Para Tikusambira Patekha, Tikuŵa Ŵateŵeti Ŵamwamphu

Kasi kusambira ni vici? Kusambira kukung’anamura vinandi padera pa kuŵazga waka. Kukung’anamura kuŵika maghanoghano ghithu ghose pa nkhani iyo tikuŵazga. Kweniso kukung’anamura kusanda ivyo tikuŵazga, kuviyaniska na ivyo tikumanya kale, na kumanya cifukwa ico fundo izo zalembekera. Para tikusambira, tighanaghanirengepo comene fundo izo nkhakwamba kuzipulika na umo tingazilondezgera. Pakuŵa Ŵakaboni ŵa Yehova, tikweneraso kughanaghanira umo tingawovwilira ŵanji na ivyo tasambira. Nga umo tawonera, para tikusambira tikwenera kughanaghanirapo.

Tiŵe na Maghanoghano Ghawemi

Para tikukhumba kusambira, tikwenera kuŵa na Baibolo, buku ilo tikukhumba kusambira, phesulu panji bolopeni, na notibuku usange ndakukhumbikwa. Kweni kasi tikuŵikapo mtima? Baibolo likutiphalira kuti Ezira “wakaŵikapo mtima wake kupenjiska dango la Yehova na kulicita, na kusambizga vilayizgo vyake na maweruzgo ghake mwa Israyeli.” (Ezra 7:10) Kasi tikwenera kucita vici kuti tiŵikepo mtima?

Lurombo lukutovwira kuti tisambire Mazgu gha Ciuta na maghanoghano ghawemi. Tikukhumba kuti mtima withu, uwo ni wunthu withu wamukati, upokere ulongozgi uwo Yehova wakutipa. Pambere tindambe kusambira, tilombe Yehova kuti watipe mzimu wake. (Luka 11:13) Tilombe kuti tipulikiske ivyo tisambirenge, umo vikukhwaskira khumbo lake, umo vingatovwilira kupambaniska pakati pa ciwemi na ciheni, umo tingalondezgera malango ghake mu umoyo withu, na umo nkhani iyo yikukhwaskira ubwezi withu na iyo. (Zinth. 9:10) Mukati mu sambiro, tilutilire ‘kulomba Ciuta’ kuti watipe vinjeru. (Yak. 1:⁠5) Tijisande pa ivyo tasambira, ndipo tilombe wovwiri kwa Yehova kuti timazge maghanoghano panji makhumbiro ghaheni. Nyengo zose ‘tiyimbire Yehova na kuwonga’ cifukwa ca vinthu ivyo wativumbulira. (Sal. 147:⁠7) Para tikusambira, tikuŵa paubwezi na Yehova, cifukwa tikucita ivyo wakutiphalira kwizira mu Mazgu ghake.​—⁠Sal. 145:⁠18.

Para tikucita ivyo tikusambira, tikupambana na ŵanthu ŵanyake awo nawo ŵakuti ŵakusambira Mazgu gha Ciuta. Ŵanthu awo ŵakuleka kusopa Ciuta mwakujipeleka ŵakukayikira ivyo Baibolo likuyowoya. Kweni ise ndimo tiliri yayi. Tikutamira mwa Yehova. (Zinth. 3:​5-7) Usange vinthu vinyake tindavipulikiske, tikucimbilira yayi kuyowoya kuti mphakubudika. Nangauli tikupenjerezga mazgoro, kweni tikulindilira Yehova. (Mika 7:⁠7) Nga ni Ezira, tikukhumba kucita na kusambizga ŵanji ivyo tikusambira. Para ticitenge nthena, tizamusanga vyandulo vinandi.

Umo Mungasambilira

M’malo mwa kwamba waka na ndime yakwamba mpaka kuumaliro, cakwamba, mukwenera kuwonerathu nkhani yose iyo mukukhumba kuŵazga. Sandani dankha mutu wa nkhani uwo musambirenge. Kufuma apo, wonani kukolerana uko kuli pakati pa mitu yicokoyicoko na mutu wa nkhani. Sandani vithuzithuzi, matchati, panji mabokosi agho ghali mu nkhani iyo musambirenge. Kufuma pa ivyo mwawona, jifumbani kuti: ‘Kasi nisambirenge vici? Kasi vinganovwira wuli?’ Ivi vimovwiraninge kuti musange candulo na ivyo musambirenge.

Sono manyani ivyo vili mukati. Nkhani zakusambira izo zikuŵa mu Gongwe la Mulinda na mabuku ghanyake zikuŵa na mafumbo. Para mukuŵazga ndime yiliyose, nchiwemi kugwara mzere kusi kwa mazgoro. Nanga ni para nkhani iyo mukuŵazga yilije mafumbo, mungagwara mzere fundo zakuzirwa izo mukukhumba kuzikumbukira. Usange fundo njiphya, mukwenera kughanaghanirapo kuti muyipulikiske makora. Mukwenera kupenja viyelezgero panji fundo izo zingakamovwirani mu uteŵeti panji mu nkhani iyo muzamudumba kunthazi. Ghanaghanirani ŵanthu awo ŵangakakhozgeka usange mungaŵaphalira ivyo mukusambira. Gwarani mzere fundo izo mukukhumba kuzigwiliskira nchito na kuweleramo para mwamara kusambira.

