Mazgu gha Umaliro Ghakuconta Mtima

MUTEPANJI mwapanga kale kafukufuku na kulinganizga fundo za nkani yinu na kuzilemba. Muteso panji mwasanga kale mazgu ghinu ghakwambilira ghakuwuska cikondwelero. Kweni ndipera, paliso cintu cinyake cakukhumbikwira, mazgu gha umaliro ghakuconta mtima. Lekani kuyuyura kuzirwa kwake. Mazgu gha umaliro agho muyowoyenge ndigho ghakumbukirikenge kwa nyengo yitali. Usange mazgu gha umaliro ngambura kuconta mtima, fundo izo mwanguyowoya pakwambilira zingatcujuka.

Aghanaghanirani nkani iyi: Ku umaliro kwa umoyo wake, Joshua wakayowoya nkani iyo ŵanarumi ŵarara Ŵaisrayeli ŵakayikumbukira makora comene. Pamanyuma pakuyowoya umo Yehova wakacitira na mtundu wa Israyeli kuyambira mu mazuŵa gha Abrahamu, kasi Joshua wakawerezga waka fundo zikuru mwakuyowoya mwakudumura? Napacoko pose. M’malo mwake, mwakusimikizga wakakhuŵirizga ŵantu ŵara kuti: “Muopani Yehova na kumuteŵetera mu urunji na mu unenesko.” Jiŵazgirani mwekha mazgu gha umaliro gha Joshua, agho ghalembeka pa Joshua 24:14, 15.

Nkani yinyake yakuzirwa yikusangika pa Milimo 2:14-36, iyo yikayowoyeka na mpostole Petros ku wumba wa ŵantu mu Yerusalemu, panyengo ya Ciphikiro ca Pentekoste wa 33 C.E. Cakudanga, wakarongosora kuti ŵantu pa nyengo yira ŵakawonanga kufiskika kwa ucimi wa Joel, wakuyowoya za kupungurika kwa mzimu utuŵa wa Ciuta. Mwakurondezgapo wakayowoya umo ucimi uwu ukuyanira na maucimi ghakuyowoya za Mesiya mu buku la Masalmo, agho ghakayowoya za kuwuka kwa Yesu Kristu na kukwezgeka kwake mwa kukhala ku woko lamaryero la Ciuta. Ndipo paumaliro pake Petros wakarongosora makoraghene ico muntu waliyose uyo wakaŵapo panyengo yira wakeneranga kucita. Iye wakayowoya kuti: “Nteura nyumba yose ya Israyeli yimanyiske kwene-kwene kuti Yesu uyu, Mweneuyo mukamupayika imwe, Ciuta wali kumwimika Fumu na Kristu wuwo.” Awo ŵakaŵapo ŵakafumba kuti: “Mwa ŵanyitu ticiteci?” Petros wakazgora kuti: “Ng’anamukani, ndipo mubapatizike muntu yose wa imwe mu zina la Yesu Kristu.” (Mil. 2:37, 38) Pa zuŵa lira ŵantu ŵakukwana 3,000, awo ŵakaconteka mtima na ivyo ŵakapulika, ŵakazomera unenesko wakuyowoya za Yesu Kristu.

Fundo Zakwenera Kuzikumbukira. Mazgu ghinu gha umaliro ghakwenera kukolerana na mutu wa nkani yinu. Igho ghakwenera kuyowoyeka mwa ndondomeko yiweme kuti gharongore apo nkani yinu yamalira. Nangauli nyengo zinyake mungamalizga nkani yinu mwa kuwerezga ghanji mwa mazgu gha mutu wa nkani, mungacita nteura para mwakhumba.

Cilato ca kuyowoya ncakuti mukhuŵirizge ŵanji kuti ŵagwilirepo ncito ivyo mwaŵaphalira. Cimoza mwa vilato vya mazgu gha umaliro ncakuti muŵarongore ŵategherezgi cakuti ŵacite. Pa nyengo iyo mwasankanga mutu na fundo zikuru za nkani yinu, kasi mwangughanaghanira umo nkani iyo yingaŵira ya candulo ku ŵategherezgi ŵinu, ndiposo umo mungakayiyowoyera kuti mukafiske cilato cake? Usange ndimo mwangucitira, ipo mukumanya ivyo mukukhumba kuti iwo ŵacite. Anteura zunurani ico mukukhumba kuti iwo ŵacite ndiposo rongorani umo ŵangacitira.

Padera pa kurongora ivyo ŵategherezgi ŵinu ŵakwenera kucita, mazgu ghinu gha umaliro ghakwenera kuŵa gha kuciska. Igho ghakwenera kurongora vifukwa vyakwenelera vyakucitira nteura, ndiposo ghakwenera kurongora vyandulo ivyo yunji wangasanga cifukwa ca kucita nteura. Usange sentensi yaumaliro yayowoyeka makoraghene, iyo yingapangiska nkani yinu yose kuŵa yakuconta mtima.

