Leviticus

11 Yehowa ka kyerɛɛ Mose ne Aaron sɛ: 2 “Monka nkyerɛ Israelfoɔ sɛ, ‘Asase so mmoa nyinaa, deɛ mobɛtumi awe nie:+ 3 Mobɛtumi awe aboa biara a ne nan mu apae na ɔpu wesa.+

4 “‘Mmoa a wɔpu wesa anaa wɔn nan mu apae a ɛnsɛ sɛ moweɛ nie: Monnwe yoma, ɛfiri sɛ ɔpu wesa deɛ, nanso ne nan mu mpaeeɛ. Ne ho nte mma mo.+ 5 Afei nso monnwe atwaboa,+ ɛfiri sɛ ɔpu wesa deɛ, nanso ne nan mu mpaeeɛ. Ne ho nte mma mo. 6 Monnwe adanko+ nso, ɛfiri sɛ ɔpu wesa deɛ, nanso ne nan mu mpaeeɛ. Ne ho nte mma mo. 7 Bio nso monnwe prako,+ ɛfiri sɛ ne nan mu apae asi deɛ, nanso ɔmpu nwesa. Ne ho nte mma mo. 8 Monnwe wɔn nam, na monnsɔ wɔn afunu mu.+ Wɔn ho nte mma mo.+

9 “‘Nsuo mu mmoa a mobɛtumi aweɛ nie:+ Asubɔnten anaa po mu aboa biara a ntɛtɛ ne abena wɔ ne ho+ deɛ, mobɛtumi awe. 10 Nanso po anaa nsuo biara mu mmoa manyamanya anaa nsuo mu akra ateasefoɔ a wɔnni ntɛtɛ ne abena deɛ, ɛyɛ mo akyiwadeɛ. 11 Ɛyɛ mo akyiwadeɛ koraa. Monnwe bi,+ na wɔn funu nso, monkyiri koraa. 12 Biribiara a ɛwɔ nsuo mu a ɛnni ntɛtɛ ne abena yɛ mo akyiwadeɛ.

13 “‘Ntuboa a ɛsɛ sɛ mokyire nie.+ Monnwe wɔn nam. Wɔyɛ akyiwadeɛ: Ɔkɔdeɛ,+ ɔkɔrebia, pɛtɛ tuntum, 14 ne ɔkom ne asansa,+ ne wɔn a wɔn su te saa, 15 ne kwaakwaadabi+ ahodoɔ nyinaa, 16 ne sohori,+ patuo, asomfena, ne akorɔma, ne wɔn a wɔn su te saa, 17 ne patubiaa, po so anene, patuo asotenten,+ 18 ne suborɔkokɔ, pokupoku, ne pɛtɛ,+ 19 ne asukɔnkɔn ne asunoma ahodoɔ a wɔn su te sɛ yeinom, ne asɔkwaa ne apan.+ 20 Ntuboa manyamanya a wɔtumi nante wɔn nan nnan soɔ yɛ mo akyiwadeɛ.+

21 “‘Ntuboa manyamanya a wɔtumi nante wɔn nan nnan soɔ yi na monweɛ, wɔn a wɔwɔ nan a wɔde hurihuri fam. 22 Wɔn mu deɛ mobɛtumi aweɛ nie: Ntutummɛ ahodoɔ nyinaa,+ ne aketekyire ne mmɛbɛ+ ahodoɔ. 23 Ntuboa manyamanya foforɔ a wɔwɔ nan nnan yɛ mo akyiwadeɛ.+ 24 Yeinom bɛgu mo ho fĩ. Obiara a ɔbɛsɔ wɔn funu mu no ho bɛgu fĩ akɔsi anwummerɛ.+ 25 Na obiara a ɔbɛsoa wɔn funu no, ɛsɛ sɛ ɔsi+ n’atadeɛ, nanso ne ho bɛgu fĩ akɔsi anwummerɛ.

26 “‘Sɛ aboa bi nan mu apae nanso ɛmpae nsiiɛ, na ɔmpu nwesa a, ɛyɛ mo akyiwadeɛ. Obiara a ɔbɛsɔ ne mu no ho bɛgu fĩ.+ 27 Mmoa a wɔnante wɔn nan nnan soɔ no ho nte mma mo. Obiara a ɔbɛsɔ wɔn funu mu no ho bɛgu fĩ akɔsi anwummerɛ. 28 Obiara a ɔbɛsoa wɔn funu+ no, ɛsɛ sɛ ɔsi n’atadeɛ,+ nanso ne ho bɛgu fĩ akɔsi anwummerɛ, ɛfiri sɛ wɔn ho nte mma mo.

