Wovwirani Ŵanthu Kutegherezga kwa Ciuta
1. Kasi pa ungano wa cigaŵa wa caka camara, pakafuma maburosha wuli, ndipo cifukwa wuli ghaŵenge ghakovwira?
1 Pa ungano wa cigaŵa wakuti “Ufumu wa Ciuta Wize!” wa caka camara pakafuma maburosha ghaŵiri, Tegherezgani kwa Ciuta na Kuŵa Ŵamoyo Kwamuyirayira na linyake lakuti Tegherezgani kwa Ciuta. Pakuti ghali na mazgu ghacoko, ngapusu kung’anamura. Nakuti apo burosha la Tegherezgani kwa Ciuta na Kuŵa Ŵamoyo Kwamuyirayira likafumanga, likaŵa kuti lang’anamurika kale mu viyowoyero 431.
2. Kasi mbanjani awo ŵawovwirikenge na maburosha agha?
2 Kasi mbanjani awo ŵawovwirikenge na maburosha agha? Wonani vyakucitika ivyo vili pasi apa ivyo ŵapharazgi ŵakukumana navyo pa caru cose:
• Mupharazgi wakudumbiskana na munthu, kwali mphaulendo wakwamba panji wakuwelerako, ndipo wamanya kuti ni mulemwa kuŵazga panji wakusuzgikira pakuŵazga.
• Mubali panji mudumbu wakupharazga mu ciyowoyero ico tilije mabuku mu ciyowoyero ico, panji ngacoko. Panji ŵanthu ŵanandi mu cigaŵa ŵakutondeka kuŵazga ciyowoyero cawo.
• Mupharazgi wakupharazga mu ciyowoyero ca mawoko ku ŵanthu awo ŵali na suzgo ya kupulika.
• Mupapi wakukhumba kusambizga mwana wake uyo wakumanya yayi kuŵazga.
3. Kasi mu burosha la Tegherezgani kwa Ciuta muli vici?
3 Ivyo Vili mu Maburosha Agha: Burosha la Tegherezgani kwa Ciuta lili na mazgu ghacoko comene. Mapeji ghanandi ghali waka na sentesi yimoza na Lemba ilo likulongosora fundo yikuru musi mwa peji lililose. Cifukwa wuli lili kulembeka nthena? Yelezgerani kuti munthu wamupani buku ilo lili mu ciyowoyero ico mukucimanya yayi. Alufabeti yake nayo mukuyimanya yayi. Kasi mung’anweka kuŵazga buku lanthena, nanga lingaŵa na vithuzithuzi vyakutowa? Na pacoko pose! Ndimo vikuŵira na awo ŵakumanya yayi kuŵazga para taŵapa buku ilo lili na mazgu ghanandi. Lekani pa peji lililose pali vithuzithuzi. Vithuzithuzi ivi vili na vimanyikwiro ivyo vimovwiraninge kuti mumanye cithuzithuzi ico mudumbiskanenge para mwafuma pa cinyake.
4. Kasi mu burosha la Tegherezgani kwa Ciuta na Kuŵa Ŵamoyo Kwamuyirayira muli vici?
4 Vithuzithuzi ivyo vili mu burosha la Tegherezgani kwa Ciuta na Kuŵa Ŵamoyo Kwamuyirayira vikuyana waka na ivyo vili mu Tegherezgani kwa Ciuta. Lili kulembekera awo ŵakusuzgikira kuŵazga na awo ŵakusambira sono kuŵazga. Burosha ili lingawovwiraso mupharazgi para wakusambira na munthu mu burosha la Tegherezgani kwa Ciuta. Pakwambilira pa sambiro lililose pali fumbo, ilo likuzgoreka pa mapeji ghaŵiri. Kweniso lili na malemba ndiposo mazgu agho ghakulongosora vithuzithuzi. Kufupi na kuumaliro, ca kumalyero panji kumazere, kwa mapeji ghanandi kuli bokosi ilo lili na malemba kweniso fundo zakusazgikira izo mungadumbiskana kuyana na mahara gha msambiri.
