Pharazgani Kuti Munthu Wanweke
1. Kasi umo Ŵakhristu ŵakwambilira ŵakapharazgiranga, ise tikusambirako vici?
1 Ŵakhristu ŵakwambilira ŵakapharazganga makani ghawemi ku ŵanthu ŵamitundu na visopa vyakupambanapambana. (Kol. 1:23) Nangauli uthenga ukaŵa wakuyana, kweni ŵakasinthanga upharazgi kuyana na ŵategherezgi. Apo Petrosi wakayowoyanga ku Ŵayuda awo ŵakamanyanga na kucindika Malemba, wakamba na kuyowoya ivyo nchimi Joyeli yikacima. (Mil. 2:14-17) Kweni wonani umo Paulosi wakadumbiskirana na Ŵagiriki pa Milimo 17:22-31. Lero napo, ŵanthu ŵanyake mu vigaŵa ivyo tikupharazgako ŵakutemwa Mazgu gha Ciuta, ndipo tingaŵajulira Baibolo apo tikupharazga kunyumba na nyumba. Kweni tikwenera kucita mwamahara usange tikupharazgira ŵanthu awo Baibolo ŵakulitemwa yayi, panji vya cisopa ŵalije navyo nchito, panyake awo ŵali mu visopa ivyo ni Vyacikhristu yayi.
2. Kasi tingaŵagaŵira wuli mabuku, magazini, tumapepara na maburosha, awo ŵakutemwa Mazgu gha Ciuta na awo ŵakughatemwa yayi?
2 Kugaŵira Mabuku, Magazini, Tumapepara na Maburosha: Mu cilimika cino ca uteŵeti, mabuku na vinthu vinyake ivyo tigaŵirenge mu uteŵeti visinthenge para pajumpha myezi yiŵiri yiliyose. Tigaŵirenge, magazini, mathirakiti, na maburosha. Usange mu cigaŵa cinu ŵanthu ŵakulitemwa yayi Baibolo, tingaŵagaŵira ivyo iwo ŵangatemwa. Vingacitika kuti pa ulendo wakwamba tingaŵazga yayi lemba nesi kuyowoyapo fundo ya mu Baibolo, kweni para munthu wanweka, tingawelerako mwakuti timovwire kuti waŵe na cipulikano mwa Mlengi na Mazgu ghake. Kweni usange tikupharazgira ŵanthu awo ŵakutemwa Mazgu gha Ciuta, ivyo tiyowoyenge na kugaŵira vikwenera kulongora kuti tikuyowoya na munthu uyo wakucindika Baibolo. Tingagaŵira buku la Baibolo likusambizgaci, panji maburosha gha Tegherezgani kwa Ciuta panji Tegherezgani kwa Ciuta na kuŵa na umoyo ŵamuyirayira pa nyengo yiliyose, nanga kungaŵa kuti ndivyo tikugaŵira yayi mu mwezi uwo. Cikuru tayowoya mu nthowa iyo munthu wanganweka na uthenga uwo tikumupharazgira.
3. Kasi awo tikuŵapharazgira ŵali nga ni dongo mu nthowa wuli?
3 Tipulirani Dongo: Mtima wa munthu uli nga ni dongo. (Luka 8:15) Dongo linyake likukhumba kutipulira makora kuti unenesko ujinthe misisi na kukura. Ŵapharazgi ŵakwambilira ŵakapandanga mbuto za unenesko mu dongo lakupambanapambana, ndipo ŵakakondwa na ivyo ŵakacita. (Mil. 13:48, 52) Nase tingaŵa ŵakukondwa usange tikupharazga mu nthowa iyo munthu wanganweka na uthenga uwo tikumupharazgira.