29 “‘Mmoa a wɔwea fam a wɔn ho nteɛ nie:+ Ahweaa, aperenkensema,+ ne koterɛ, ne wɔn a wɔn su te saa, 30 ne efiewura, mampam, bɔmɔte, anwea-koterɛ ne abosomakoterɛ. 31 Saa mmoa a wɔwea fam+ yi ho nte mma mo. Obiara a ɔbɛsɔ wɔn funu mu no ho bɛgu fĩ akɔsi anwummerɛ.+

32 “‘Biribiara a wɔn mu biara bɛwu atɔ soɔ no ho nte, adeɛ a wɔde dua+ asene oo, atadeɛ oo, nwoma+ oo, atweaatam+ oo, ɛho nte. Biribiara a wɔde yɛ adwuma no, ɛsɛ sɛ wɔde hyɛ nsuo mu, nanso ɛho bɛgu fĩ akɔsi anwummerɛ ansa na ɛho ate. 33 Na kukuo+ biara a wɔn mu bi bɛwu atɔ mu no, biribiara a ɛwɔ mu no ho nte, na ɛsɛ sɛ mobɔ no.+ 34 Sɛ nsuo firi mu gu aduane biara so a, ɛho nte, na biribiara a obi bɛnom no mu nso ho nte. 35 Biribiara a wɔn funu bɛtɔ soɔ no ho nte. Fononoo oo, deɛ ahina si soɔ oo, ɛsɛ sɛ wɔbɔ no. Ɛho agu fĩ, na ɛho nte mma mo. 36 Nsutire ne abura a nsuo wom deɛ, ɛho bɛkɔ so ate, nanso deɛ ɔbɛsɔ wɔn funu mu no ho bɛgu fĩ. 37 Sɛ wɔn funu tɔ aba bi a wɔrebɛdua so a, ɛho da so ara te. 38 Nanso sɛ ɛba sɛ wɔde nsuo gu aba no so na aboa a wawuo no ho biribi bɛtɔ so a, ɛho nte mma mo.

39 “‘Sɛ mmoa a wɔde ama mo sɛ aduane no bi wu a, deɛ ɔbɛsɔ ne funu mu no ho bɛgu fĩ akɔsi anwummerɛ.+ 40 Obiara a ɔbɛwe+ aboa a wawuo no fã biara no, ɛsɛ sɛ ɔsi n’atadeɛ, nanso ne ho bɛgu fĩ akɔsi anwummerɛ. Na obiara a ɔbɛsoa ne funu no nso bɛsi n’atadeɛ, nanso ne ho bɛgu fĩ akɔsi anwummerɛ. 41 Na aboa biara a ɔwea fam yɛ akyiwadeɛ.+ Ɛnsɛ sɛ moweɛ. 42 Ɛnsɛ sɛ mowe aboa biara a ɔwea ne yafunu soɔ+ anaa ɔnante ne nan nnan soɔ anaa aboa biara a ɔwɔ nan bebree a ɔwea fam, ɛfiri sɛ ɛyɛ akyiwadeɛ.+ 43 Mommfa mmoa a wɔwea fam yi nnsɛe mo kra, na mommfa nngu mo ho fĩ na mo ho anhura.+ 44 Mene Yehowa mo Nyankopɔn;+ monte mo ho na monyɛ kronkron,+ ɛfiri sɛ meyɛ kronkron.+ Enti mommfa mmoa a wɔwea fam nngu mo kra ho fĩ. 45 Mene Yehowa a ɔdii mo anim firii Egypt asase so de kyerɛɛ sɛ mene mo Nyankopɔn+ no. Monyɛ kronkron,+ ɛfiri sɛ meyɛ kronkron.+

46 “‘Yei ne mmara a ɛfa mmoa nyinaa ho, ntuboa, akra ateasefoɔ a wɔwɔ nsuo mu,+ ne akra a wɔwea fam manyamanya nyinaa. 47 Yei bɛma nsonsonoeɛ+ abɛda deɛ ɛho teɛ ne deɛ ɛho nteɛ ntam, ne aboa a mobɛtumi aweɛ ne deɛ montumi nweɛ ntam.’”