Baibolo Likusintha Umoyo wa Ŵanthu
Nchivici cikapangiska msungwana munyake uyo wakaleka kulondezga ivyo ŵapapi ŵake ŵakamusambizga vyakukhwaskana na kusopa kuti wambireso kusopa? Ŵazgani ivyo wakayowoya.
“Sono namanya cifukwa ico niliri wamoyo.”—LISA ANDRÉ
CILIMIKA ICO WAKABABIKIRA: 1986
UKO WAKABABIKIRA: LUXEMBOURG
UMO WAKAŴIRA: WAKAŴA MWANA WAKUZGEŴA
UMO NKHAŴIRA KALE: Nkhakulira mu tawuni yicoko ya Bertrange iyo yili kufupi na msumba wa Luxembourg. Tawuni iyi njakutowa, njisambazi, ndiposo muli civikiliro. Kwithu tiliko ŵana ŵankhondi, ndipo ine ndine waumaliro. Ŵapapi ŵane Mbakaboni ŵa Yehova, ndipo ŵakalimbikira comene kusambizga ŵadumbu ŵane, ŵakuru ŵane na ine kuti tilondezgenge ivyo Baibolo likusambizga.
Nkhati naŵa waka mwali nkhamba kukayikira comene ivyo Ŵakaboni ŵa Yehova ŵakusambizga. Pakwamba nkhasurako waka ivyo nkhakayikiranga, kweni pacoko na pacoko cipulikano cane cikamba kucepa. Ŵapapi ŵane ŵakayezgayezga kunovwira, kweni nkhakana kovwirika. Ŵapapi ŵane ŵakamanyanga yayi kuti nkhacezganga na ŵawukirano ŵanyane awo ŵakakananga kuti munthu waŵaphalirenge cakucita. Nkhakhumbanga kuŵa na wanangwa uwo ŵanyane aŵa ŵakawonekanga kuti ŵali nawo. Tikacitanga viphikiro, tikagonananga na ŵanalume ŵakupambanapambana, ndiposo tikamwanga comene phere na minkhwala yakukanizgika. Pakwamba nkhakondwanga kuti nili na ŵanthu awo ŵakuwoneka kuti ŵakusangwa comene na umoyo.
Kweni kuyowoya unenesko nkhaŵa wakukondwa yayi. Nkhawonanga kuti umoyo wane ngwawakawaka cifukwa nkhacezganga na ŵanthu awo ŵakapwelerangako cilicose yayi. Panekha nkhakwenyeleranga comene na vinthu vyambura urunji ivyo vikucitika mu caru. Nyengo yikati yajumphapo nkhamba kusuzgika comene maghanoghano.
UMO BAIBOLO LIKASINTHIRA UMOYO WANE: Apo nkhaŵa na vilimika 17, zuŵa linyake nkhasuzgika comene maghanoghano. Amama ŵakati ŵawona kuti nkhukondwa yayi, ŵakanipempha kuti nisambireso Baibolo. Ŵakaniciska kuti nisande makora ivyo Baibolo likusambizga ndipo pamanyuma nisankhe nekha usange ni viwemi kuvilondezga panji yayi. Ivyo tikadumbiskana na amama pa zuŵa ili vikasintha comene umoyo wane. Nkhazomera kusambiraso Baibolo na mukuru wane Caroline na mfumu wake Akif. Akif wakaŵa Kaboni wa Yehova kwamba pa wanici yayi, kweni wakacita kusambira wakati wakura. Pakuti Akif wakakura kuti ni Kaboni yayi, nkhawona kuti ningafwatuka kuyowoya nayo, ndipo ici cikaŵa cakovwira comene kwa ine.
Nkhamanyanga kuti ivyo nkhacitanga vikaŵa vyakwenelera yayi kwa Kaboni wa Yehova, kweni pakwamba nkhawonanga kuti ivyo nkhucita vikukhwaska waliyose yayi. Ndipouli, cifukwa ca kusambira Baibolo nkhawona kuti ivyo nkhucita vingamukondweska Yehova panji kumukwiyiska. (Salmo 78:40, 41; Zintharika 27:11) Nkhamanyaso kuti vikukhwaskaso ŵanthu ŵanyake.
Apo nkhalutilira kusanda Baibolo, nkhawona kuti pali vifukwa vyakupulikikwa vya kuligomezgera kuti ni Mazgu gha Ciuta. Mwaciyelezgero, nkhasambira kuti maucimi ghanandi gha mu Baibolo ghafiskika, kulongora kuti Baibolo likuneneska. Kumanya fundo izi kukanovwira kuti nimazge maghanoghano ghakukayikira agho nkhaŵa nagho pakwamba.
Cilimika cimoza cikati cajumphapo kufuma apo nkhambira kusambira Baibolo, ine na ŵapapi ŵane tikaluta kukawona mudumbu wane mulara uyo wakateŵeteranga pa Ofesi ya Ŵakaboni ŵa Yehova ku Germany. Nkhati nawona umo mudumbu wane wakukondwera, nkhadokera comene. Nane nkhakhumbanga kuti niŵe wakukondwa nthena. Nkhadokeraso Ŵakaboni ŵa Yehova ŵanyake awo wali kujipeleka kuteŵetera ku malo agha. Ŵakaŵa ŵakupambana comene na ŵanthu awo nkhacezganga nawo pakwamba, awo ŵakaŵa ŵambura kugomezgeka ndipo ŵakaghanaghananga vya kusangwa pera. Pakati pajumpha nyengo yicoko waka, nkhalomba kwa Yehova, nkhamulayizga kuti nimuteŵeterenge umoyo wane wose. Apo nkhaŵa na vilimika 19, nkhajipatulira kwa Yehova ndipo nkhabapatizika.
UMO NASANGIRA CANDULO: Sono namanya cifukwa ico niliri na umoyo. Nkhusangwa comene kusambizga ŵanji Baibolo, na kuŵawovwira kuti ŵamanye Yehova ndiposo ivyo walayizga munthazi. Ŵapapi na ŵabali ŵane nawo ŵasanga candulo. Ŵakufipaso nane mtima yayi.
Nkhumanya ivyo nkhabudiskanga pakwamba, kweni nkhuyezgayezga kuti nileke kuvighanaghanira comene. Nkhughanaghanira comene umo Yehova wanigowokelera na umo wakunitemwera. Na mtima wose nkhukolerana na mazgu gha pa Zintharika 10:22 agho ghakuti: “Thumbiko la Yehova likusambazga, ndipo kuti wakusazgako citima cara.”
[Mazgu Ghakukhozgera pa peji 12]
“Tikacitanga viphikiro, tikagonananga na ŵanalume ŵakupambanapambana, ndiposo tikamwanga comene phere na minkhwala yakukanizgika”
[Mazgu Ghakukhozgera pa peji 13]
“Nkhumanya ivyo nkhabudiskanga pakwamba, kweni nkhuyezgayezga kuti nileke kuŵika maghanoghano pa vinthu ivi”