Ŵazgani malemba ghose agho mazgu ghake ghandalembeke. Wonani umo lemba lililose likukhozgera ndime iyo mukuŵazga.

Kasi mukucita ivyo mukusambira? Fumbo ili ndakuzirwa comene. Para mwasambira cinthu cinyake, mukwenera kujifumba kuti: ‘Kasi fundo iyi yikwenera kukhwaska wuli maghanoghano ghane na ivyo nkhukhumba kucita pa umoyo wane? Kasi fundo iyi yinganovwira wuli pa masuzgo, pakusankha cakucita, kweniso kuti nifiske ivyo nkhukhumba kucita pa umoyo wane? Kasi yinganovwira wuli mu mbumba yane, mu upharazgi, na mu mpingo?’ Ghanaghaniranipo comene mafumbo agha. Ghanaghanirani apo mungagwiliskira nchito ivyo mukusambira.

Para mwamara mutu umoza, weleranimo. Wonani usange mungakumbukira fundo zikuru na fundo zinyake izo zikukhozgera fundo izi. Para mucitenge nthena, muluwenge yayi ivyo mwasambira.

Ivyo Mungasambira

Pakuŵa ŵanthu ŵa Yehova, muli na vinandi vyakuti musambire. Kweni, kasi mukwenera kwamba na vici? Nchiwemi kusambira lemba la zuŵa dazi lililose. Sabata yiliyose tikuluta ku maungano gha mpingo. Para mukunozgekera nkhani izo tamusambira pa maungano agha, mukusanga candulo comene. Kweniso, ŵanji ŵakupatura nyengo kuti ŵasambire mabuku ghithu agho ghakafuma apo ŵakaŵa kuti ŵandasambire unenesko. Pa vipaturo vya mu Baibolo ivyo ŵakuŵazga sabata yiliyose, ŵanji ŵakusankhapo mavesi ghanyake kuti ŵakapenjerezge mwakuti ŵamanye ivyo ghakung’anamura.

Wuli usange mulije nyengo kuti musambire nkhani zose izo tikusambira pa maungano gha mpingo? Lekani kusambira mwakucimbilira kuti mumalizge waka, panji kulekerathu kunozgekera nkhani zose cifukwa mulije nyengo. M’malo mwake, nozgekeranipo izo mungafiska. Nozgekerani sabata yiliyose. Mukuluta kwa nyengo, mungamba kunozgekera maungano ghanyake.

‘Zengani Nyumba Yinu’

Yehova wakukhumba kuti awo ni mitu ya mbumba ŵalimbikirenge nchito mwakuti ŵa­pwelelerenge ŵamumbumba yawo. Lemba la Zintharika 24:27 likuti: “Nozga makora mulimo wako kuwaro, uvinozge vyose vya ku munda.” Kweni vyauzimu ndivyo ni vyakukhumbikwa comene mu mbumba yinu. Lekani lemba ili likulutilizga kuti: “Pamanyuma uzenge nyumba yako.” Kasi mitu ya mbumba yingalondezga wuli fundo iyi? Pa Zintharika 24:3 pakuti: “[Nyumba] yikukhozgeka na umanyi.”

Kasi umanyi ungawovwira wuli nyumba yinu? Umanyi nkhupulikiska vinthu. Kuti munthu wasambizge makora mbumba yake, wakwenera kuyimanya dankha. Kasi ŵamumbumba yinu ŵakucita wuli mwauzimu? Tegherezgani comene para mukuyowoya nawo. Kasi ŵakutemwa kudandawura panji kusunga vyakusingo? Kasi ŵakutemwa comene vinthu vyakuthupi? Para mukupharazga na ŵana ŵinu, kasi ŵakucita soni para ŵasangana na ŵanyawo? Kasi ŵakukondwa pa nyengo yakusopera ya mbumba? Kasi ŵakulondezga malango gha Yehova mu umoyo wawo? Para mwayimanya makora mbumba yinu, mungamanya ico mungacita kuti muyizenge makora na kovwira waliyose kuŵa na mikhaliro yauzimu.

Kusanga Njombe

Kumanya vinthu ivi nkhwakunotheska nadi, kweni tingajikuzganga yayi. M’malo mwake, Mazgu gha Ciuta agho tikusambira zuŵa na zuŵa ghakutovwira kuti tiŵe ŵakujiyuyura. (Dute. 17:​18-20) Mazgu gha Ciuta ghakutivikiliraso ku “nkhongono yakupusika ya kwananga,” cifukwa para ghakugwira nchito mu mitima yithu, cikuŵa cipusu kugega nkhongono ya kwananga. (Heb. 2:1; 3:13; 3:13; Kol. 3:​5-10) Mwantheura, ‘tendenge mwakwenelera Yehova na kumukondweska fikepo, uku tikulutilira kupambika vipambi mu mulimo wose uwemi.’ (Kol. 1:10) Lekani tikusambira Mazgu gha Ciuta, ndipo kucita nthena ni mwaŵi ukuru comene.