LAYIBULARE YA PA INTANETI ya Watchtower
Watchtower
LAYIBULARE YA PA INTANETI
Chitumbuka
  • BAIBOLO
  • MABUKU
  • MAUNGANO
  • be sambiro 43 p. 234-p. 235 ndime 3
  • Kudumba Fundo za mu Nkani Iyo Mwapika

Vidiyo palije.

Phepani, pali suzgo linyake.

  • Kudumba Fundo za mu Nkani Iyo Mwapika
  • Sangani Candulo na Sukulu ya Uteŵeti wa Ciuta
  • Nkhani Zakuyanako na Iyi
  • Kunozgekera Nkani za Musambiri mu Sukulu
    Sangani Candulo na Sukulu ya Uteŵeti wa Ciuta
  • Kunozgekera Nkani za Mpingo
    Sangani Candulo na Sukulu ya Uteŵeti wa Ciuta
  • Kulemba Autilayini
    Sangani Candulo na Sukulu ya Uteŵeti wa Ciuta
  • Kupangiska Fundo Zikuru Kumanyikwa
    Sangani Candulo na Sukulu ya Uteŵeti wa Ciuta
Wonani Vinyake
Sangani Candulo na Sukulu ya Uteŵeti wa Ciuta
be sambiro 43 p. 234-p. 235 ndime 3

Sambiro 43

Kudumba Fundo za mu Nkani Iyo Mwapika

Ncici ico mukwenera kucita?

Dumbani fundo zakukolerana na nkani iyo mwapika, ndipo para mwapika citopoko uko mutorenge nkani yinu, malemba na fundo zose zikwenera kufumira mwenemumo.

Ncifukwa wuli nkhwakuzirwa?

Para tikudumba fundo za mu nkani iyo tapika, cikurongora kuti tikucindika manozgero gha kuryeska agho ghalinganizgika na gulu la muzga wamagomezgeko.

BAIBOLO likuyerezgera mpingo Wacikristu na thupi la muntu. Ciŵaro cilicose ncakukhumbikwa, kweni “viri na milimo yakulingana cara.” Mwakukorerana na fundo iyi, tikwenera kugwiriskira ncito mwaŵi wuliwose uwo wapika kwa ise. Ici cikukhumbikwira kuti tipulikiske makora na kuzirwiska nkani iyo tamuyowoya kuti tileke kuyuyura kuzirwa kwa fundo zinyake za mu nkani iyo, mwakughanaghana kuti fundo zinyake ni zakukondweska comene kuruska zinyake. (Rom. 12:4-8) Gulu la muzga wa magomezgeko liri na ncito ya kupereka cakurya cauzimu “mu nyengo yakwenerera.” (Mat. 24:45) Anteura, usange tikugwiriskira ncito maluso ghithu mwakurondezga urongozgi uwo tapika pakuyowoya nkani, ici cikurongora kuti tikuzirwiska manozgero agha. Ici cikupangiska kuti mpingo wose wendenge makora.

Vyakwenera Kuyowoya. Para mwapika nkani mu sukulu, woneseskani kuti mudumbe fundo za mu nkani yeneyiyo pera, kusazgamo zinyake yayi. Kwa nyengo zinandi, muphalilikenge nkani yakuti mutoremo fundo zinu. Usange mundaphalilike nkani yakusindikizgika yakuti mutoremo fundo za nkani yinu, penjani mwekha nkani yakusindikizgika umo mungasangamo fundo za nkani yinu. Kweni ndipera, peneapo mukunozgekera nkani yinu, woneseskani kuti fundo zinu zose zikukolerana na nkani iyo mwapika. Peneapo mukughanaghanira fundo zakuti musazgemo mu nkani yinu, mukwenera kughanaghaniraso ŵategherezgi ŵinu.

Ŵazgani mwakupwererera apo pafumira nkani yinu, sandani malemba ghose agho ghalimo. Pamanyuma pake ghanaghanirani umo mungakayowoyera makoraghene kuti ŵategherezgi ŵakasange candulo. Sankani fundo ziŵiri panji zitatu kufuma mu nkani yakusindikizgika kuti ziŵe fundo zikuru za nkani yinu. Mwakuyana waka, sankani malemba agho ghali mu nkani yinu ghakuti mukaŵazge na kugharongosora.