Kumbukirani umaliro wa nkani yinu. Mazgu ghinu ghakwenera kurongora kuti muli kuumaliro wa nkani. Sipidi ya kayowoyero kinu yikwenera kuŵa yakwenelera. Lekani kuyowoya mwa luŵiro-luŵiro mupaka kuumaliro wa nkani yinu na kulekezga kuyowoya mwa mabuci. Kulwande linyake, lekani kuyowoya mwapasipasi. Nkongono ya mazgu ghinu yikwenera kuŵa yiweme, kupazanguka yayi. Mazgu ghinu gha umaliro ghakwenera kurongora kuti mwafika ku umaliro wa nkani. Yowoyani mwakusimikizga. Pa nyengo iyo mukunozgekera nkani yinu, mungatondekanga yayi kuyezgelera umo mwamuyowoyera mazgu gha umaliro.

Kasi mazgu gha umaliro ghakwenera kuŵa gha utali wuli? Palije dango lakurongora utali wa nyengo. Mazgu gha umaliro ghangaŵanga ghatali yayi. Utali wake wakwenelera ungamanyikwa mwakuwona candulo ico igho ghakupereka ku ŵategherezgi. Mazgu ghaweme gha umaliro ni agho ngapusu, ghakudunjika ndiposo ghakukondweska. Mazgu gha umaliro ghatali agho ghangaŵa na ciyerezgero naghoso ghangaŵa na cakufumapo ciweme usange mwaghanozgekera makora. Yerezgerani mazgu gha umaliro gha buku lose la Mupharazgi, agho ghakusangika pa Mupharazgi 12:13, 14, na Upharazgi ufupi wa pa Lupiri, uwo walembeka pa Mateyu 7:24-27.

Mu Uteŵeti wa m’Munda. Palije malo ghanyake uko mukwenera kuyowoya mazgu gha umaliro kwa nyengo zinandi kuruska mu uteŵeti wa m’munda. Mwa kunozgekera makora na kuŵa na citemwa pa ŵantu, mungayowoya makora mazgu gha umaliro. Urongozgi uwo wayowoyeka mu mapeji ghakwambilira gha cipaturo cino wungagwiriskirikaso ncito makoraghene para mukudumbiskana na muntu uyo mwakumana naye.

Mungaŵa na cidumbirano cifupi comene. Mutepanji muntu uyo mukuyowoyeskana naye ngwakutangwanika. Nyengo zinyake cidumbirano cinu cingaŵa ca utali wa miniti yimoza. Usange ncakwenelera, mungayowoya kuti: “Nawona nekha kuti muli ŵakutangwanika. Kweni pambere nindarute nkukhumba niyowoye fundo yimoza yakuzirwa. Baibolo likurongosora kuti Mlengi withu wali na cilato ciweme comene—kuzgora caru capasi kuŵa malo ghaweme kuti ŵantu ŵasangwe nagho kwandanda. Ncamacitiko kuti imwe na ine tizakakhale mu Paradiso uyu, kweni pa nyengo yasono tikwenera kusambira ivyo Ciuta wakukhumba kuti tifiske.” Panji mungamuphalira waka kuti mwizengeso pa nyengo iyo wazamuŵa wakufwatuka.

Usange mweneko nyumba wadumulizga cidumbirano ico, nanga kungaŵa kwa musinjiro, ni vinandi viweme ivyo mungacita. Gwiriskirani ncito urongozgi wakusangika pa Mateyu 10:12, 13 na Ŵaroma 12:17, 18. Zgoro linu liweme lingapangiska muntu uyo kuti wawonenge Ŵakaboni ŵa Yehova mwakwenelera. Para mungacita nteura, mbwenu mwacita makora comene.

Kulwande linyake, mutepanji mwadumbiskana makoraghene na mweneko wa nyumba. Mwalekeraci kuti muwerezge kuyowoya fundo yikuru iyo mukukhumba kuti wayikumbukirenge? Mukhuŵirizgani kuti wagwilirepo ncito ivyo mwamuphalira.

Para mwawona kuti mwaŵi wulipo wakuti muzakadumbiskaneso nyengo yinyake kuntazi, yowoyani mu ntowa yakuti waŵe wakunweka na ivyo muzamusambira. Mufumbani fumbo,—mutepanji lakufumira mu buku la Kukambitsirana za m’Malemba panji buku ilo likugwiriskirika ncito pa kucitiska masambiro gha Baibolo gha panyumba. Kumbukirani cilato cinu, nga ni umo Yesu wakayowoyera pa Mateyu 28:19, 20.

Kasi mukumalizga kucitiska sambiro la Baibolo la panyumba? Kuwerezga fundo yikuru kovwirenge musambiri kuti wakumbukire ivyo mwadumbiskana. Kudumbiskana mafumbo gha kuweleramo kovwirenge musambiri kuti fundo zikuru zididimizgike mu mtima mwake, ici cingacitika usange mwadumbiskana mafumbo gha kuweleramo mwambura kucimbilira. Kumufumba fumbo la umo wangasangira candulo na ivyo mwasambira panji kumufumba umo wangaphalira ŵanji ivyo wasambira, kungamovwira kuti wawone umo wangagwiriskira ncito ivyo wasambira mu umoyo wake.—Zinth. 4:7.

Kumbukirani kuti, mazgu ghinu gha umaliro ndigho ghakupangiska kuti nkani yose yiŵe yakuconta mtima.