Para Mukulwara Matenda Ghakuru

Linda uyo wali na vyaka 71, wakati: “Nkhati namanya kuti nili na kansa ya mu maphapu kweniso ya mu matumbo, nkhawona nga kuti nafwa kale. Kweni nkhati nawerako ku chipatala, nkhaghanaghanirapo kuti nangauli ndivyo nkhakhazganga yayi kweni nkhenera kusanga nthowa ya umo ningazizipizgira.”

Elise uyo wali na vyaka 49, wakati: “Nkhalwara nthenda yakuŵinya chomene iyo yikakora manevu (nerves) gha ku thama la kumazere. Nyengo zinyake nkhapulikanga vyakuŵinya chomene mwakuti nkhasuzgikanga maghanoghano. Kanandi nkhajiwonanga kuti nili nekha ndipo nkhaghanaghananga vyakujikoma.”

PARA imwe panji munthu uyo mukumutemwa walwara nthenda yakofya chomene, mungasuzgika chomene maghanoghano. Imwe panji ŵachibali mungamba kufipa mtima na umo vinthu viliri. Kweniso mungachita wofi panji kwenjerwa kukakumana na dokotala, umo mungasangira wovwiri panji ndalama zakulipilira ku chipatala, ndiposo masuzgo agho mukusangana nagho chifukwa cha kumwa mankhwala agho ŵamupani. Chifukwa cha vyakuŵinya vya matenda, munthu wangasuzgika maghanoghano.

Kasi ni nkhu uko tingasanga wovwiri? Ŵanandi ŵawona kuti kulomba kwa Yehova na kuŵerenga mavesi ghakupembuzga gha mu Baibolo kukuŵawovwira chomene. Kweniso ŵamumbumba na ŵabwezi ŵithu ŵangatovwira.

UMO ŴANYAKE ŴAZIZIPIZGIRA

Robert uyo wali na vyaka 58, wakati: “Gomezgani Chiuta ndipo wamovwiraninge kuti muzizipizge apo mukulwara. Lombani kwa Yehova na kumuphalira umo mukujipulikira. Lombani kuti wamupani mzimu wake utuŵa kweniso nkhongono zakuzizipizgira. Para mwazizipizga vingawovwira chomene banja linu.”

Iyo wakayowoyaso kuti: “Vikovwira chomene para ŵamubanja lako ŵakukupembuzga. Zuŵa lililose munthu yumoza panji ŵaŵiri ŵakunifumba za umoyo wane. Ŵabwezi ŵane ŵakunikhozga chomene. Ŵakunovwira kuti nijipulikengeko makora, ndipo ivi vikunovwira kuti nizizipizge.”

Usange mwamuwona mulwari uyo ni mubwezi winu, wonani ivyo Linda wakayowoya. Wakati: “Mulwari nayo wakukhumba kuti wakhalenge makora nga umo ŵanthu wose ŵakukhalira, ndipo wangatemwa yayi kuti nyengo zose muyowoyenge waka vya ulwari wake. Ntheura yowoyani vinthu ivyo mukutemwa kuchezga na mubwezi winu.”

Nangauli tingaŵa kuti tikulwara matenda ghakuru, kweni tingalutilira kuwona umoyo kuŵa wakuzirwa para Chiuta wangatipa nkhongono, kweniso para Baibolo lingatipembuzga. Ŵamubanja na ŵabwezi ŵithu nawo ŵangatikhozga.

Mavesi gha mu Baibolo Agho Ghangamovwirani

Gomezgani Chiuta.

“Nkhafumba Yehova, ndipo wakanizgora. Wakanithaska ku wofi wane wose. Wakuyuyuka uyu wakachema, ndipo Yehova wakapulika.”—Salimo 34:4, 6.

Linda uyo tangumuzunura kukwambilira kwa nkhani iyi, wakati: “Nindalombepo kuti, ‘Yehova nichizgani.’ Kweni nyengo zose nkhalombanga kuti, ‘Novwirani kuti niŵe na nkhongono kweniso novwirani kuti nizizipizge suzgo lane.’”

Ŵazgani Mazgu gha Chiuta kuti musange nkhongono.

“Pazamuŵavya munthu wakukhala mu charu uyo wazamuti: ‘Nalwara.’”—Yesaya 33:24.

Ghanaghanirani ivyo Chiuta walayizga. Ivi vimovwiraninge kuti muŵe na chigomezgo na kusanga nkhongono zakuzizipizgira.

Pemphani wovwiri ku ŵabali na ŵabwezi ŵinu.

“Mubwezi wanadi wakutemwa nyengo zose, ndipo ni mubali uyo wali kubabikira kovwira mu suzgo.”—Zintharika 17:17.

Elise uyo tangumuzunura kukwambilira kwa nkhani iyi, wakati: “Kutemwa kukhala pamwekha yayi. Zomerani wovwiri uwo ŵabwezi ŵinu ŵangamupani. Nyengo zinyake mungajiwona kuti muli mwekha kweniso mungawona nga Chiuta wangamupulikani yayi, kweni ntchiwemi yayi kujipatura.”