Tingakhorwanga na Uteŵeti Wakunyumba na Nyumba Pera Yayi—Kumazga Suzgo Lakujikayikira
1. Cifukwa wuli ŵanji ŵakutondeka kupempha ŵanthu kusambira nawo Baibolo?
1 Kasi mukutondeka kupempha munthu kusambira nayo Baibolo cifukwa mukuwona nga mungakwaniska yayi? Mwamba ndimwe yayi kughanaghana nthena. Ŵateŵeti ŵakale ŵa Yehova, nga ni Mozesi na Yeremiya nawo ŵakajiwonanga kuti mbambura kwenelera. (Ex. 3:10, 11; 4:10; Yer. 1:4-6) Kasi tingamazga wuli suzgo ili?
2. Cifukwa wuli tikwenera kukhorwa na uteŵeti wakunyumba na nyumba pera yayi na kuwona nga ŵanji ndiwo ŵangafiska kusambira na ŵanthu Baibolo?
2 Tikwenera kumanya kuti Yehova wangatituma kucita vinthu ivyo tingatondeka kufiska yayi. (Sal. 103:14) Ipo tingafiska mulimo ‘wakuzgora ŵanthu kuŵa ŵasambiri’ na “kuŵasambizga.” (Mat. 28:19, 20) Mulimo uwu Yehova wapeleka ku ŵanthu awo ŵakamba kale pera yayi nesi awo ŵali na luso pera. (1 Kor. 1:26, 27) Ipo tingakhorwanga na uteŵeti wakunyumba na nyumba pera yayi na kuwona kuti ŵanji ndiwo ŵangafiska kusambira na ŵanthu Baibolo.
3. Kasi Yehova watovwira wuli kuti tiŵe ŵakwenelera kusambira na ŵanthu Baibolo?
3 Yehova Ndiyo Wakutovwira Kuti Tiŵe Ŵakwenelera: Yehova ndiyo wakutovwira kuti tiŵe ŵakwenelera kucita mulimo wakuzgora ŵanthu kuŵa ŵasambiri. (2 Kor. 3:5) Kwizira mu gulu lake Yehova watisambizga unenesko uwo nanga ŵangaŵa ŵanthu ŵakusambira comene ŵakuwumanya yayi. (1 Kor. 2:7, 8) Nthowa izo Yesu wakasambizgiranga wali kuzilemba mu Baibolo kuti ise tilondezgenge. Ndipo wakulutilira kutisambizga kwizira mu mpingo. Kweniso watipa mabuku ghakusambizgira ŵanthu Baibolo. Limoza la mabuku agha ni Baibolo Likusambizgaci. Buku ili likusambizga unenesko mu nthowa yipusu comene. Kusambira Baibolo na munthu nkhupusu comene kuluska umo tikughanaghanira.
4. Cifukwa wuli tili na cigomezgo kuti Yehova watovwirenge?
4 Mozesi na Yeremiya ŵakafiska mulimo wawo cifukwa Yehova wakaŵawovwira. (Ex. 4:11, 12; Yer. 1:7, 8) Nase tingalomba Yehova kuti watovwire. Nakuti para tikusambira na munthu Baibolo, tikumusambizga unenesko wakukhwaskana na Yehova, ndipo Ciuta wakukondwa comene. (1 Yoh. 3:22) Mphanyi taŵa na cilato cakuti tisange munthu wakuti tisambirenge nayo Baibolo. Mulimo uwu ukunozga comene.