NKHANI YAKUSAMBIRA 20
SUMU 7 Yehova Ndiyo Nkhongono Zithu
Yehova Wangamusanguluskani
“Walumbike . . . Dada wa mtima walusungu na Chiuta wa chisangulusko chose.”—2 KOR. 1:3.
FUNDO YIKURU
Mu nkhani iyi tiwonenge ivyo tikusambirako kwa Yehova pa umo wakasanguluskira Ŵayuda awo ŵakatolekera ku wuzga ku Babuloni.
1. Kasi vinthu vikaŵa wuli ku Ŵayuda awo ŵakaŵa ku wuzga?
GHANAGHANIRANI umo Ŵayuda awo ŵakaŵa ku wuzga ku Babuloni ŵakwenera kuti ŵakajipulikiranga. Iwo ŵakawona charu chawo chikuparanyika. Chifukwa cha zakwananga zawo na za ŵasekuru ŵawo, ŵakatoleka kufuma mu charu chawo na kuluta nawo ku charu chachilendo. (2 Mid. 36:15, 16, 20, 21) Mbunenesko kuti ku Babuloni, ŵazga ŵakaŵako na wanangwa wakuchita milimo yawo ya zuŵa na zuŵa. (Yer. 29:4-7) Ndipouli, umoyo ukaŵa upusu yayi, nakuti ntchakuwonekerathu kuti ndiwo umoyo uwo ŵakakhumbanga yayi. Kasi ŵakajipulikanga wuli na umo vinthu vikaŵira pa umoyo wawo? Wonani mazgu agho muzga munyake wakayowoya, wakati: “Tikakhala mumphepete mwa milonga ya Babuloni. Tikalira tikati takumbuka Ziyoni.” (Sal. 137:1) Ntheura Ŵayuda awo ŵakaŵa ku wuzga aŵa ŵakakhumbikwiranga kusanguluskika, kweni kasi ni njani wakate waŵasanguluskenge?
2-3. (a) Kasi Yehova wakaŵachitira vichi Ŵayuda awo ŵakaŵa ku wuzga? (b) Kasi tisambirenge vichi mu nkhani iyi?
2 Yehova ni “Chiuta wa chisangulusko chose.” (2 Kor. 1:3) Pakuŵa Chiuta wachitemwa, wakukondwa kusanguluska wose awo ŵakusendelera kwa iyo. Yehova wakamanyanga kuti ŵazga ŵanyake ŵazomerenge chilango na kusambirapo kanthu ndipo ŵawelerenge kwa iyo. (Yes. 59:20) Ntheura vyaka vyakujumpha 100 pambere ŵandatolekere ku wuzga, Yehova wakaphalira ntchimi Yesaya kuti yilembe buku ilo likumanyikwa na zina lake. Chifukwa wuli Yehova wakatuma Yesaya kulemba buku ili? Yesaya wakati: “Chiuta winu wakuti: ‘Sanguluskani, sanguluskani ŵanthu ŵane.’” (Yes. 40:1) Nadi, kwizira mu ivyo ntchimi iyi yikalemba, Yehova wakapeleka chisangulusko icho Ŵayuda awo ŵakaŵa ku wuzga ŵakakhumbikwiranga.
3 Nga Mbayuda awo ŵakaŵa ku wuzga, nase tikukhumbikwira kusanguluskika nyengo na nyengo. Mu nkhani iyi, tidumbiskanenge nthowa zitatu za umo Yehova wakasanguluskira Ŵayuda awo ŵakaŵa ku wuzga: (1) wakalayizga kuti waŵagowokerenge awo ŵalapa, (2) wakaŵapa chigomezgo, kweniso (3) wakaŵawovwira kuti ŵaleke kuchita wofi. Apo tikudumbiskana fundo izi, wonani umo nase tingasangira chandulo na mazgu ghakukhozga gha Yehova.
