Kasi Mukulondezga Khristu na Mtima Wose?
“Nakuti ndimo mukwendera kale, . . . mulutilire kucita ici mwakukwana nkhanira.”—1 TES. 4:1.
1, 2. (a) Kasi ni vinthu wuli vyakuzirwa ivyo ŵanthu ŵakaviwona mu nyengo ya Yesu? (b) Cifukwa wuli nyengo iyo tilimo nayo njakuzirwa comene?
KASI muli kughanaghanirapo umo mukatenge muŵirenge ŵakukondwa muŵengeko apo Yesu wakaŵa pano pasi? Aghanaghanirani za mwaŵi uwo mukatenge muŵenge nawo, kucizgika na Yesu kweniso kufwatuka ku masuzgo, mukatenge muŵenge na citima yayi cifukwa ca masuzgo. Panji mukatenge mukhumbenge kusambizgika na Yesu ndiposo kumuwona wakucita minthondwe. (Mrk. 4:1, 2; Luka 5:3-9; 9:11) Ukate uŵenge mwaŵi wapadera comene kuŵapo apo Yesu wakacitanga milimo yose iyi. (Luka 19:37) Kufuma pa nyengo yira palije muwiro uwo wuli kuwonapo vinthu ivi, kweniso ivyo Yesu wakafiska “kwizira mu sembe yake” vizamuwerezgekaso yayi.—Heb. 9:26; Yoh. 14:19.
2 Nyengo iyo tilimo nayo njakuzirwa comene. Cifukwa wuli? Cifukwa ni nyengo iyo Malemba ghakuyowoya kuti ni “mazuŵa ghaumaliro” na “nyengo ya umaliro.” (Dan. 12:1-4, 9; 2 Tim. 3:1) Satana wali kucimbizgika kucanya mu nyengo ya umaliro iyi. Sonosono apa, wazamukakika na kuponyeka “mu cizongwe.” (Uvu. 12:7-9, 12; 20:1-3) Mu nyengo iyi tiliso na mwaŵi wa kupharazga “makani ghawemi gha ufumu,” pa caru cose capasi, kuphalira ŵanthu za cilindizga ca Paradiso uyo wizenge. Uwu ni mulimo uwo uzamuwerezgekaso yayi.—Mat. 24:14.
3. Pambere wandakwelere kucanya, kasi Yesu wakaŵaphaliraci ŵalondezgi ŵake, ndipo ici cikusazgapo vici?
3 Pambere wandakwelere kucanya, Yesu wakaphalira ŵalondezgi ŵake kuti: “Muzamuŵa ŵakaboni ŵane mu Yerusalemu na mu Yudeya mose na Samariya ndiposo ku vigaŵa vyakutali comene vya caru capasi.” (Mil. 1:8) Mulimo uwu ukusazgapo kusambizga ŵanthu pa caru cose capasi. Kasi cilato cake nchivici? Kuzgora ŵanthu kuŵa ŵasambiri, kusazgirako ŵalondezgi ŵa Khristu pambere umaliro undize. (Mat. 28:19, 20) Kasi tikwenera kucitaci usange tikukhumba kufiska mulimo wa Khristu?
4. (a) Kasi mazgu agho Petrosi wakayowoya pa 2 Petrosi 3:11, 12 ghakulongoraci? (b) Kasi tikwenera kuŵa maso na vici?
4 Wonani mazgu ghakuciska agho mpositole Petrosi wakayowoya, wakati: “Mughanaghanire mtundu wa ŵanthu uwo mukwenera kuŵa. Muŵe ŵanthu ŵa makhaliro ghatuŵa na kucita milimo ya kusopa Ciuta mwakujipeleka, uku mukulindilira na kukumbuka nyengo zose kuŵapo kwa zuŵa la Yehova.” (2 Pet. 3:11, 12) Mazgu gha Petrosi ghakulongora kuti nchakuzirwa comene kuŵa maso mu mazuŵa ghaumaliro agha na kuwoneseska kuti ivyo tikucita vikukolerana na milimo ya kusopa Ciuta. Milimo iyi yikusazgapo kupharazga makani ghawemi. Nchakukondweska comene kuwona ŵabali pa caru cose ŵakucita mwamwamphu mulimo uwo Khristu wali kutipa. Kweni tikwenera kuŵa maso comene kuti caru na kwananga uko tili kuhara vileke kutitondeska kucita na mtima wose mulimo uwu. Ntheura, tiyeni tiwone umo tingalongolera kuti tikulondezga Khristu na mtima wose.