5. Kasi mphawuli apo tingagaŵira maburosha agha, ndipo tingacita wuli?
5 Umo Mungacitira na Maburosha Agha: Para mukupharazga ku nyumba na nyumba mungagaŵira burosha lililose kuyana na umo vinthu viliri. Mu mwezi uwo tikugaŵira mabuku ghanyake, napo tingagaŵira. (Wonani bokosi lakuti “Umo Mungagaŵira Maburosha Agha.”) Mungagaŵiraso para mukuwelerako. Mungamuphalira kuti muli na kabuku kanyake ako mukukhumba kumupa, na kumupa.
6. Kasi tingacita wuli para tikusambira na ŵanthu maburosha agha?
6 Pakuti burosha la Tegherezgani kwa Ciuta lilije mafumbo, tisambirenge na ŵanthu mwa mafumbo na mazgoro yayi nga umo tikucitira na buku la Baibolo Likusambizgaci. Kulikose ŵanthu ŵakutemwa kutegherezga nkhani. Ipo para mukudumbiskana cithuzithuzi, longosorani nkhani ya mu Baibolo iyo yikukolerana na cithuzithuzi ico. Longosorani mwakuthukutera. Pemphani msambiri kuti wayowoyepo maghanoghano ghake pa ivyo wakuwona. Ŵazgani malemba agho ghali musi mwa peji, ndipo dumbiskanani. Fumbani mafumbo kuti nayo wayowoyengepo, kweniso kuti mumanye kuti wapulikiska. Usange mukusambira nayo burosha la Tegherezgani kwa Ciuta na Kuŵa Ŵamoyo Kwamuyirayira, ŵazgani mazgu agho ghakulongosora vithuzithuzi na malemba para mukudumbiskana cithuzithuzi cilicose.
7. Kasi tingamovwira wuli msambiri withu kuti wakure mwauzimu?
7 Wovwirani Msambiri Kukura Mwauzimu: Tikugomezga kuti para mwamalizga kusambira na munthu maburosha agha, vimupenge njara yakuti wasambire kuŵazga mwakuti wamanye Yehova payekha. (Mat. 5:3; Yoh. 17:3) Mwantheura, usange mwasambiranga na munthu burosha la Tegherezgani kwa Ciuta, mungamupempha kuti mumusambizge kuŵazga, ndipo mungamba kusambira nayo burosha la Tegherezgani kwa Ciuta na Kuŵa Ŵamoyo Kwamuyirayira. Para mwamalizga kusambira nayo maburosha agha, msambiri wangabapatizika yayi. Mukwenera kwamba kusambira nayo buku la Baibolo Likusambizgaci panji buku linyake lakwenelera. Ici covwirenge kuti msambiri winu wapulikiske Baibolo.
8. Cifukwa wuli tikuwonga pakuŵa na maburosha ghaphya agha?
8 Kuti ŵanthu ŵaŵe na umoyo wamuyirayira ŵakwenera kutegherezga kwa Fumu ya cilengiwa cose. (Yes. 55:3) Ciuta wakukhumba kuti “ŵanthu ŵa mitundu yose” ŵategherezgenge kwa iyo, kusazgapo awo ŵakumanya yayi kuŵazga. (1 Tim. 2:3, 4) Tikuwonga comene cifukwa ca kuŵa na maburosha ghaphya agha. Ghatovwirenge pakusambizga ŵanthu kutegherezga kwa Ciuta.
[Bokosi pa peji 3]
Umo Mungagaŵira Maburosha Agha
Mulongorani munthu peji 2 na 3, na kumufumba kuti: “Kasi mungatemwa kukhala mu malo ghakutowa nga ni agha? [Mulekani wazgore.] Baibolo likulayizga kuti sonosono apa Ciuta wanozgenge caru capasi. Caru cose cizamuŵa cakutowa, ndipo pazamuŵavya mukavu panji mulwari. Wonani ivyo tikwenera kucita kuti tizakaŵemo. [Ŵazgani Yesaya 55:3] Vesi ili likutiphalira kuti, ‘tize’ kwa Ciuta na ‘kupulika’ panji kutegherezga kwa iyo. Kweni kasi tikutegherezga wuli kwa Ciuta?” Julani peji 4 na 5, na kudumbiskana nayo zgoro. Usange ngwakutangwanika, mulekerani burosha na kupangana nayo zuŵa kuti muzakazgore.