Ɔsɛnkafoɔ

11 To wo paanoo pete+ nsuo ani,+ na nna pii akyi no, wo nsa bɛka bio.+ 2 Fa bi ma nnipa nson anaa nwɔtwe,+ ɛfiri sɛ wonnim asɛmmɔne a ɛbɛba asase soɔ.+

3 Sɛ nsuo hyɛ mununkum mã a, osuo na ɛtɔ gu asase soɔ;+ na sɛ dua bu kɔ anafoɔ anaa atifi a, baabi a dua+ no bɛhweɛ no, ɛhɔ ara na ɛbɛda.

4 Deɛ ɔhwɛ mframa no rengu aba; na deɛ ɔhwɛ mununkum no rentwa aba.+

5 Sɛdeɛ wonnim honhom dwumadie wɔ abɔfra a wɔnyem no nnompe mu no,+ saa ara na wonnim nokorɛ Nyankopɔn a ɔyɛ adeɛ nyinaa no nnwuma.+

6 Gu w’aba anɔpa, na nyi wo nsa mfiri ho kɔsi anwummerɛ,+ ɛfiri sɛ wonnim deɛ ɛbɛyɛ yie;+ yei anaa yei, anaasɛ mmienu no nyinaa bɛbom ayɛ yie.

7 Hann yɛ dɛ, na ɛyɛ sɛ aniwa bɛhunu awia;+ 8 sɛ onipa di mfeɛ pii mpo a, ma n’ani nnye+ ne nyinaa mu. Nanso ma no nkae esum nna no,+ sɛ ɛbɛtumi ayɛ pii; emu da biara yɛ ahuhudeɛ.+

9 Aberanteɛ, ma w’ani nnye+ wo mmeranteberɛ mu, na ma w’akoma nhunu anigyeɛ wo mmabunberɛ mu, na nante w’akoma akwan so ne deɛ w’ani hunu mu.+ Nanso hunu sɛ yeinom nyinaa ho na nokorɛ Nyankopɔn bɛbu wo atɛn.+ 10 Enti yi adwendwene firi w’akomam, na ma amanehunu mpare wo honam,+ ɛfiri sɛ mmeranteberɛ ne mmabunberɛ yɛ ahuhudeɛ.+