YEHOVA WAKUTILENGERA LUSUNGU NA KUTIGOWOKERA
4. Kasi Yehova wakalongora wuli kuti ni Chiuta walusungu? (Yesaya 55:7)
4 Yehova ni “Dada wa mtima walusungu.” (2 Kor. 1:3) Wakalongora mukhaliro uwu apo wakalayizga Ŵayuda awo ŵakaŵa ku wuzga kuti wagowokerenge awo ŵalapa. (Ŵazgani Yesaya 55:7.) Iyo wakati: “Na chitemwa chamuyirayira nikuchitirenge lusungu.” (Yes. 54:8) Kasi Yehova wakalongora wuli lusungu lwake? Nangauli Ŵayuda ŵakeneranga nipera kusangana na masuzgo chifukwa cha ivyo ŵakachita, kweni Yehova wakaŵalayizga kuti ŵakhalilirenge ku Babuloni umoyo wawo wose yayi. Ŵakeneranga kukhala ku wuzga kwa nyengo yichoko waka. (Yes. 40:2) Mazgu agha ghakwenera kuti ghakaŵasanguluska chomene kweniso kuŵakhozga Ŵayuda wose awo ŵakalapa.
5. Chifukwa wuli ise tili na vifukwa vinandi kuluska Ŵayuda awo ŵakaŵa ku wuzga vyakugomezgera kuti Yehova ngwalusungu?
5 Kasi tikusambirapo vichi? Yehova ngwakukhumbisiska chomene kuŵagowokera ŵateŵeti ŵake. Mazuŵa ghano tili na vifukwa vinandi vyakugomezgera fundo iyi kuluska Ŵayuda awo ŵakaŵa ku wuzga. Chifukwa wuli tikuyowoya nthena? Chifukwa chakuti tikumanya ivyo Yehova wakachita kuti zakwananga zithu zigowokereke. Pati pajumpha vyaka vinandi kufuma apo Yesaya wakachimira, Yehova wakatuma Mwana wake wakutemweka pa charu chapasi kuti wazakapeleke chiwombolero cha ŵakwananga wose ŵakupera. Sembe iyi yikovwira kuti zakwananga zithu ‘zisisitikirethu,’ panji kuti kuwuskikirapothu. (Mil. 3:19; Yes. 1:18; Efe. 1:7) Nadi, Yehova ni Chiuta walusungu chomene kweniso wakugowoka.
6. Kasi tingapindura wuli para tikughanaghanira vya lusungu lwa Yehova? (Wonaniso chithuzi.)
6 Mazgu gha Yehova agho ghakusangika pa Yesaya 55:7, ghangatisanguluska para tikujiyimba mulandu chomene na ivyo tikachita. Ŵanji ŵa ise tingalutilira kujiyimba mulandu pa ivyo tikachita nanga vingaŵa kuti tili kulapa na kusintha. Ivi vingachitika chomenechomene para tichali kusangana na masuzgo chifukwa cha ivyo tikabuda. Ndipouli, para taphara zakwananga zithu na kuleka kuzichitaso, tingaŵa na chigomezgo chose kuti Yehova watigowokera. Ndipo para Yehova wagowoka, wakukumbukaso yayi zakwananga zithu. (Yaniskani na Yeremiya 31:34.) Ntheura usange Yehova wakukumbukaso yayi zakwananga zithu zakumasinda, nase tikwenera kuleka kuzighanaghaniraso. Chakuzirwa chomene kwa Yehova, ni ivyo tikuchita sono, ivyo tikabudiska kumasinda yayi. (Ezek. 33:14-16) Ndipo sonosono apa, Dada withu wa mtima walusungu wazamutifwatulirathu ku masuzgo agho ghakwiza chifukwa cha ivyo tikananga.