Kasi fundo za nkani yinu zikwenera kuŵa zinandi wuli? Zekha izo mungakakwaniska kukazirongosora makora. Lekani kutimbanizga kasambizgiro kaweme mwakuyowoya fundo zinandi. Usange zinyake mwa fundo izo zili mu nkani yakusindikizga zikukolerana yayi na cilato ca nkani yinu, ipo mbwenu ŵikani pwererero linu pa fundo izo zingafiska cilato ca nkani yinu. Pakuyowoya nkani yinu, yowoyani fundo zekha izo zingapereka sambiro ndiposo candulo ku ŵategherezgi ŵinu. Cilato ca urongozgi wuno kuti ncakuti mukayowoye fundo zinandi yayi, kweni ncakuti mugwiriskire ncito fundo izo mwapika kuŵa lufura lwa nkani yinu.

Lekani kukayowoya waka mwakudumura nkani yinu. Mukwenera kumanya umo mwamurongosorera fundo zinyake, kukazipatawula, kupereka ciyerezgero cake, ndiposo kurongora umo zingagwiriskirikira ncito. Pakwenera kuŵaso fundo zinyake zakuti mukazigwiriskire ncito pa kupatawula fundo zikuru za mu nkani yinu m’malo mwakuzileka waka fundo zanteura izo.

Ŵabali awo mbakwenereskeka kuŵa ŵasambizgi ŵangapempeka kuti ŵayowoye nkani mu Ungano wa Uteŵeti. Iwo ŵakumanya kukhumbikwa kwa kuyowoya makora fundo za mu nkani iyo ŵapika m’malo mwakuyisinta na kuyowoya fundo zinyake. Mwakuyana waka, ŵabali awo ŵakuyowoya nkani za cisanisani nawoso ŵakupika maautilayini ghakuti ŵaghagwiriskire ncito. Maautilayini agha ghakuperekaso mwaŵi wakuti ŵasankepo fundo, ghakurongora fundo zikuru zakuti mupatawule, fundo zakukhozgera, na malemba agho ghakuŵa lufura lwa nkani yinu. Kumanya kusambizga mwakugwiriskira ncito fundo zakufumira mu nkani iyo mwapika kukupereka mwaŵi wakuti muzakayowoye nkani zikuru.

Urongozgi uwu ungamovwiraniso umo mungapangiskira makora masambiro gha Baibolo gha panyumba. Mungasambira umo mukwenera kuŵikira maghanoghano ghinu pa sambiro ilo mukudumbiskana, m’malo mwakusinta cidumbirano cinu mwakurongosora fundo izo zikuleka kukolerana na mutu uwo mukusambira, nangauli zingaŵa zakukondweska. Ndipouli, usange mwapulikiska nadi cilato ca sambiro lino, mbwenu mungaŵa wakukakika yayi kusazgapo cimanyisko cinyake ico musambiri wakwenera kucimanya.

UMO MUNGACITIRA

  • Yowoyani fundo izo zikukolerana na nkani iyo mwapika.

  • Usange mwapika nkani yakusindikizga nga ncitopoko ca nkani yinu, sankani fundo zikuru na malemba agho mukukhumba kukaghagwiriskira ncito kufumira mu nkani yakusindikizga yeneyiyo m’malo mwakutora kunyake.

NCITO: Kwa mazuŵa ghatatu pa nyengo iyo mukuŵazga lemba la zuŵa ilo, gwarani muzere wakuzingirizga lizgu panji mazgu agho ghali na fundo yikuru. Perekani fundo yimoza panji ziŵiri izo zikukolerana na fundo yikuru. Pamanyuma pake, mu mazgu ghinu na ghinu, yowoyanipo fundo pa nkani iyo mukudumbirana mwakugwiriskira ncito lemba na fundo izo mwazigwara mwakuzingirizga.

    Mabuku gha Chitumbuka (1982-2023)
    Fumani
    Njirani
    • Chitumbuka
    • Tumizgani
    • Ivyo Mukukhumba
    • Copyright © 2025 Watch Tower Bible and Tract Society of Pennsylvania
    • Malango
    • Phangano
    • Privacy Settings
    • JW.ORG
    • Njirani
    Tumizgani