Citani Milimo Iyo Ciuta Wamupani
5, 6. (a) Cifukwa wuli Paulosi wakalumba Ŵakhristu ŵa ku Yerusalemu, ndipo wakaŵacenjezgaci? (b) Cifukwa wuli tikwenera kuzirwiska mulimo withu?
5 Mu kalata iyo mpositole Paulosi wakalembera Ŵakhristu ŵa mu Yerusalemu, wakaŵawonga cifukwa ŵakazizipizga nthambuzgo. Wakati: “Lutilirani kukumbuka mazuŵa ghakwambilira, mu gheneagho mukati mwangweluskika, mukazizipizga ciphalizgano cikuru mu visuzgo.” Yehova wakakumbuka kugomezgeka kwawo. (Heb. 6:10; 10:32-34) Ŵakhristu Ŵacihebere ŵakwenera kuti ŵakakhozgeka comene na mazgu agha. Ndipouli, mu kalata iyi, Paulosi wakaŵacenjezga kuti para ŵasinthenge yayi cizgoŵi cinyake cambura kwenelera ico ŵakaŵa naco, ŵatondekenge kuteŵetera Ciuta na mtima wose. Wakati Ŵakhristu ŵangalekanga yayi kulondezga malango gha Ciuta panji kuŵa na pakugwenthera.—Heb. 12:25.
6 Mazuŵa ghano napo, Ŵakhristu ŵakuphalirika kuti ŵalutilire kucita mulimo wa Ciuta. Tikumanya kuti tikwenera kuzirwiska mulimo withu na kuyezgayezga kuwufiska. (Heb. 10:39) Vili ntheura, cifukwa cakuti kucita uteŵeti wakupatulika ni nkhani ya umoyo na nyifwa.—1 Tim. 4:16.
7, 8. (a) Kasi nchivici cingatovwira kuti tilutilire kucita mwamwamphu mulimo wa Ciuta? (b) Usange tawona kuti tiliso na mwamphu yayi, kasi tikwenera kukumbukaci za Yehova na Yesu?
7 Nchivici cingatovwira kuti tileke kugwentha milimo ya Ciuta? Tikwenera kughanaghanirapo comene pa cilapo cithu ca kujipatulira kwa Ciuta. Apo tikajipatuliranga, tikalayizga Yehova kuti kucita khumbo lake ndico ciŵenge cinthu cakwamba mu umoyo withu, ndipo tikukhumba kucita nga umo tikalayizgira. (Ŵazgani Mateyu 16:24.) Ntheura, nyengo na nyengo tijifumbenge kuti: ‘Kasi nicali kucita mwakukolerana na cilapo cane, nga umo nkhalayizgira pa zuŵa ilo nkhabapatizikanga? Kasi nicali na mwamphu nga umo nkhaŵira pakudankha?’
8 Usange tawona kuti tili na mwamphu viŵi yayi, tingacita makora kukumbuka mazgu agho Zefaniya wakayowoya. Wakati: “Mawoko ghako ghangalopwanga. Yehova, Ciuta wako, wali mukati mwako, wankhongono uyo wakumanya kuluska; wasekelere pa iwe na cimwemwe.” (Zef. 3:16, 17) Mazgu ghakukhozga agha wakaphaliranga Ŵaisrayeli awo ŵakawelera ku Yerusalemu kufuma ku wuzga ku Babuloni. Kweni ngakovwiraso ku ŵateŵeti ŵa Ciuta mazuŵa ghano. Pakuti mulimo uwo tikucita ngwa Yehova, tikwenera kukumbuka kuti Yehova na Yesu ŵakutovwira na kutikhozga kuti ticite makora mulimo uwu. (Mat. 28:20; Fil. 4:13) Usange tilutilirenge kucita mwamwamphu mulimo wake, Ciuta watitumbikenge ndiposo kutovwira kuti tilutilire kukura mwauzimu.
‘Penjani Dankha Ufumu’
9, 10. Ni fundo wuli yikuru iyo yili mu ntharika ya Yesu ya ciphikiro cikuru, ndipo tikusambirapo vici?
