Kasi Mukusanga Cimwemwe Cifukwa ca “Kupeleka Mwalusungu”?
ŴAKHRISTU ŵakwambilira ŵa ku Filipi, ŵakapelekanga vyawanangwa kuti viwovwire pa kusopa kwaunenesko. Mu kalata iyo Paulosi wakaŵalembera, wakati: “Nkhuwonga Ciuta wane nyengo zose para nkhumukumbukani mu maŵeyelero ghane ghose cifukwa ca imwe mose, peneapo nkhuŵeya na cimwemwe, cifukwa ca cakupeleka cinu ku makani ghawemi, kufuma pa zuŵa lakwamba mpaka sono.” (Fil. 1:3-5) Paulosi wakakumbukiranga nyengo iyo Lidiya na ŵamumbumba yake ŵakabapatizikira, kweniso umo Lidiya wakaŵapokelelera ku nyumba yake apo ŵakapharazganga.—Mil. 16:14, 15.
Pakajumpha nyengo yitali yayi, mpingo ukapangika mu Filipi, ndipo kaŵiri kose mpingo uwu ukatumizga vyawanangwa kwa Paulosi apo wakaŵa ku Tesalonika, msumba uwo ukaŵa pa mtunda wa makilomita pafupifupi 160. (Fil. 4:15, 16) Pakati pajumpha vilimika vicoko waka, apo Ŵafilipi na ŵanji ŵa ku Makedoniya ŵakasuzgikanga na ‘ukavu ukuru,’ ŵakapulika za suzgo la Ŵakhristu ŵa mu Yerusalemu awo ŵakatambuzgikanga ndipo ŵakaŵa na mtima wakuŵawovwira. Paulosi wakapanikizgira kuti “ŵakacita kwakuluska apa.” Iyo wakalemba kuti: “Ŵakalutilira kutilomba na kuŵeyelera comene kuti ŵaŵe na mwaŵi wa kupeleka mwalusungu.”—2 Kor. 8:1-4; Rom. 15:26.
Vilimika pafupifupi 10 vikati vyajumphapo kufuma apo Ŵafilipi ŵakapokelera unenesko, ŵakalutilira kulongora mzimu wakupa. Ŵakati ŵapulika kuti Paulosi wali mu jele ku Romu, ŵakatuma Epafurodito kuti wakapeleke vyawanangwa vyawo. Uwu ukaŵa mtunda wa makilomita 1,287. Nchakuwonekerathu kuti Ŵakhristu ŵa ku Filipi ŵakawovwiranga Paulosi na cilato cakuti walutilire kukhozga ŵabali na kupharazga, nanga ni apo wakaŵa mu gadi.—Fil. 1:12-14; 2:25-30; 4:18.
Mazuŵa ghano, Ŵakhristu ŵaunenesko ŵakuwona kuti ni mwaŵi kovwirapo pa mulimo wa kupharazga Ufumu na kuzgora ŵanthu kuŵa ŵasambiri. (Mat. 28:19, 20) Ŵakukhozgera Ufumu mwa kupeleka nyengo yawo, nkhongono na ndalama zawo. Bokosi lakulondezgapo ili, likulongora nthowa izo mungawovwilirapo pa mulimo wa kupharazga.
[Bokosi pa mapeji 22, 23]
NTHOWA IZO ŴANYAKE ŴAKUPELEKERA
VYAWANANGWA PA MULIMO WA PA CARU COSE
Ŵanandi ŵakupatura ndalama kuti ŵaponyenge mu mabokosi gha vyakupeleka ghakulembeka kuti, “Mulimo wa pa Caru Cose.”
Mwezi uliwose, mipingo yikutumizga vyakupeleka ivi ku ofesi ya Ŵakaboni ŵa Yehova ya mu caru cawo. Pamwekha napo mungatumaso vyawanangwa vinu ku Accounting Office, Association of Jehovah’s Witnesses of Malawi Registered Trustees, P.O. Box 30749, Lilongwe 3, Malawi, panji ku ofesi ya mu caru cinu ya Ŵakaboni ŵa Yehova. Para mukukhumba kupeleka ceke, lembanipo kuti ndalama izi zipelekeke ku “Association of Jehovah’s Witnesses of Malawi Registered Trustees.” Vinthu vinyake vyakuzirwa navyo vingapelekeka. Pakupeleka vinthu ivi, mungalemba kalata yakudumura kulongosora vyawanangwa ivyo mwapeleka.
VYAWANANGWA IVYO VIKUWEZGEKA PARA MWENEKO WAVIKHUMBA
Mungapeleka ndalama ku Association of Jehovah’s Witnesses of Malawi Registered Trustees kuti zigwirenge nchito ya pa caru cose. Ndipouli, apo muzamuzikhumbira muzamupokaso. Kuti mumanye vinandi pa fundo iyi, fumbani ofesi ya munthavi mwa kulemba kalata panji kwimba telefoni pa nambara iyi: 01 762 111.
VYAWANANGWA VINYAKE IVYO MUNGAPELEKA
Padera pa kupeleka ndalama mwakudunjika, paliso nthowa zinyake izo mungawovwilirapo pa mulimo wa Ufumu wa pa caru cose. Zinyake mwa izo ni izi:
Inshuwalansi: Mungalembeska kuti Association of Jehovah’s Witnesses of Malawi Registered Trustees ndiyo yizakapike ndalama zinu za inshuwalansi panji penshoni.
Maakaunti gha ku Banki: Mungalembeska kuti Association of Jehovah’s Witnesses of Malawi Registered Trustees ndiyo yizakatore ndalama zinu para mwafwa. Kweniso mungalembeska kuti ndiyo yizakapokenge ndalama zinu za penshoni para mwapumura nchito. Pakucita ivi, mukwenera kulondezga malango gha mabanki gha mu caru cinu.
Masheya: Mungapeleka masheya agho muli nagho ku kampani yinyake nga nchawanangwa ku Association of Jehovah’s Witnesses of Malawi Registered Trustees. Mungalembaso kuti para mwafwa Sosayite ndiyo yizakatore masheya ghinu.
Malo na Nyumba: Mungapeleka malo panji nyumba nga nchawanangwa ku Association of Jehovah’s Witnesses of Malawi Registered Trustees. Vinthu ivi viŵe vyakuti vingaguliskika. Usange ni nyumba iyo mukukhalamo, mungalutilira kukhalamo apo mucali ŵamoyo. Pambere mundapeleke nyumba panji malo ghalighose, dumbiskanani dankha na ofesi ya munthavi ya mu caru cinu.
Kupeleka Ndalama ku Kampani Iyo Yikucitira Milimo Sosayite: Munthu wangapeleka ndalama ku kampani iyo yikucitira Ŵakaboni ŵa Yehova milimo yinyake.
Cuma Ico Cikhalenge Para Mwafwa: Mungalemba wilu yakuzomerezgeka na boma kuti Association of Jehovah’s Witnesses of Malawi Registered Trustees yizakapike katundu panji ndalama zinu para mwafwa. Para wilu yinu mwalemba kuti wupu wa cisopa ndiwo uzakapokere cuma cinu, mukulipira msonkho ukuru yayi. Kuti mumanye vinandi, mungimba telefoni ku ofesi ya munthavi panji kulemba kalata pa adiresi iyo yili pasi apa.
Accounting Office
Association of Jehovah’s Witnesses of Malawi Registered Trustees
P. O. Box 30749
Lilongwe 3, Malawi
Telefoni: 01 762 111