Chakuzirwa chomene kwa Yehova, ni ivyo tikuchita sono, ivyo tikabudiska kumasinda yayi (Wonani ndime 6)
7. Kasi ntchivichi chingatichiska kuti tilombe wovwiri usange tabisanga zakwananga?
7 Kasi tikwenera kuchita wuli para njuŵi yithu yikutisuzga chifukwa chakuti tikubisa kwananga kukuru uko tili kuchita? Baibolo likutichiska kuti tipemphe wovwiri ku ŵalara. (Yak. 5:14, 15) Ndipouli, nyengo zinyake chingaŵa chakusuzga kuti tiŵaphalire ŵalara zakwananga izo tikachita. Kweni para ndise ŵakupera kweniso tikukumbuka kuti Yehova na ŵanalume awo wali kwimika kuti ŵatovwire ŵakutitemwa chomene kweniso mbalusungu, chitiŵirenge chipusu kuti tilute na kukaŵaphalira. Wonani umo lusungu lwa Yehova lukamovwilira mubali munyake zina lake Arthur,a uyo njuŵi yake yikamusuzganga chomene. Iyo wakati: “Nkhawonelera vyamuziro pafupifupi chaka chose. Kweni pamanyuma pa kutegherezga nkhani yakukhwaskana na njuŵi, nkhaphara zakwananga zane kwa muwoli wane kweniso ku ŵalara. Nati nachita nthena, nkhamba kujipulika makora, kweni nkhajiyimbanga mulandu nipera chifukwa cha ivyo nkhachita. Ŵalara ŵakanikumbuska kuti Yehova wandanitaye. Iyo wakutilanga chifukwa chakuti wakutitemwa. Mazgu ghawo ghalusungu agha ghakanifika pamtima, ndipo ghakanovwira kuti nambe kughanaghana makora.” Pasono, Arthur ni mupayiniya kweniso muteŵeti wakovwira. Ntchakukhozga chomene kumanya kuti Yehova wakutilongora lusungu kweniso kutigowokera para talapa zanadi.
YEHOVA WAKUTIPA CHIGOMEZGO
8. (a) Kasi Yehova wakaŵapa chigomezgo wuli Ŵayuda awo ŵakaŵa ku wuzga? (b) Kuyana na Yesaya 40:29-31, kasi Ŵayuda awo ŵakapera ŵakakhwaskika wuli na chigomezgo ichi?
8 Mukawonero ka ŵanthu, Ŵayuda awo ŵakaŵa ku wuzga ŵakaŵavya chigomezgo chilichose. Ufumu wa Babuloni uwo ukaŵa wankhongono chomene panyengo iyo, ukamanyikwanga kuti ukufwatura yayi ŵazga ŵake. (Yes. 14:17) Ndipouli, Yehova wakaŵapa chigomezgo ŵanthu ŵake. Wakalayizga kuti waŵafwaturenge ŵanthu ŵake, ndipo pakaŵavya icho chikate chimutondeskenge. (Yes. 44:26; 55:12) Mu maso gha Yehova, Babuloni wakaŵa wambura nkhongono nga ni fuvu. (Yes. 40:15) Fuvu para mungaliphuta waka likuchedwa yayi kuputa, ndimo chikaŵiraso chipusu kwa Yehova kufwatura ŵanthu ŵake ku Babuloni. Kasi chigomezgo chikate chiŵawovwirenge wuli Ŵayuda awo ŵakaŵa ku wuzga? Chikate chiŵasanguluskenge. Kweni pakaŵaso uwemi unyake. Yesaya wakalemba kuti: “Awo ŵakugomezga Yehova ŵaŵengeso na nkhongono.” (Ŵazgani Yesaya 40:29-31.) Nadi, chigomezgo chikate chiŵapenge nkhongono ndipo ŵakatenge “ŵadukenge na mapapindo nga ni nombo.”
