Vyakucitika mu Uteŵeti
◼ Australia: Apo John wakaŵa mwana wakalutanga ku chalichi. Kweni wati wakura wakaleka kugomezga kuti kuli Ciuta. Mupayiniya wakamupa burosha la Cingelezi la Was Life Created?, ndipo wati wawelerako wakamupa burosha la Cingelezi la Origin of Life. Mupayiniya wakalutilira kumupa magazini agho ghafuma sono na kumulongora nkhani yiliyose iyo yikulongosora vya cilengiwa panji ucimi wa mu Baibolo. Wati wawona umo John wakacitiranga, wakamupa buku lakuti Baibulo—Kodi Ndilo Mawu a Mulungu Kapena a Munthu? Pakwamba, John wakakanirangathu kuti kuli Ciuta. Kweni wati waŵazga buku ili, wakati wakumanya makora yayi usange waliko panji kulije. Kufuma apo, mupayiniya wakamupa buku la Baibolo Likusambizgaci. Wakamulongora ndime 8 pa peji 20 na ndime 13-16 pa peji 23-24. Malemba agho ghali pa ndime izi ghakamukondweska comene John mwakuti wakati, “Panji nili sandeso makora Baibolo.”
◼ Mexico: Munthu munyake wakaphalira mubali kuti wakugomezga yayi kuti Baibolo likalembeka na Ciuta. Mubali wakamupempha kuti wamulongore ukaboni wakuti Baibolo likalembeka na Ciuta. Munthu uyu wakakhwaskika comene wati wasambira malango gha Ciuta. Wakaphalira mubali kuti, ‘Kale para imwe na ine tikuŵazga Baibolo, nkhapambaniskanga yayi na mabuku ghanyake ndipo ivyo tikaŵazganga vikanikhwaskanga yayi. Kweni sono njuŵi yane yikunisuzga para nkhuŵazga ulongozgi uwo uli mu Baibolo.’
◼ United States: Apo mbumba yinyake yikacitanga upharazgi wapadera wa mu matawuni ghakurughakuru, yikakumana na mwanakazi wa ku Taiwan. Mwanakazi uyu wakagomezganga mwa Ciuta, kweni wakawonanga kuti Baibolo ni buku la Ŵangelezi. Wakiza apo ŵakaŵika mabuku cifukwa wakawonanga kuti umoyo wake ulije candulo, nangauli wakaŵa musambazi. Wakaghanaghananga kuti Baibolo lingamovwira kuti umoyo wake uŵe wacandulo. Mbumba iyi yikamba kusambira nayo buku la Baibolo Likusambizgaci na burosha la Cingelezi la Lasting Peace and Happiness—How to Find Them. M’malo mwakusambira nayo cipaturo 2 ca buku la Baibolo Likusambizgaci, ŵakadumbiskana mutu wakuti “A Guidebook for the Blessing of All Mankind” mu burosha la Lasting Peace and Happiness—How to Find Them. Ŵati ŵadumbiskana ndime 6 zakwambilira za mutu uwu, mwanakazi uyu wakatindikika. Wakati Baibolo likupambana comene na mabuku ghanyake gha visopa. Ndipo ŵati ŵadumbiskana maucimi gha mu Baibolo agho ghali kufiskika, wakati, “Palije buku linyake ilo likuneneska nga ni Baibolo!”
◼ Japan: Nangauli munthu munyake wakaphalira mubali kuti wakugomezga yayi kuti kuli Ciuta, kweni mubali wakalutilira kumwendera. Wakadumbiskananga nayo nkhani za mu Galamukani! pa mutu wakuti “Kodi Zinangochitika Zokha?” Pacoko na pacoko, munthu uyu wakamba kuzomerezga kuti Mlengi waliko. Sono wakugomezga kuti Ciuta waliko, ndipo mubali wakusambira nayo burosha la Ciuta Wakutiphalira Uthenga Uwemi!
◼ Canada: Mudumbu munyake wakagaŵira magazini kwa mwanakazi uyo wakafumanga mu nyumba kuti wakanjire mu galimoto. Mudumbu wati wawelerako, mwanakazi uyu wakamuphalira kuti wakukhumba yayi, ndiposo wakugomezga yayi kuti kuli Ciuta. Mudumbu uyu wakagongowa yayi. Wakalutaso kwa mwanakazi uyu na burosha la Umo Tingasangira Umoyo Wakukhorweska. Wakamuphalira kuti nangauli wakugomezga yayi kuti kuli Ciuta, kweni wakaghanaghananga vya iyo cifukwa wakulera yekha ŵana. Wakamulongora ndime 6 pa peji 4 mu burosha ili, apo pakulongosora uko tingasanga ulongozgi uwemi. Wakamuphalira kuti waŵazge masacizgo agho ghali pa sambiro 2, ghakukhwaskana na umo wangalelera ŵana. Mwanakazi uyu wakakondwa comene na burosha ili.