2 Berɛsosɛm

18 Na Yehosafat nyaa ahonyadeɛ ne animuonyam pii,+ nanso ɔne Ahab+ dii ayewareɛ.+ 2 Mfeɛ bi akyi no, ɔkɔɔ Ahab nkyɛn wɔ Samaria,+ na Ahab de nnwan+ ne anantwie bebree bɔɔ afɔdeɛ maa ɔno ne nnipa a wɔka ne ho no. Na ɔdaadaa+ no sɛ ɔne no nkɔ Ramot-Gilead+ so. 3 Asɛm a Israel hene Ahab bisaa Yuda hene Yehosafat ne sɛ: “Wo ne me bɛkɔ Ramot-Gilead+ so anaa?” Ɛnna ɔka kyerɛɛ no sɛ: “Me ne wo nyinaa yɛ nipa baako. Me man ne wo man nso yɛ baako, enti yɛtaa w’akyi ɛko no mu.”+

4 Na Yehosafat ka kyerɛɛ Israel hene sɛ: “Sɛ ɛbɛyɛ a, anka bisa+ Yehowa anom asɛm ansa.” 5 Ɛnna Israel hene boaboaa adiyifoɔ+ no ano, mmarima ahanan, na ɔbisaa wɔn sɛ: “Yɛne Ramot-Gilead nkɔko, anaa mennyae?”+ Na wɔkaa sɛ: “Kɔ, na nokorɛ Nyankopɔn de wɔn bɛhyɛ ɔhene nsa.”

6 Ɛnna Yehosafat bisaa sɛ: “Yehowa diyifoɔ foforɔ biara nni hɔ bio anaa?+ Momma yɛmfa ne so mmisa.”+ 7 Na Israel hene ka kyerɛɛ Yehosafat sɛ:+ “Baako da so wɔ hɔ+ a yɛbɛtumi afa ne so abisa Yehowa, nanso me deɛ, mempɛ n’asɛm+ koraa ɛfiri sɛ ɔnhyɛɛ me ho nkɔm pa bi da, na bɔne nko ara na daa ɔka.+ Ɔne Yimla ba Mikaia.”+ Nanso Yehosafat ka kyerɛɛ no sɛ: “Mma ɔhene nnka saa.”+

8 Ɛnna Israel hene frɛɛ ahemfie mpanimfoɔ+ no bi, na ɔka kyerɛɛ no sɛ: “Kɔfa Yimla ba Mikaia bra ntɛm.”+ 9 Saa berɛ no, na Israel hene ne Yuda hene Yehosafat tete wɔn nhennwa so hyehyɛ wɔn ntadeɛ+ wɔ Samaria kuro pono ano ayuporobea hɔ, na adiyifoɔ no nyinaa gyinagyina wɔn anim reyɛ wɔn adiyifoɔ adwuma.+ 10 Na Kenaana ba Sedekia yɛɛ dadeɛ mmɛn,+ na ɔkaa sɛ: “Deɛ Yehowa aka nie,+ ‘Yei na wode bɛpempem Siriafoɔ no de akɔsi sɛ wobɛtɔre wɔn aseɛ.’”+ 11 Adiyifoɔ nkaeɛ no nyinaa nso hyehyɛɛ nkɔm korɔ no ara sɛ: “Kɔ Ramot-Gilead so na kɔdi nkonim,+ na Yehowa de wɔn bɛhyɛ ɔhene nsa.”+

12 Na deɛ wɔsomaa no sɛ ɔnkɔfrɛ Mikaia mmra no ka kyerɛɛ no sɛ: “Hwɛ! Adiyifoɔ no nyinaa de nokorɔ aka asɛmpa akyerɛ ɔhene, enti ma w’asɛm nyɛ sɛ wɔn deɛ+ no, na ka asɛmpa.”+ 13 Nanso Mikaia kaa sɛ: “Sɛ́ Yehowa te aseɛ+ yi, deɛ me Nyankopɔn bɛka no, ɛno ara na me nso mɛka.”+ 14 Berɛ a ɔbɛduruu ɔhene anim no, ɔhene bisaa no sɛ: “Mikaia, yɛne Ramot-Gilead nkɔko, anaa mennyae?” Ɛhɔ ara na ɔbuaa ɔhene sɛ: “Monkɔ na monkɔdi nkonim, na wɔde wɔn bɛhyɛ mo nsa.”+ 15 Ɛnna ɔhene ka kyerɛɛ no sɛ: “Mprɛ sɛn na memmaa wonkaa ntam+ sɛ nokorɛ nko ara na ka no Yehowa din mu kyerɛ me?”+ 16 Ɛnna ɔkaa sɛ: “Hwɛ, mehunu Israel sɛ wɔabɔ wɔn nyinaa ahwete wɔ mmepɔ no so sɛ nnwan a wɔnni hwɛfoɔ.+ Na Yehowa aka sɛ: ‘Yeinom nni wura.+ Enti ma obiara nsan nkɔ ne fie asomdwoeɛ mu.’”+