9. Kasi ntchivichi chikate chovwirenge Ŵayuda awo ŵakaŵa ku wuzga kuŵa na chifukwa cha kugomezgera malayizgo gha Yehova?
9 Yehova wakaŵapaso Ŵayuda awo ŵakaŵa ku wuzga vifukwa vyakugomezgera malayizgo ghake. Kasi wakaŵaphalira vichi? Ghanaghanirani vya mauchimi agho ghakaŵa kuti ghafiskika kale. Ŵakamanyanga kuti Ŵaasiriya ŵakathereska ufumu wakumpoto wa Israyeli na kutolera ŵanthu ŵake ku wuzga. (Yes. 8:4) Ŵakawonaso kuti Ŵababuloni ŵakuparanya msumba wawo wa Yerusalemu na kuŵatolera ku wuzga. (Yes. 39:5-7) Ŵakaŵapo apo Themba Zedekiya ŵakalidolora maso na kuluta nalo ku Babuloni. (Yer. 39:7; Ezek. 12:12, 13) Chilichose icho Yehova wakayowoyerathu chikafiskika. (Yes. 42:9; 46:10) Vyose ivi vikwenera kuti vikakhozga chomene chipulikano chawo kuti Yehova wafiskengeso layizgo lake lakuti wazamuŵafwatura ku wuzga.
10. Kasi ntchivichi chingatovwira kulutilira kuŵa na chigomezgo chakukhora mu mazuŵa ghaumaliro agha?
10 Kasi tikusambirapo vichi? Para tasuzgika chomene maghanoghano, chigomezgo chithu cha munthazi chingatisanguluska na kutipa nkhongono. Tikukhala mu nyengo zinonono ndipo tikusangana na masuzgo ghakupambanapambana chifukwa chakuti ŵalwani ŵithu ŵakutisuska. Kweni tikwenera kuwelera nyuma yayi. Yehova watipa chigomezgo chiwemi, uwo mbumoyo wamuyirayira mu charu chiphya umo tizamukhala mwamtende kweniso mwakuvikilirika. Nyengo zose tikumbukenge chigomezgo chithu ichi. Para tichitenge nthena yayi, mbwenu chigomezgo chithu chingaŵa nga ni malo ghakutowa agho munthu wakughalaŵiskira pa windo ilo magilasi ghake ngambura kupuputika makora. Kasi tingachita wuli kuti mwakuyelezgera “tipupute windo,” mwakuti tiwonenge makora ivyo tikulindizga munthazi? Nyengo na nyengo tikwenera kughanaghanira umo umoyo withu uzamuŵira mu charu chiphya. Tingaŵazga nkhani mu mabuku ghithu, kuwonelera mavidiyo, kweniso kutegherezga sumu izo zikuyowoya vya chigomezgo chithu. Ndipo tingayowoya na Yehova mu lurombo kumuphalira za malayizgo agho tikukhumba chomene kuzakaghawona ghakufiskika.
11. Kasi ntchivichi chikovwira mudumbu uyo wali na nthenda yambura kukonda munkhwala kuti wasangeso nkhongono?
11 Wonani umo chigomezgo chapembuzgira na kukhozga mudumbu munyake zina lake Joy, uyo wakulwara nthenda yambura kukonda munkhwala. Iyo wakuti: “Para nasuzgika chomene maghanoghano, nkhupungulira mtima wane kwa Yehova, pakumanya kuti wakunipulikiska. Panyengo zanthena izi Yehova wakunizgora mwa kunipa ‘nkhongono zakuluska zakawiro.’” (2 Kor. 4:7) Chinyake icho Joy wakuchita, wakujitora nga wali mu charu chiphya, umo ‘muzamuŵavya munthu wakukhala mu charu uyo wazamuti: Nalwara.’ (Yes. 33:24) Usange nase tikupungulira mtima withu kwa Yehova na kuŵika mtima pa chigomezgo chithu, tiŵengeso na nkhongono.
