Umo Tingapharazgira na Mabuku Agho Ghali Kujambulika
1. Padera pa mabuku ghakulembeka, kasi tiliso na vichi?
1 Ŵanthu ŵanandi ŵakukondwa chomene kuŵazga mabuku agho ghakuyowoya za Chiuta pa jw.org. (Muph. 12:10) Kasi muli kupharazgirapo mabuku agho ghali kujambulika? Para munthu wakutegherezga mabuku agha, wakusambira vinthu vinandi pa Webusayiti yithu. Kasi tingasanga phindu wuli na mabuku ghakutegherezga waka agha?
2. Kasi tingachita wuli na mabuku agho ghali kujambulika pa sambiro la taŵene panji pa kusopa kwa mbumba?
2 Sambiro la Taŵene Panji Kusopa Kwa Mbumba: Para tikutegherezga mabuku agho ghajambulika, nga ni Baibolo na magazini para tili paulendo, panji tikugwira ntchito zinyake za zuŵa na zuŵa, vingatovwira kuti nyengo yithu tiyigwiliskire ntchito mwamahara. (Efe. 5:15, 16) Tingategherezgaso mabuku ghithu agho ghali kujambulika para tikuchita kusopa kwambumba uku tikulondezga mu buku leneko. Kweniso mabuku agha ghangatovwira para tikusambira patekha panji para tikusambira chiyowoyero chinyake.
3. Kasi mbanjani mu chigaŵa chithu ŵangasanga phindu na mabuku ghakutegherezga waka?
3 Mu Upharazgi: Ŵanthu mbakutangwanika mwakuti ŵakusoŵa na nyengo yakuŵazgira, kweni ŵangategherezga mabuku agho ghali kujambulika. Nyengo zinyake tingakumana na ŵanthu awo ŵakuyowoya chiyowoyero chinyake, kweni mbakuti para ŵangapulika uthenga wa Ufumu mu ‘chiyowoyero chawo’ ŵangazomera unenesko. (Mil 2:6-8) Mu vigaŵa vinyake, ŵanthu ŵakutemwa chomene kutegherezga waka. Mwachiyelezgero, ku Hmong, ŵanthu ŵakutemwa kulongosolera ŵana ŵawo mbiri yawo. Ŵana ŵakutegherezga makora ivyo ŵapapi ŵawo ŵakuŵaphalira, ndipo nawo ŵakuzakalongosolera ŵana ŵawo. Muno mu Africa, ŵanthu ŵakusambira makora para ŵakuŵalongosolera waka vinthu.
4. Kasi tikwenera kujifumba mafumbo wuli para tikovwira ŵanthu mu chigaŵa chithu?
4 Kasi vingaŵa makora mu chigaŵa chinu kuti munthu wategherezge mabuku agho ghali kujambulika mu chiyowoyero chake? Kasi munthu wangasanga phindu para tingamutumira pa imelu mabuku ghakuti wakategherezge? Kasi tingakopera buku la kutegherezga waka na kuŵika pa CD, na kupeleka kwa munthu uyo wakukhumba kumanya vinandi pamoza na buku leneko? Para mu upharazgi tamupa munthu buku la kutegherezga waka, burosha, magazini, panji thirakiti, tikwenera kulemba kuti tagaŵira. Mabuku agha ghakujambulika kuti ise tichitirenge sambiro la taŵene, kweniso kuti tipandirenge mbuto zaunenesko za Ufumu.—1 Kor. 3:6.