Ivyo Vingatovwira Kuti Tiŵe Ŵaluso mu Uteŵeti—Kughanaghanira Ŵanthu
Chifukwa Wuli Nkhwakuzirwa: Yesu wakatemwanga na kughanaghanira munthu waliyose payekha. Mwachiyelezgero, pa nyengo yinyake Yesu wakachizga munthu wambura kupulika. Wakamutolera kumphepete kutali na mzinda kuti ndiko wakamuchizgire. (Mrk. 7:31-35) Kweniso Yesu wakaghanaghaniranga ŵasambiri ŵake. Wakamanyanga ivyo ŵangafiska. Lekani wakaŵasambizganga vinthu vinandi yayi pa nyengo yimoza. (Yoh. 16:12) Wati waluta kuchanya, Yesu wakaleka yayi kughanaghanira ŵanthu. (2 Tim. 4:17) Pakuti ndise ŵasambiri ŵake, tikwenera kumuyezga. (1 Pet. 2:21; 1 Yoh. 3:16, 18) Tiŵenge ŵaluso mu uteŵeti para tikughanaghanira munthu uyo tikumupharazgira. Tikwenera kumanya masuzgo ghake na ivyo wakutemwa. Wangategherezga usange wamanya kuti tizira waka kumupharazgira yayi panji kumupa waka mabuku, kweni chifukwa chakuti tikumughanaghanira.
Yezgani Sachizgo Ili Mwezi Uno:
Yezgelerani umo mungasinthira nkhani kuti yikolerane na ivyo munthu wakuyowoya. Mungachita nthena pa nyengo yakusopera ya mbumba panji para muli mu uteŵeti.
Pakunozgekera ungano wa uteŵeti, mubali uyo wakulongozga wangalongosora panji kuyezgelera ivyo mungachita kulongora kuti mukughanaghanira ŵanthu.