12. Kasi tili na vifukwa wuli vyakugomezgera kuti Yehova wazamufiska malayizgo ghake? (Wonaniso chithuzi.)
12 Nga umo wakachitira na Ŵayuda awo ŵakaŵa ku wuzga, nase Yehova watipa vifukwa vinandi vyakugomezgera malayizgo ghake. Ghanaghanirani vya mauchimi agho tikuwona kuti ghakufiskika mazuŵa ghano. Mwachiyelezgero, tikuwona ufumu wa pa charu chose uwo mu ‘vigaŵa vinyake ngwankhongono ndipo vigaŵa vinyake ngwambura nkhongono.’ (Dan. 2:42, 43) Tikupulikaso za “vindindindi mu malo na malo” kweniso tikupharazgira ŵanthu ŵakufuma mu “mitundu yose.” (Mat. 24:7, 14) Mauchimi agha na ghanyake ghanandi ghakukhozga chomene chipulikano chithu kuti malayizgo gha Yehova ghazamufiskika nadi.
Mauchimi agho tikuwona ghakufiskika mazuŵa ghano ghakutipa vifukwa vyakugomezgera chomene malayizgo gha Yehova (Wonani ndime 12)
YEHOVA WAKUTOVWIRA KUTI TILEKE KOPA
13. (a) Kasi Yehova wakati Ŵayuda ŵazamusangana na masuzgo wuli panyengo iyo ŵazamufwatukiranga ku wuzga? (b) Mwakuyana na Yesaya 41:10-13, kasi Yehova wakaŵakhozga wuli Ŵayuda awo ŵakaŵa ku wuzga?
13 Nangauli Yehova wakaŵasanguluska Ŵayuda awo ŵakaŵa ku wuzga na chigomezgo chiwemi, kweni wakamanyanga kuti ŵazamusanganaso na masuzgo panyengo iyo ŵazamufwatukanga ku wuzga. Yehova wakayowoyerathu kuti chakuumaliro wa wuzga wa Ŵayuda, themba linyake lankhongono lizamuthereska mitundu yakuzingilizga Babuloni ndipo paumaliro lizamuwukira Babuloni. (Yes. 41:2-5) Kasi Ŵayuda ŵakeneranga kufipa mtima? Yehova wakaŵaphalilirathu ŵanthu ŵake kumanyuma kuti: “Ungawopanga yayi, pakuti nili nawe. Ungenjerwanga chara, pakuti ndine Chiuta wako.” (Ŵazgani Yesaya 41:10-13.) Kasi wakang’anamuranga vichi apo wakayowoya kuti “ndine Chiuta wako”? Apa wakakumbuskanga Ŵayuda kuti ŵakwenera kumusopa iyo yayi, chifukwa fundo iyi ŵakayimanyanga kale. M’malo mwake, wakaŵakumbuskanga kuti iyo wali nawo.—Sal. 118:6.
14. Kasi Yehova wakaŵawovwiraso wuli Ŵayuda awo ŵakaŵa ku wuzga kuti ŵaleke kopa?
14 Yehova wakakhozgaso Ŵayuda aŵa kuti ŵaleke kopa pakuŵakumbuska vya nkhongono zake zambura chigoti kweniso mahara ghake ghambura mapenjeko. Wakaŵaphalira kuti ŵalaŵiske kuchanya na kuwona nyenyezi. Wakaŵaphaliraso kuti padera pakuti ndiyo wakazilenga nyenyezi izi, iyo wakumanyaso nyenyezi yiliyose na zina lake. (Yes. 40:25-28) Ntheura ntchakuwonekerathu kuti wakumanyaso zina la muteŵeti wake waliyose. Ndipo usange Yehova wakaŵa na nkhongono zakulengera nyenyezi, ipo ntchakuwonekerathu kuti wali na nkhongono zakovwilira ŵanthu ŵake. Nadi, Ŵayuda awo ŵakaŵa ku wuzga ŵakaŵavya chifukwa cha kufipira mtima panji kopa.