17 Ɛnna Israel hene ka kyerɛɛ Yehosafat sɛ: “Ɛnyɛ asɛm a mekaeɛ no na ɛda hɔ yi, sɛ ‘ɔrenhyɛ me ho nkɔm pa bi, na mmom nkɔm bɔne’?”+

18 Na odiyifoɔ no toaa so sɛ: “Enti montie deɛ Yehowa wɔ ka:+ Mehunu Yehowa sɛ ɔte n’ahennwa+ soɔ a ɔsoro asafodɔm+ nyinaa gyinagyina ne nifa ne ne benkum.+ 19 Na Yehowa bisaa sɛ, ‘Hwan na ɔbɛkɔ akɔdaadaa Israel hene Ahab ama no ne Ramot-Gilead akɔko na watɔ?’ Afei wɔkasakasaeɛ, na oyi ka sei, na oyi nso aka sei.+ 20 Akyire yi, honhom bi+ firi bɛgyinaa Yehowa anim kaa sɛ: ‘Me na mɛkɔ akɔdaadaa no.’ Ɛnna Yehowa bisaa no sɛ, ‘Wobɛyɛ no sɛn?’+ 21 Na ɔno nso buaa sɛ, ‘Mɛkɔ akɔyɛ atorɔ honhom wɔ n’adiyifoɔ no nyinaa anom.’+ Ɛnna Onyankopɔn kaa sɛ, ‘Wobɛtumi adaadaa no ampa; deɛ worekɔyɛ no, ɛbɛyɛ yie.+ Enti kɔ na kɔyɛ saa.’+ 22 Enti hunu sɛ Yehowa de atorɔ honhom na ahyɛ w’adiyifoɔ yi anom,+ nanso mmusuo na Yehowa aka afa wo ho.”+

23 Ɛnna Kenaana+ ba Sedekia+ twe bɛn Mikaia+ bɛbɔɔ no sotorɔ+ bisaa no sɛ: “Ɛhefa na Yehowa honhom nam sianee me ho ne wo bɛkasaeɛ?”+ 24 Na Mikaia buaa no sɛ: “Ɛda+ a wobɛhyɛn pia mu akɔhunta no na wobɛhunu baabi a ɛnam baeɛ.”+ 25 Ɛnna Israel hene no kaa sɛ: “Momfa Mikaia nkɔma amrado Amon ne ɔhene ba Yoas.+ 26 Na monka nkyerɛ wɔn sɛ: ‘Deɛ ɔhene aka nie: “Momfa saa akoa yi nto nneduadan+ mu, na monte n’aduane+ ne ne nsuo so nkɔsi sɛ mɛsan aba asomdwoeɛ mu.”’”+ 27 Ɛnna Mikaia kaa sɛ: “Sɛ wosan ba asomdwoeɛ mu paa a, ɛnneɛ na ɛnyɛ Yehowa na ɔne me kasaeɛ.”+ Na ɔka kaa ho sɛ: “Mo nyinaa nso montie bi.”+

28 Na Israel hene ne Yuda hene Yehosafat kɔɔ Ramot-Gilead+ so. 29 Ɛnna Israel hene ka kyerɛɛ Yehosafat sɛ: “Mɛsakra me ho+ akɔ akono, nanso wo deɛ, hyɛ wo ntadeɛ.”+ Enti Israel hene sakraa ne ho na wɔkɔɔ akono hɔ.+ 30 Ná Siria hene no ahyɛ ne nteaseɛnam so asahene sɛ: “Mo ne kumaa anaa ɔkɛseɛ nnko, Israel hene nko ara na momfa mo ani nsi ne soɔ.”+ 31 Na ɛbaa sɛ berɛ a nteaseɛnam so asahene no hunuu Yehosafat pɛ, wɔkeka kyerɛɛ wɔn ho sɛ: “Israel hene no nie.”+ Enti wɔkɔɔ ne so sɛ wɔne no rekɔko. Ɛnna Yehosafat teateaam hwehwɛɛ boafoɔ,+ enti Yehowa boaa no,+ na ɛhɔ ara na Onyankopɔn maa wɔdane firii n’akyi.+ 32 Enti berɛ a nteaseɛnam so asahene no hunuu sɛ ɛnyɛ Israel hene no, ntɛm ara na wɔgyaee n’akyiridie.+

33 Na ɔbarima bi too n’agyan a n’ani nna, na ɛkɔwɔɔ+ Israel hene wɔ n’akotadeɛ no mpameeɛ so. Enti ɔhene no ka kyerɛɛ teaseɛnam kafoɔ+ no sɛ: “Dane wo nsa na fa me firi akono ha kɔ, na wɔapira me pira bɔne.”+ 34 Ɛko no mu yɛɛ den saa da no, na wɔde Israel hene no gyinaa teaseɛnam no mu de n’ani kyerɛɛ Siriafoɔ no kɔsii anwummerɛ. Awia kɔtɔeɛ no, na wawu.+