9 Apo wakaryanga mu nyumba ya mulara wa Ŵafarisi, Yesu wakataya ntharika ya ciphikiro cikuru. Mu ntharika iyi, wakalongosora za mwaŵi wa Ufumu wakucanya, uwo ŵanthu ŵakupambanapambana ŵakaŵa nawo. Wakalongora ico kugwentha mulimo cikung’anamura. (Ŵazgani Luka 14:16-21.) Ŵanthu awo ŵakacemeka ku ciphikiro ca mu ntharika ya Yesu ŵakapeleka vifukwa vyakupambanapambana ivyo ŵakatondekera kuluta ku ciphikiro. Wakwamba wakati wagura munda ndipo wakwenera kukawuwona. Munyake wakati wagura ng’ombe za joko ndipo wakakhumbanga kuti wakaziyezge. Ndipo wacitatu wakati: “Natora waka mwanakazi ndipo pa cifukwa ici ningiza cara.” Ŵanthu aŵa ŵakayowoya vifukwa vyambura kupulikikwa. Para munthu wagura ng’ombe za joko wakaziyezgerangathu pambere wandazitore, ntheura pakakhumbikwiranga kuti waziyezgeso yayi. Kweniso munthu wangatondeka kuluta ku ciphikiro cifukwa ca kutora yayi. Lekani uyo wakanozga ciphikiro ici wakakwiya comene.
10 Ŵateŵeti wose ŵa Ciuta wangasambirako ku ntharika iyi. Ŵangasambiraci? Vinthu ivyo tikutemwa kucita nga ni ivyo Yesu wakayowoya mu ntharika iyi vileke kutitimbanizga kuteŵetera Ciuta. Usange Mkhristu wakutangwanika comene na vyakukhumba vyake, mwamphu wake pa uteŵeti ukuzizima pacokopacoko. (Ŵazgani Luka 8:14.) Ntheura, tikwenera kulondezga ulongozgi wa Yesu wakuti: “Lutilirani kupenja dankha ufumu na urunji wake.” (Mat. 6:33) Nchakukhozga comene kuwona kuti ŵateŵeti ŵa Ciuta ŵalara na ŵacoko ŵakulondezga ulongozgi wakuzirwa uwu. Nakuti, ŵanandi ŵakukhala umoyo wambura kukhumba vinandi mwakuti ŵaŵe na nyengo yinandi yakuteŵetera. Mbakukondwa comene ndiposo mbakukhorwa na umoyo cifukwa ca “kupenja dankha ufumu.”
11. Ni nkhani wuli ya mu Baibolo iyo yikulongora kuzirwa kwa kuteŵetera Ciuta na mtima wose?
11 Kuti timanye kuzirwa kwa kuteŵetera Ciuta na mtima wose, tiyeni tiwone ivyo vikacitikira Joash Themba la Israyeli. Cifukwa ca kwenjerwa na Ŵasiriya awo ŵakaŵa pafupi kuwukira Israyeli, Joash wakaluta kwa Elisha, ndipo wakalira pamaso pake. Elisha wakamuphalira kuti wajure cidangazi na kuponya muvwi cadera ku Siriya, kulongora kuti Yehova waŵathaskenge. Themba ili likeneranga kukhozgeka comene na ivyo likaphalirika. Elisha wakaphaliraso Joash kuti watore mivwi na kulasa pasi. Joash wakalasa katatu pera. Elisha wakakalipa, cifukwa Joash walasenge pasi kankhondi panji kankhondi na kamoza wakatenge ‘wathereskenge Siriya wasuke wamare.’ Ntheura, Joash wakathereska Siriya katatu pera. Wakathereska katatu pera cifukwa cakuti wakaŵavya mwamphu. (2 Mathe. 13:14-19) Kasi tikusambirapo vici? Yehova watitumbikenge pekha usange tikumuteŵetera na mtima wose.
12. (a) Kasi nchivici citovwirenge kuti tilutilire kuteŵetera Ciuta mwamwamphu nangauli tingasuzgika? (b) Yowoyani vyandulo ivyo mwasanga cifukwa ca kuteŵetera Yehova mwamwamphu.
