwa. Ŵakupeleka mwakukondwa nkhongono zawo, nyengo yawo ndiposo ndalama zawo. Ivyo vyalembeka mu bokosi ilo lili mu nkhani iyi, vikulongora umo tingapelekera vyawanangwa.
[Bokosi pa peji 18]
NTHOWA IZO ŴANYAKE ŴAKUPELEKERA
VYAWANANGWA VYA MULIMO WA PA CARU COSE
Ŵanyake ŵakupatura ndalama kuti ŵaponyenge mu bokosi lakulembeka kuti, “Vyakupeleka vya Mulimo wa pa Caru Cose.”
Mwezi uliwose, mipingo yikutumizga vyakupeleka ivi ku ofesi ya Ŵakaboni ŵa Yehova mu caru cawo. Ndalama izo munthu wakukhumba kupeleka payekha nazo zingatumizgika mwakudunjika ku Accounting Office, Watch Tower Bible and Tract Society, P.O. Box 30749, Lilongwe 3, Malawi, panji ku ofesi ya munthavi ya Ŵakaboni ŵa Yehova ya mu caru cake. Pa ceke ico cikutumizgika ku ofesi ya munthavi pakwenera kulembeka kuti ndalama zipelekeke ku “Watch Tower.” Vinthu vinyake vyakuzirwa ivyo Sosayite yingaguliska na kusanga ndalama navyo vingapelekeka. Para mwapeleka vinthu ivi, mulembe kalata yakulongosora kuti ni vyawanangwa.
VYAWANANGWA IVYO VIKUWEZGEKA PARA MWENEKO WAVIKHUMBA
Mungapeleka ndalama ku Watch Tower Bible and Tract Society kuti zigwirenge nchito ya pa caru cose. Ndipo ndalama zinu zingazakawezgeka usange mungazakazikhumba kunthazi. Kuti mumanye vinandi, fumbani ofesi ya munthavi mwa kulemba kalata panji kwimba telefoni pa nambara iyi: 01 762 111.
VYAWANANGWA VINYAKE IVYO MUNGAPELEKA
Padera pa kupeleka ndalama, paliso nthowa zinyake zakupelekera vyawanangwa vyakuti viwovwire pa mulimo wa Ufumu pa caru cose. Zinyake mwa izo ni izi:
Inshuransi: Mungalembeska kuti Watch Tower Bible and Tract Society ndiyo yizakapike ndalama zinu za inshuransi panji penshoni.
Maakaunti gha ku Banki: Mungayikizga Watch Tower Bible and Tract Society maakaunti ghinu gha ku Banki, vikalata vyakusungira ndalama ku banki, panji maakaunti gha ndalama izo mukusunga kuti muzakagwiliskire nchito para mwapumura pa nchito. Mungalemba kuti para mwafwa, Watch Tower Bible and Tract Society yizakatore vinthu ivi. Pakucita ivi, mukwenera kulondezga malango gha mabanki gha mu caru cinu.
Masheya: Mungapeleka masheya agho muli nagho mu kampani yinyake nga nchawanangwa ku Watch Tower Bible and Tract Society. Mungalembaso kuti para mwafwa Watch Tower Bible and Tract Society ndiyo yizakatore masheya ghinu.
Malo na Nyumba: Mungapeleka malo panji nyumba nga nchawanangwa ku Watch Tower. Vinthu ivi viŵe vyakuti vingaguliskika. Usange ni nyumba iyo mukukhalamo, mungalutilira kukhalamo apo mucali ŵamoyo. Pambere mundapeleke nyumba panji malo ghalighose, dumbiskanani dankha na ofesi ya munthavi ya mu caru cinu.
Kupeleka Ndalama ku Kampani Iyo Yikucitira Milimo Sosayite: Mungapeleka ndalama cilimika cilicose ku kampani iyo yikucitira Ŵakaboni ŵa Yehova milimo yinyake. Munthu wakusankha kuti wapelekenge ndalama ku kampani cilimika cilicose. Para mwacita nthena, ŵakumukhizgiraniko msonkho mu cilimika ico mwambira kupeleka ndalama izi.
Cuma Ico Cikhalenge Para Mwatayika: Mungalemba mu wilu yakuzomerezgeka na boma kuti Watch Tower Bible and Tract Society yizakapike katundu panji ndalama zinu para mwatayika. Para mu wilu yinu mwalemba kuti wupu wa cisopa ndiwo uzakapokere cigaŵa ca cuma cinu, mukulipira msonkho ukuru yayi.
Mazgu ghakuti “vyawanangwa vinyake ivyo mungapeleka,” ghakulongora kuti uyo wapelekenge vyawanangwa ivi wakwenera kunozgekera. Kuti awo ŵakukhumba kupeleka vyawanangwa ivi ku mulimo wa pa caru cose wa Ŵakaboni ŵa Yehova ŵawovwirike, ŵaŵazge burosha la mutu wakuti, Charitable Planning to Benefit Kingdom Service Worldwide, ilo lili mu Cingelezi na Cisipanishi. Burosha ili, likulongosora umo ŵanthu ŵangapelekera vyawanangwa mu nthowa zakupambanapambana, kwali apo ŵacali ŵamoyo panji kuti vizakapelekeke para ŵafwa. Pamanyuma pa kuŵazga burosha ili na kudumbiskana na ŵanthu awo ŵakuŵalongozga pa vinthu vyakukhwaskana na malango, ŵanandi ŵawovwirapo pa mulimo withu wa cisopa ndiposo wa kovwira ŵanthu ŵakusoŵerwa pa caru cose ndipo ŵacepeskako msonkho uwo ŵakuŵadumura. Mungasanga burosha ili mwa kufumba ku Ofesi ya Munthavi ku Accounting Office.
Kuti mumanye vinandi, mungimba telefoni ku ofesi ya munthavi panji kulemba kalata pa adiresi iyo yili pasi apa. Usange muli mu caru cinyake, mungalembera ku ofesi ya munthavi ya Ŵakaboni ŵa Yehova ya mu caru ico.
Accounting Office
Watch Tower Bible and Tract Society
P. O. Box 30749
Lilongwe 3, Malawi
Telefoni: 01 762 111