Kasi Chiphalizgano cha World Cup Chingawovwira Nadi Kuti Ŵanthu Ŵaŵe Ŵakukolerana?—Kasi Baibolo Likutipo Wuli?

Ŵanthu pafupifupi 5 biliyoni ŵakuwonelera chiphalizgano cha bola la malundi cha FIFA World Cup icho chikamba pa November 20 ndipo chizamumara pa December 18, 2022. Ŵanthu ŵanandi ŵakuwona kuti maseŵero ghanthena agha ghangawovwira chomene kuti ŵanthu ŵaŵe ŵakukolerana para ŵakuwonelera.

•  “Maseŵero ghali na nkhongono ya kusintha charu chapasi. Ghali na nkhongono yakuchiska ŵanthu. Ghali na nkhongono yapadera ya kupangiska ŵanthu kuŵa ŵakukolerana.”—Nelson Mandela, pulezidenti wakale wa ku South Africa.

•  “Bola la malundi . . . likupangiska kuti ŵanthu wose ŵaŵe na chigomezgo, ŵakondwenge, ŵaŵe na chilato, ŵatemwanenge, kweniso kuti ŵaŵe na chinthu chinyake chakuyana.”—Gianni Infantino, pulezidenti wa FIFA.a

Kasi chiphalizgano cha World Cup panji maseŵero ghanyake ghalighose, ghangawovwira kufiska vinthu vyanthena ivi? Kasi pali chigomezgo chilichose pa nkhani ya mtende na umoza?

Kasi chikovwira nadi kuti ŵanthu ŵaŵe ŵakukolerana?

Chiphalizgano cha World Cup chapangiska ŵanthu kughanaghana vinandi padera waka pa bola. Chapangiska ŵanthu kwamba kudumbiskana vya nkhani ya kendeskero ka charu, wanangwa wa ŵanthu, sankho, kweniso nkhani ya vya chuma.

Nangauli vili nthena, kweni ŵanthu ŵanandi ŵakukondwa chomene kuwonelera maseŵero gha pa charu chose nga ntchiphalizgano cha bola la malundi cha World Cup. Ndipouli, maseŵero agha ghangapangiska ŵanthu kuŵa ŵakukolerana kwa nyengo yitali yayi. M’malo mwake, kanandi ghakulongora mzimu wakugaŵikana na vyakuchita ivyo Baibolo likayowoyerathu kuti vizamuchitika mu nyengo ya “mazuŵa ghaumaliro.”—2 Timote 3:1-5.

Chigomezgo chanadi chakuti ŵanthu ŵazakaŵe ŵakukolerana

Baibolo likutipa chigomezgo chanadi chakuti ŵanthu ŵazamuŵa ŵakukolerana pa charu chose. Likulayizga kuti ŵanthu wose pa charu ŵazamuŵa ŵakukolerana pasi pa boma la kuchanya lakuchemeka “Ufumu wa Chiuta.”—Luka 4:43; Mateyu 6:10.

Yesu Khristu, uyo ni Fumu ya Ufumu uwu, wazamuwoneseska kuti pa charu chose chapasi pali mtende. Baibolo likuti:

•  “Ŵarunji ŵazamutikitira, ndipo kuzamuŵa mtende wakuzara.”—Salimo 72:7.

•  “Wazamuthaska mukavu uyo wakulilira wovwiri . . . Wazamuŵathaska ku kuyuzga na nkhaza.”—Salimo 72:12, 14.

Nanga ni sono nthena, visambizgo vya Yesu vyawovwira ŵanthu mamiliyoni ghanandi awo ŵali mu vyaru 239, kuŵa ŵakukolerana. Ŵanthu aŵa ŵali kusambira kutemwa waliyose nanga ŵapambane vinyake. Kuti mumanye vinandi, ŵazgani nkhani izo zili pa mutu wakuti “Ivyo Tingachita Kuti Timazge Thinkho.”