12 Masuzgo ghakucitiska kuti tileke kuteŵetera Ciuta mwamwamphu. Ŵabali na ŵadumbu ŵanandi ŵakusuzgika na ukavu. Ŵanyake ŵakutondeka kuteŵetera Yehova mwakufikapo cifukwa ca ulwari wambura kukonda munkhwala. Ndipouli, tose tingayezgayezga kuti tilutilire kuŵa ŵamwamphu ndiposo kulondezga Khristu na mtima wose. Wonani ghanyake mwa masacizgo agho ghalembeka mu bokosi lakuti “Ivyo Vingamovwirani Kuti Mulutilire Kulondezga Khristu.” Apo mukuŵazga masacizgo agha, muwonenge umo mungacitira kuti mughalondezge. Para mulondezgenge, musangenge vyandulo. Kulimbikira kucita uteŵeti nkhwakovwira comene. Kukutovwira kuti tiŵe na mtende mu mtima. (1 Kor. 15:58) Nakuti, kuteŵetera Ciuta na mtima wose kukutovwira “kulindilira na kukumbuka nyengo zose kuŵapo kwa zuŵa la Yehova.”—2 Pet. 3:12.
Jisandani
13. Kasi tingamanya wuli usange tikuteŵetera na mtima wose?
13 Kweni nchiwemi kukumbuka kuti kuteŵetera Yehova na mtima wose vikuthemba pa unandi wa nyengo iyo tikumalira mu uteŵeti yayi. Masuzgo agho tikukumana nagho ghakupambana. Munthu uyo wakumalira ora limoza panji ghaŵiri mu uteŵeti wangakondweska Yehova usange ndivyo wangafiska nadi mwakuyana na nkhongono zake. (Yaniskani na Mariko 12:41-44.) Mwantheura, kuti timanye ico kuteŵetera Ciuta na mtima wose kukung’anamura tikwenera kusanda umo tikucitira kuyana na ukhaliro withu. Pakuŵa ŵalondezgi ŵa Khristu, nase tikukhumba kuŵa na kaghanaghaniro kakuyana na kake. (Ŵazgani Ŵaroma 15:5; 1 Ŵakorinte 2:16.) Nchivici ico Yesu wakaŵikanga pakwamba mu umoyo wake? Wakaphalira wumba ku Kaperenaumu kuti: “Nkhwenera kupharazga makani ghawemi gha ufumu wa Ciuta, pakuti ndico nkhatumikira.” (Luka 4:43; Yoh. 18:37) Pakughanaghanira mwamphu uwo Yesu wakaŵa nawo mu uteŵeti, jisandani na kuwona vinthu ivyo mungasintha mwakuti muteŵeterenge na mtima wose.—1 Kor. 11:1.
14. Kasi tingacita wuli kuti tisazgireko uteŵeti withu?
14 Usange tingasanda umo ukhaliro withu uliri, panji tingawona kuti tingakhumbikwira kusazgirako nyengo iyo tikumalira mu uteŵeti. (Mat. 9:37, 38) Mwaciyelezgero, ŵawukirano ŵanandi awo ŵamalizga sukulu ŵasazgirako uteŵeti. Ŵanji ŵakucita upayiniya mwamwamphu ndipo mbakukondwa comene. Kasi namwe mukukhumba kuti muŵe ŵakukondwa? Ŵabali na ŵadumbu ŵanji ŵasanda ukhaliro wawo ndipo ŵasankha kukateŵetera uko kukukhumbikwira ŵapharazgi ŵa Ufumu ŵanandi, mu caru cawo panji cinyake. Nakuti ŵanji ŵasambira ciyowoyero cinyake mwakuti ŵapharazgirenge ŵanthu ŵa ciyowoyero ico. Nangauli nchipusu yayi kusazgirako uteŵeti, kweni tikutumbikika comene cifukwa tikovwira ŵanthu ŵanandi “kumanya makora unenesko na kuponoskeka.”—1 Tim. 2:3, 4; 2 Kor. 9:6.
Londezgani Viyelezgero vya mu Baibolo
15, 16. Kasi mbanjani awo tingatolerako ciyelezgero kuti tilondezgenge Khristu na mtima wose?
