Yambiskani Chidumbirano na Kabuku Kakuti “Kodi M’Baibulo Muli Nkhani Zotani?”

1. Kasi nkhabuku wuli ako kangatovwira mu upharazgi?

¹ Chaka chamara, pa maungano ghanyake gha chigaŵa ŵabali na ŵadumbu ŵakakondwa kupokera kabuku kakuti “Kodi M’Baibulo Muli Nkhani Zotani?” Kasi tinganozgekera wuli upharazgi na kabuku aka? Pakuti kabuku aka kakuyanako na buku la Kukambitsirana, kangatovwira pakwambiska chidumbirano. Kali na mafumbo ndiposo mavesi gha mu Baibolo agho ghakuzgora mafumbo agha.

2. Kasi mungambiska wuli chidumbirano na kabuku kakuti “Kodi M’Baibulo Muli Nkhani Zotani?”

² Para mwasankha fumbo la nambara 8, mungayowoya kuti: “Ŵanthu ŵanandi ŵakujifumba kuti, ‘Kasi ni khumbo la Chiuta kuti taŵanthu tisuzgikenge?’ [Mu vigaŵa vinyake chikuŵa chiwemi kumulongora fumbo.] Imwe mukuti wuli? [Mulekani wazgore.] Baibolo likuzgora makora fumbo ili.” Ŵazganipo vesi limoza panji ghanandiko pa mavesi agho ghalipo. Mukwenera kuŵazga mu Baibolo. Usange munthu wakukhumba kumanya vinandi, mungamulongora mafumbo 20 agho ghali mu kabuku aka na kumupempha kuti wasankhepo limoza kuti muzakadumbiskane pa ulendo wakulondezgapo. Panji mungamupa buku ilo likulongosora vinandi pa nkhani iyo mwadumbiskana.

3. Kasi kabuku kakuti “Kodi M’Baibulo Muli Nkhani Zotani?” kangatovwira wuli para tikupharazgira ŵanthu awo visopa vyawo ni Vyachikhristu yayi?

³ Para tikupharazgira awo visopa vyawo ni Vyachikhristu yayi, tingadumbiskana nawo fumbo la nambara 4, 13-17. Mwachiyelezgero, para mwasankha fumbo la nambara 17, mungayowoya kuti: “Tikudumbiskana na ŵanyithu pa nkhani ya mbumba. Namwe mungazomerezga kuti mazuŵa ghano masuzgo ghakukata yayi mu mbumba. Asi nthe? [Mulekani wazgore.] Ŵanthu ŵanandi ŵawona kuti mazgu agha ngakovwira, ghakuti: ‘Muwoli wachindikenge chomene mfumu wake.’ [Mungayowoyanga yayi kuti ivyo mukudumbiskana vyafuma pa Ŵaefeso 5:33. Usange mukupharazgira mwanakazi mungayowoya waka pa mtima mazgu agho ghali pa Ŵaefeso 5:28.] Kasi namwe mukughanaghana kuti ulongozgi uwu ngwakovwira mu nthengwa?”

4. Kasi paumaliro mungachita vichi para mukupharazgira munthu uyo chisopa chake Ntchachikhristu yayi?

⁴ Paumaliro, panganani kuti mukizeso kuti muzakadumbiskane vinandi. Panyake mungazakadumbiskana vesi linyake pa mavesi agho ghakhalako pa fumbo ilo mwadumbiskana. Apo mwawona kuti mphakwenelera, mungamuphalira kuti ivyo mukudumbiskana ni vya mu Baibolo. Mupani buku ilo mukuwona kuti wangalitemwa. Ivyo mukadumbiskana kumasinda kweniso umo munthu uyo wakuwonera Baibolo, ndivyo vingamovwirani kuti mumanye buku ilo mungamupa.—Wonani mphapika ya Uteŵeti Withu wa Ufumu wa Disembala 2013.