Bokosi la Fumbo

◼ Mbanjani ŵakwenera kupempha mabuku panyake sambiro la Baibolo pa kuponi panji pa Intaneti?

Kanandi mabuku ghithu ghakuŵa na kuponi iyo munthu wangalemba na kutuma ku ofesi ya munthavi kuti wapokere mabuku panji kuti yumoza wa Ŵakaboni ŵa Yehova walute kukamovwira. Kweniso munthu wangapempha sambiro la Baibolo pa adiresi yithu ya www.jw.org. Nthowa izi zawovwira ŵanthu ŵanandi kusambira unenesko. Ndipouli, para ŵapharazgi ŵakupempha kuti ŵabali ŵawo panji ŵanthu ŵanyake ŵawovwirike kwizira mu nthowa izi, pakuŵa suzgo.

Ŵanyake ŵakupokera mabuku agho ŵandapemphe ku ofesi ya munthavi, ndipo ŵakuwona nga gulu la Yehova likuŵasuzga waka. Kweniso ŵakughanaghana kuti ŵali kulembeka pa ndondomeko ya ŵanthu awo ŵapokerenge mabuku ghithu. Ŵapharazgi awo ŵapempheka kuti wakawovwire munthu uyo wandapemphe sambiro, ŵakuzizwa para munthu uyo wakuŵakalipira. Ntheura para munthu wakukhumba mabuku panji sambiro la Baibolo, wakwenera kupempha yekha pa adiresi yithu ya pa Intaneti panji pa kuponi. Ŵapharazgi ŵangapemphanga vinthu ivi m’malo mwa ŵanyawo yayi. Usange ofesi yamanya kuti mupharazgi wapempha m’malo mwa munthu munyake, yikucitapo kanthu yayi.

Tingacita wuli pera kuti mbali withu panji munthu uyo tikumanyana nayo wawovwirike mwauzimu? Usange mukukhumba kuti wapokere mabuku, nchiwemi kuti mumutumire mwekha nga nchawanangwa. Usange ngwakunweka, ndipo wakukhumba kuti yumoza wa Ŵakaboni ŵa Yehova wamovwire, kweni mukumanya yayi umo mungaphalilira ŵalara ŵa mpingo wakufupi na uko wakunweka uyo wakukhala, mupeleke fomu ya Weleraniko kwa Munthu Uyu (S-43) kwa mulembi wa mpingo winu, ndipo wayisandenge na kuyitumizga ku ofesi ya munthavi. Kweni usange wakunweka wali mu jele, mu cipatala ca ŵanthu awo ŵali kuzgoŵera munkhwala wakuloŵezga, panji mu cipatala ca boma, kutuma fomu yayi ku ofesi m’malo mwa munthu uyo. Muphalirani kuti wapemphe wovwiri ku ŵabali awo ŵakwiza ku malo agha panji wapemphe yekha wovwiri ku ofesi ya munthavi.