15 Kasi ŵanthu awo ŵakazgoka ŵapositole ŵakacita wuli apo Khristu wakaŵacema kuti ŵaŵe ŵalondezgi ŵake? Pakuyowoya za Mateyu, Baibolo likuti: “Wakati wasida vyose kumasinda wakawuka na kwamba kumulondezga.” (Luka 5:27, 28) Ndipo pakuyowoya za Petrosi na Andireya, ŵeneawo ŵakaŵa ŵalovi, tikuŵazga kuti: “Nyengo yeneyiyo, ŵakasida mikwawu yawo, ŵakamulondezga.” Pamanyuma Yesu wakawona Yakobe na Yohane, ŵeneawo ŵakatandanga mikwawu yawo pamoza na ŵawiskewo. Kasi ŵakacita wuli Yesu wati waŵacema? “Nyengo yeneyiyo, ŵakaleka boti na wiskewo, ŵakamulondezga.”—Mat. 4:18-22.
16 Ciyelezgero cinyake ni Saulosi, uyo wakazakaŵa mpositole Paulosi. Nangauli wakatambuzganga ŵalondezgi ŵa Khristu, wakasintha na kuŵa ‘ciŵiya cakusoleka’ cakuyeghera zina la Khristu. “Nyengo yeneyiyo, wakamba kupharazga Yesu mu masunagoge, kuti Iyo uyu ni Mwana wa Ciuta.” (Mil. 9:3-22) Nangauli wakazizipizga nthambuzgo na masuzgo ghanandi, Paulosi wakalutilira kuteŵetera mwamwamphu.—2 Kor. 11:23-29; 12:15.
17. (a) Pa nkhani ya kulondezga Khristu, kasi muli na cilato wuli? (b) Kasi tikusanga vitumbiko wuli cifukwa ca kucita khumbo la Yehova na mtima wose?
17 Tikukhumba kucita nga mbasambiri ŵa Yesu na kuteŵetera na mtima wose ndiposo kwambura kunyunyuta. (Heb. 6:11, 12) Apo tikuyezgayezga kulondezga Khristu na mtima wose, kasi tikutumbikika wuli? Tikukondwa comene pakucita khumbo la Ciuta ndipo tikuŵa ŵakukhorwa cifukwa ca kuzomera uteŵeti ŵakusazgikira mu mpingo. (Sal. 40:8; ŵazgani 1 Ŵatesalonika 4:1.) Apo tikulimbikira kulondezga Khristu na mtima wose, tikusanga vitumbiko vyambura kumara. Tikuŵa ŵakukhorwa, tikuŵa paubwezi na Ciuta, tikuŵa na mtende, kweniso tili na cigomezgo ca umoyo wamuyirayira.—1 Tim. 4:10.
Kasi Mukukumbuka?
• Kasi tapika mulimo wuli wakuzirwa, ndipo tikwenera kuwuwona wuli?
• Kasi nchizgoŵi wuli ico kanandi ŵanthu ŵakuŵa naco ico tikwenera kugega ndipo cifukwa wuli?
• Cifukwa wuli tikwenera kujisanda?
• Ni vinthu wuli ivyo vitovwirenge kulutilira kulondezga Khristu?
[Bokosi/Cithuzithuzi pa peji 27]
Ivyo Vingamovwirani Kuti Mulutilire Kulondezga Khristu
▪ Ŵazgani Mazgu gha Ciuta zuŵa lililose na kulanguruka pa ivyo mwaŵazga.—Sal. 1:1-3; 1 Tim. 4:15.
▪ Lombani kwa Ciuta kuti wamovwirani na kumulongozgani na mzimu wake.—Zek. 4:6; Luka 11:9, 13.
▪ Cezgani na awo ŵakuteŵetera Ciuta na mtima wose.—Zinth. 13:20; Heb. 10:24, 25.
▪ Manyani kuti tikukhala mu mazuŵa ghaheni.—Efe. 5:15, 16.
▪ Manyani uheni wa kuleka kuteŵetera Ciuta.—Luka 9:59-62.
▪ Nyengo na nyengo mughanaghanirenge cilapo cinu ca kujipatulira kwa Ciuta na vitumbiko ivyo mwasanga cifukwa ca kuteŵetera Yehova na kulondezga Khristu na mtima wose.—Sal. 116:12-14; 133:3; Zinth. 10:22.