Kasi Visopa Vikucita Wuli pa Nkhani ya Nkhondo?

Alberto wakagwira nchito ya usilikari kwa vyaka pafupifupi 10. Iyo wakati: “Muliska withu wakatitumbika wakati, ‘Ciuta wali namwe.’ Kweni nkhazukuma nkhati, ‘uku nkhuluta namukoma ŵanthu, nakuti Baibolo likuti: “Ungakomanga.”’”

Ray wakaŵa msilikari wa nkhondo za pa maji mu nyengo ya Nkhondo Yaciŵiri ya Caru Cose. Zuŵa linyake wakafumba muliska kuti: “Imwe mukwiza mu sitima muno kuzakalombera gulu lithu la nkhondo kuti likaluske. Kweni asi ndivyo ŵalwani ŵithu nawo ŵakucita?” Muliska uyu wakazgora kuti Fumu yikucita vinthu mwamunthondwe.

Usange mundakhorwe na zgoro la muliska ili, manyani kuti muli mwekha yayi.

KASI BAIBOLO LIKUSAMBIZGACI?

Yesu wakati limoza mwa malango ghakuru comene gha Ciuta ndakuti: “Utemwenge mzengezgani wako umo ukujitemwera wamwene.” (Mariko 12:31) Kasi Yesu wakati titemwenge mzengezgani cifukwa ca uko wakukhala panji fuko lake? Yayi. Wakaphalira ŵasambiri ŵake kuti: “Na ici, wose ŵamanyenge kuti ndimwe ŵasambiri ŵane, usange muli na citemwa pakati pinu.” (Yohane 13:34, 35) Apa Yesu wakati citemwa cawo cikwenera kuŵa cikuru comene cifukwa ndico cizamuŵa cimanyikwiro cakuti mbasambiri ŵake. Ŵakukoma ŵanthu yayi, m’malo mwake mbakunozgeka kufwira ŵanji.

Ŵakhristu ŵa mu nyengo yakwambilira ŵakacita mwakuyana na ivyo Yesu wakayowoya. Buku linyake likuti: “Ŵalongozgi ŵakwambilira ŵa chalichi, kusazgapo Tertullian na Origen, ŵakacitira ukaboni kuti Ŵakhristu ŵakakanizgikanga kukoma ŵanthu, ndipo ici cikaŵavikiliranga kuti ŵaleke kunjira usilikari.” (The Encyclopedia of Religion)

KASI ŴAKABONI ŴA YEHOVA ŴAKUCITA WULI?

Pakuti Ŵakaboni ŵa Yehova ŵali mu vyaru vyose, ŵanji ŵali mu vyaru ivyo muli nkhondo. Ndipouli, ŵakufwilirapo kuti ŵalutilire kulongora citemwa ku ŵanji, cifukwa ndico nchimanyikwiro cawo.

Mwaciyelezgero, mu 1994 apo Ŵahutu na Ŵatutsi ŵakatimbananga ku Rwanda, Ŵakaboni ŵa Yehova ŵakanjilirapo yayi. Ŵakaboni ŵa mtundu unyake ŵakabisanga Ŵakaboni ŵanyawo awo mba mtundu wawo yayi, ndipo kanandi para ŵacita nthena umoyo wawo ukaŵanga pa ngozi. Apo Ŵakaboni ŵaŵiri Ŵacihutu awo ŵakabisa Ŵakaboni ŵanyawo Ŵacitutsi ŵakakoleka, msilikari wa gulu la Interahamwe, wakati: “Mukwenera kufwa cifukwa mwawovwira Ŵatutsi kuti ŵacimbire.” Cacitima nchakuti Ŵakaboni ŵaŵiri Ŵacihutu aŵa ŵakakomeka.—Yohane 15:13.

Mukuwona wuli, kasi ivyo Ŵakaboni ŵa Yehova ŵakucita, vikukolerana yayi na ivyo Yesu wakayowoya pa nkhani yakulongora citemwa ca kujipata?