15. Kasi Chiuta wakaŵawovwira wuli Ŵayuda awo ŵakaŵa ku wuzga kuti ŵanozgekere ivyo vikwiza munthazi?
15 Yehova wakawovwiraso ŵanthu ŵake kunozgekera ivyo vikizanga munthazi. Mu chigaŵa chakwamba cha buku la Yesaya, Yehova wakaphalira ŵanthu ŵake kuti: “Njirani mu vipinda vinu vyamukati, ndipo jalani vijaro pamanyuma pinu. Bisamani kwa kanyengo kachoko, m’paka ukali ujumphe.” (Yes. 26:20) Mazgu agha ghakwenera kuti ghakafiskika kakwamba apo Themba Sayirasi likathereska Babuloni. Wakulemba mdauko munyake Wachigiriki wa mu nyengo yakale, wakayowoya kuti apo Sayirasi wakanjiranga mu Babuloni, “wakaphalira [ŵasilikari ŵake] kuti ŵakwenera kukoma waliyose uyo ŵamusanga kuwaro.” Ghanaghanirani umo Ŵababuloni ŵakwenera kuti ŵakachitira wofi. Kweni Ŵayuda awo ŵakaŵa ŵazga ŵakwenera kuti ŵakaparanyika yayi chifukwa ŵakapulikira ulongozgi uwo Yehova wakaŵapa.
16. Chifukwa wuli tikwenera yayi kopa mwakujumphizga ivyo vikwiza munthazi? (Wonaniso chithuzi.)
16 Kasi tikusambirapo vichi? Sonosono apa tikumanenge na suzgo yikuru iyo yindachitikepo kufuma kale. Para yazakamba, ŵanthu mu charu ichi ŵazamuhangayika na kuchita wofi. Kweni ndimo vizamuŵira yayi ku ŵanthu ŵa Yehova. Ise tikumanya kuti Yehova ni Chiuta withu. Tizamwimilira nganganga, pakumanya kuti “kuwombokwa [kwithu] kuli pafupi.” (Luka 21:28) Nanga mphanyengo iyo mitundu yizamukolerana kutiwukira, tizamulutilira kugomezga Yehova. Yehova wazamutuma ŵangelo kuti ŵativikilire kweniso wazamutipa ulongozgi uwo uzamutovwira kuti tipone. Kasi tizamupokera wuli ulongozgi uwu? Pa nkhani iyi, tiyeni tilindilire. Ndipouli, vingazakachitika kuti tizamupokera ulongozgi uwu kwizira mu mpingo. Mukayowoyero kanyake tingati ulongozgi uwu panji ndiwo ni “vipinda vyamukati,” umo tizamuŵa ŵakuvikilirika. Kasi tinganozgekera wuli ivyo vikwiza munthazi? Tikwenera kuŵa paubwezi wakukhora na ŵabali na ŵadumbu, tipulikirenge ulongozgi wakufuma ku gulu, kweniso tikwenera kukhorwa kuti Yehova ndiyo wakulongozga gulu lithu.—Heb. 10:24, 25; 13:17.
Para tikughanaghanira pa nkhongono za Yehova kuti watithaskenge, tiwopenge mwakujumphizga yayi ivyo vizamuchitika panyengo ya suzgo yikuru (Wonani ndime 16)b
17. Kasi mungachita wuli kuti Yehova wamukhozgani?
17 Nangauli vinthu vikaŵa vyakusuzga ku Ŵayuda awo ŵakaŵa ku wuzga, kweni Yehova wakaŵapa wovwiri uwo ŵakakhumbikwiranga. Ndimo wazamuchitiraso na kwa ise wuwo. Ntheura kwali tikumanenge na suzgo wuli, tilutilire kulaŵiska kwa Yehova kuti watovwire. Nadi, tiyeni timugomezge Yehova na mtima wose. Sungilirani chigomezgo chinu kuŵa chakukhora. Kumbukani kuti na wovwiri wa Yehova Chiuta winu, palije icho mukwenera kopa.
SUMU 3 Nkhongono na Chigomezgo Chithu
a Mazina ghanyake ghasinthika.
b MAZGU GHAKULONGOSORA CHITHUZI: Gulu lichoko waka la ŵabali na ŵadumbu lawungana pamoza. Ŵali na chigomezgo chose kuti Yehova wali na nkhongono zakuvikilira ŵanthu ŵake kulikose uko ŵangaŵa pa charu chapasi.